Ruma Bese Ena Bible Stadi Namona Karaia Dalana
1 Tama bona sina edia gaukara badana ta be edia natudia dekenai hereva momokani sivaraina idia hadibaia. (Deut. 6:6, 7) Dirava dadaraia tanobadana dekenai idia raka maoromaoro totona, natudia be sisiba bona hakaua herevana idia abia be gau badana. Namona be Iehova idia lalokau henia, hereva momokani idia laloa bada bona edia lalona idia hadaia hereva momokani idia rakatania lasi totona. Ena be maduna idauidau umui abia eiava hekwakwanai idia vara, to gau badana be natudia totona nega umui atoa. Natudia umui bamoa neganai, lauma gaudia idia dekenai umui hadibaia diba, bona unai diba ese edia kudouna do ia naria bona dala maoromaorona dekenai do idia raka diba.
2 Dirava ena Hereva dekenai ia gwauraia mauri taravatuna idia badinaia totona, gau badana be ruma bese stadi karaia hanaihanai totona nega umui atoa. Ruma bese kwarana taudia ese edia ruma bese ena goada lauma dalanai idia laloa bada be gau badana. Bema hari, tama bona sina be lauma dalanai natudia idia hadibaia namonamo lasi, gabeai hekwakwanai badadia do idia vara neganai do idia hekwarahi.
STADI GAUDIA BONA STADI KARAIA DALANA
3 Dahaka do idia stadilaia? Ruma bese kwarana tauna ia diba dahaka sivarai ese iena ruma bese taudia do ia durua bada. Namona be ruma bese taudia ia nanadaia edena hereva ese idia do ia durua bada, bona stadi buka ia abia hidi neganai edia hereva ia laloatao. Heduru sivaraidia idauidau umui kikilaia neganai ruma bese stadi amo diba do idia abia bona stadi do idia moalelaia danu. Ruma bese taudia momo be Gima Kohorona idia stadilaia hegaegae. To, nega haida, namona be sikuli dekenai idia vara diba hekwakwanai umui stadilaia. Heduru hereva idia torea vadaeni umui idia durua totona; hegeregere, memero kekeni idia turana karaia karana, sikuli murinai karaia karadia, spot gadara, bona sihari kava urana. Unai hereva umui stadilaia neganai emui natudia umui durua bona umui hagoadaia diba. Namona be ruma bese kwarana be idia stadilaia gaudia ia laloa namonamo, bona nega haida idia stadilaia gaudia ia haidaua natudia ia durudia bada totona bona unai hereva be edia kudouna dekenai ia diho totona.
4 Stadi be edena bamona do oi karaia be namo? Namona be mai emu hemataurai bona mai emu moale karana amo oi karaia. Paragraf duahia bona henanadai haerelaia sibona oi karaia lasi. Namona be henanadai ma haida oi gwauraia, bona haheitalai oi gaukaralaia natudia edia lalona idia gaukara totona bona iboudiai be stadi hereva ena anina idia diba totona. Stadi herevana idia abia namonamo totona, namona be idia itaia diba gaudia oi gaukaralaia, hegeregere, mapu bona laulau. Namona be natudia edia lagani bona edia diba hegeregerena, gaukara ta oi henia Index eiava Insight buka amo, eiava Bible ena Hereva Badadia buklet amo, hereva ta do idia tahua totona. Natudia idia hereva diba neganai idia danu edia lalona oi veria stadi herevana ena anina idia abia totona. Auka lasi henanadai haida idia haerelaia diba. Namo lasi stadi negana oi gaukaralaia natudia oi sisiba henidia totona. To, namona be idia oi hanamoa, oi hahedinaraia oi moale idia hekwarahi dainai, bona mai moale danu lauma gaudia idia dekenai do oi kikilaia.
5 Edena bamona do oi diba unai hereva be edia kudouna dekenai ia diho? Namona be natudia ibounai oi hagoadaia sibona edia hereva dekenai do idia haere totona. Henanadai oi gwauraia edia lalohadai idia hahedinaraia totona. Reana do oi gwau diba: “Sikuli natudia edia lalohadai inai hereva dekenai be dahaka? Nega haida inai hereva dekenai oi daradara danu, a?” Unai bamona henanadai oi henidia neganai, idia haere kerere neganai namo lasi oi badu, badina gabeai do idia gari bona edia lalohadai do idia gwauraia lasi. Namona be nega oi henidia idia haere namonamo totona. Bema natudia idia diba oi lalodia bada bona edia hekwakwanai oi ura kamonai, vadaeni oiemu hadibaia gaukarana idia dekenai do ia auka lasi.
6 Laloaboio lasi, ruma bese stadi oi karaia badina oi ura Iehova ena lalohadai do idia diba momokani, kongregesen heboudia dekenai haere idia henia mo sibona be hegeregere lasi. (Ef. 3:17-19) Unai ena anina be oi hekwarahi bada stadi herevana be edia kudouna dekenai ia diho totona. Namona be ruma bese taudia oi hadibaia dahaka dainai Dirava ena ura do idia karaia, bona dahaka dainai, edia mauri lalonai, idia badinaia be gau badana.
7 Ruma bese be lauma dalanai idia goada totona gau badana be ruma bese ena stadi idia karaia hanaihanai. Unai stadi karana ese natudia ia hadibaia bona ia durua mauri ena hekwakwanai idia hanaia totona. Tama bona sina e, umui be emui natudia umui durua bada diba. Unai dainai Dirava ese umui ia henia maduna do umui huaia. Bema mai goada danu ruma bese stadi namona umui karaia hanaihanai neganai Iehova ese umui do ia hanamoa.
[Questions]
1. (a) Deuteronomi 6:6, 7 oi duahia. Tama bona sina edia maduna be dahaka? (b) Natudia be dahaka idia abia be namo? (c) Dahaka dainai tama bona sina be edia natudia totona nega idia atoa be gau badana?
2. Bema hari, tama bona sina be nega idia atoa lasi lauma gaudia edia natudia dekenai idia hadibaia totona, reana gabeai dahaka do ia vara?
3. Dahaka dainai ruma bese iboudiai idia stadilaia gaudia be idia idauidau?
4, 5. Tama bona sina be dahaka idia karaia diba, hadibaia herevana be natuna kudouna dekenai ia diho momokani totona?
6, 7. Iehova ena hahenamo idia abia totona, tama bona sina be dahaka do idia karaia be namo?
This is a repeat of article in km 1/91 taken from km-E 12/90 “Conducting Meaningful Family Bible Studies.”