Lagani 1993 Ena Siri Badana: “Iehova e, emu dala lau oi hadibaia . . . Lauegu kudouna oi hatamonaia oiemu ladana gari henia totona.”—Sal. 86:11.
1 Iehova ena hesiai gaukara oi karaia ena daudau be hida? Unai hesiai gaukara be hua haida lalonai oi karaia, eiava lagani haida lalonai oi karaia, eiava lagani momo lalodiai oi karaia, a?
2 David mani oi laloa, ia ese Salamo 86 ia torea. Ia tubu daekau neganai ia be Iehova ena gwauhamata hesiai tauna ta ai ia lao. Iena mauri lagani be 30 neganai, David idia horoa pavapava ai ia lao totona, bona lagani 40 lalodiai lohia gaukara ia karaia. Ita diba lasi edena nega korikori ai ia ese Salamo 86 ia torea, to reana Dirava ena tanobada besena ia lohiaia lagani momo murinai ia karaia. Ena be ena diba bona ena maduna be bada to David ia guriguri, ia gwau: “Iehova e, emu dala lau oi hadibaia. Emu momokani dekenai do lau raka. Lauegu kudouna oi hatamonaia oiemu ladana gari henia totona.”—Sal. 86:11.
3 Hari lagani ena siri badana dekenai, sisiba ita abia diba. Herevana Dirava momokani ita tomadiho henia ena daudau be bada eiava maragi, to namona be nega ibounai ia ita tahua, ita ura ita ia hadibaia bona ena hereva ita badinaia.
4 Bema hua haida lalonai, lagani haida lalonai, eiava lagani momo lalodiai oiemu hesiai gaukara oi karaia noho lalonai, oi davaria oiemu kudouna be gau haida ese idia hapararaia neganai, namona be inai lagani ai oi hamaoromaorodia bona mai emu kudouna tamona ida do oi gaukara. Hegeregere, Iesu ena hereva mani oi laloa, ia gwau tau ta lasi be biaguna rua—Dirava bona taga—edia gaukara do ia karaia diba. (Mat. 6:24) Sibona oi henanadai, do oi gwau: ‘Momokani, lauegu kudouna be ia hapararaia badina lau ia durua momokani lasi moni eiava kohu lau tahua momo dainai, a?’ Bona, danu, ‘egu hegaegae karadia hari bona nega vairai totona lau tahua sibogu egu hekwarahi lasi maurina lau abia totona, eiava lau hekwarahi badina lauegu ura turana karana Dirava ida lau habadaia totona?’
5 To reana iseda mauri lalonai ita bisi momokani dainai, Dirava ena taravatu Bible dekenai ita tahua be auka sisina. Dahaka oi laloa, edena bamona’ vaira lagani ai oiemu Bible duahiduahi karana do oi habadaia diba? Vanegai sibona, Italy taihu ta ese elda ta ia hamaoroa ia gwau, lagani haida lalonai ia be Witness hahine ta, bona Bible ena kahana momo ia duahia, to Bible ena hamatamaia kahana amo ela bona ena dokona ia do duahia haorea lasi. Hari ia ese Bible ibounai ia duahia hamatamaia noho. Lagani vairai oi ura unai bamona oi karaia danu, a?
6 Ena be nega daudau eiava daudau lasi lalonai Dirava ena hesiai gaukara oi karaia, to iena hereva amo diba oi abia noho neganai, do oi davaria oi kahirakahira dekenai do ia mai, bona oi dekenai ia be tau korikorina ta bamona. Salamo karoa 86 siri 1 ia lao 17 dekenai, iseda lagani ena siri badana hegeregerena, David ese nega 11 Dirava ena ladana ia gwauraia. Ia be ena guba Tamana kahirakahira dekenai ia noho momokani. Hari be nega namona iseda Hadibaia Tauna Badana ena kahirakahira dekenai ita lao.
[Questions]
1-3. David be lagani momo lalonai Iehova ena hesiai gaukara ia karaia murinai, dahaka noinoi herevana ia gwauraia?
4, 5. (a) Dahaka gaudia ese tau ta ena kudou ia hapararaia diba? (b) Dahaka heduru hereva namodia be paragraf dekenai idia torea?
6. Dahaka dainai Iehova ena diba ita abia be gau badana?
This article has been taken partly from w92-E 12/15 “Walking With A Unified Heart”.