Magasin Hariharilaidia Karana amo Moale Habadaia
1 Iehova ena guba oreana be gaukara bada oreana. Iesu Keriso dekena amo, Iehova ese tanobada dekenai orea ta ia haginia, bona unai orea taudia be mai edia ura danu idia gaukara bada. (Sal. 110:3; Mat. 9:37, 38) Bema iseda haroro gaukara ita karaia namonamo bona ita ura habadaia, iseda moale do ia bada ia lao danu. (Luka 10:17) Unai bamona do ia vara momokani bema iseda lalona do ita hadaia Gima Kohorona bona Noga! magasin hariharilaidia gaukarana do ita habadaia neganai.
2 Inai tano lalonai, magasin hariharilaidia gaukarana be Basileia sivaraina harorolaia dalana badana ta. Ena be haroro gaukara be ia bada ia lao noho, to Papua New Guinea ena gabu haida dekenai ia hedinarai idia ore lagani rua lalodiai, idia hariharilaidia magasin edia namba be sisina ia diho ia lao, to hari lagani lalonai edia namba be ma idia bada idia lao. Ita ta ta iboudiai be dahaka do ita laloa noho iseda haroro gaukara lalonai magasin momo do ita hariharilaidia totona?
3 Gau badana be MAGASIN ITA LALODIA BADA. Bema Gima Kohorona bona Noga! magasin ita duahidia hanaihanai, unai ese ita do ia durua unai magasin henia gaukarana ita laloa bada totona. Magasin lalodiai idia toredia sivaraidia iboudiai ita duahidia dainai, namona be nega ibounai dala ita tahua taunimanima dekenai ita henidia toho totona. Hari, Gima Kohorona ena kala hani magasin be Pidgin bona Motu gado dekenai idia karaia, Noga! magasin Pidgin gado ai danu. Magasin namodia ita abia iseda haroro gaukara dekenai ita hariharilaidia totona. Reana ita momo dekenai, Saturday iboudiai be nega namona ruma ta ruma ta gaukara ita karaia totona. Kongregesen momo lalodiai dina ta pura ta ta iboudiai idia gwauraia magasin gaukara idia karaia totona, badina pablisa taudia haida be dala lasi Saturday dekenai idia karaia. Ma haida idia gwau adorahi 5 okoloka ia lao 6 okoloka be nega namona ruma ta ruma ta gaukara idia karaia magasin idia hariharilaidia totona. Papua New Guinea dekenai, dala dekenai ita gini be magasin hariharilaidia dala namona, bona gunika dekenai idia noho hanua maragidia amo taunimanima be taoni dekenai idia mai neganai, unai be dala namona ita davaridia totona. Dala dekenai magasin gaukara do ia namo totona, gau badana be elda taudia idia hegaegae gabu namodia idia abidia hidi totona, unai neganai pablisa momo be gabu tamona dekenai do idia gini hebou lasi. Umui ibounai ai hagoadaia unai gaukara umui karaia noho totona. Sitoa ta sitoa ta ai magasin hariharilaidia gaukarana totona idia hegaegae diba, bona namona be idia manada pablisa taudia ese unai gaukara idia gunalaia. Ruma ta ruma ta gaukara ita karaia neganai, bema hua ena henia gauna idia ura lasi abia, magasin matamatana ita henidia toho diba. Bema ita gima noho magasin ita hariharilaidia totona, huahua momo do ita davaria diba.
MAGASIN DALANA
4 Reana unai gaukara, magasin dalana, ita do manadalaia lasi. Unai gaukara ita karaia totona gau badana be ruma ta ruma ta gaukara ai, lou-henia dekenai, bona emu turadia bona varavara dekenai magasin idia abia neganai edia ruma oi torea buka dekenai. Edena magasin idia abia bona edena nega idia abia oi torea, vadaeni magasin matamatadia idia ginidae neganai hanaihanai idia dekenai oi abidia lao diba. Unai be magasin dalana, bona ia be dala namona kamonai taudia durudia totona bona Baibel stadi matamatadia hamatamaia totona.
5 Heduru hereva ma ta magasin momo hariharilaidia totona be inai: HEREVA KWADOGINA GWAURAIA. Nega haida pablisa haida be idia hereva momo dainai ruma taudia be magasin idia ura lasi abia. Ma pablisa haida ese Kiki Herevana idia gaukaralaia magasin gaukara idia karaia neganai. To unai bamona idia karaia be namo lasi. Magasin ita hariharilaidia neganai hereva kwadogina ita gwauraia be namo. Unai magasin ese taunimanima do idia ‘hereva henidia’ bamona. Society ia gwau namona be miniti kahana eiava tamona lalonai magasin lalonai ia noho sivarai eiava hereva badana tamona do ita kikilaia.
[Questions]
1. (a) Dahaka ese iseda moale karana do ia habadaia diba? (b) Luka 10:17 ena hereva hegeregerena, dahaka dainai hahediba taudia 70 idia moale? (c) Hari, dahaka do ita karaia iseda moale habadaia totona?
2. Idia ore vadaeni lagani rua lalodiai magasin hariharilaidia ena namba be edena bamona?
3. (a) Dahaka dainai magasin ita lalodia bada? (b) Magasin ita hariharilaidia diba daladia haida be dahaka? (c) Elda taudia ese tadikaka be edena bamona idia durudia diba magasin gaukara idia karaia totona?
4. Magasin dalana karaia totona dahaka ita karaia?
5. Idia gwau magasin hariharilaidia dala namona be dahaka?
This is a repeat of article in km 1/93 taken from km-E 9/89 “Gaining Joy Through Increased Magazine Placements.”