Kamonai Taudia Durudia Totona mai Moale Danu Ita Lou Henidia
1 Ruma ta ruma ta gaukara idia karaia taudia iboudiai idia ura kamonai taudia idia durudia. Heduru henia karana amo moale bada ita davaria diba. (Salamo 126:5, 6 itaia danu.) Unai anina be ita hegaegae namonamo.
2 Hegaegae kara ginigunana be ruma ta ruma ta pepana ita torea namonamo. Unuseniai nega ginigunana ruma tauna dekenai oi kikilaia sivaraina bona iena lalohadai oi torea. Dahaka do oi kikilaia oi lou henia neganai reana oi torea danu.
3 Dala ta be inai, bema guna umui be Lohiabada Gurigurina umui kikilaia bona “Gavamani” buklet oi henia, reana inai bamona do oi hereva diba:
◼ “Guna oi lau vadivadi henia neganai, Dirava ena ura inai tanobada dekenai do ia karaia bona taunimanima iboudiai be maino ai do idia noho ena sivarai ita kikilaia. Mani emu kara, oi lau henia buklet ena rau 29 oi itaia bona Dirava ena Basileia ese taunimanima dekenai do ia havaraia hahenamo ma haida do oi itaia.”
4 Bema guna ia hedinarai oi vadivadi henia tauna be Dirava ia abidadama henia lasi, reana inai bamona do oi hereva diba:
◼ “Guna oi lau vadivadi henia neganai, ita be Heberu 3:4 ena hereva ita kikilaia bona aonega Tauna ese gau ibounai ia havaraia ena badina haida ita kikilaia.” Unai Baibel siri oi duahia lou bona murinai Dirava ese Ita Ia Laloa Eiava? buklet ena rau 4 ia lao 9 amo sivarai haida oi kikilaidia, emu hereva gunana do oi habadaia unai. Henanadai oi gwauraia bena murinai paragraf oi duahia, bona nega oi henia ruma tauna ese henanadai do ia haerelaia totona. Bema ia hegeregere neganai, oi hamaoroa ena buklet do ia abia ena hereva umui kikilaia totona.
5 Bema nega ginigunana ruma tauna oi vadivadi henia neganai bona ena toana be ia taga eiava ia noho namo, namona be oi lou henia neganai guna oi henia Inai Tanobada Do Ia Ore Eiava? pepapepana amo rau 6 ena hereva do oi duahia. Ruma tauna be ia ura tanobada paradaisona lalonai do ia noho oi henanadai henia. Ena lalohadai oi diba momokani totona, namona be oi gaukaralaia magasin eiava buklet amo laulau namona oi hahedinaraia eiava hereva ta oi gwauraia bona oi hamaoroa iena lalohadai unai gauna dekenai do ia gwauraia hedinarai.
6 Unai bamona do oi karaia diba danu bema guna Gima Kohorona eiava Noga! magasin oi hariharilaia. Nega ginigunana oi vadivadi henia neganai bema oi henia magasin amo sivarai oi kikilaia, namona be unai magasin eiava magasin matamatana ta amo hereva badana ma ta oi kikilaia. Bema ia hegeregere, Baibel siri tamona umui duahia hebou bona ruma tauna oi nanadaia iena lalohadai unai siri dekenai be dahaka. Murinai magasin sabskripsen oi henia toho.
7 Laloaboio lasi, oi ura gauna be Baibel stadi oi hamatamaia. Kamonai tauna durua totona oi lou henia loulou murinai unai do ia vara diba. Ruma tauna lou henia haraga, unai amo oi hahedinaraia iena namo oi tahua.
8 Ita harorolaia sivarai namona ese moale bada ia havaraia. (Luka 2:10) Kamonai taudia be idia moale ita mai dainai, unai ese ita dekenai moale bada ia havaraia. (Fil. 4:1) Namona be haroro gaukara lalonai ita davaria kamonai taudia ita lou henidia bena unai bamona moale do ita davaria diba.
[Questions]
1. Haroro gaukara lalonai ita davaria taudia ita durudia neganai, dahaka namo ita davaria?
2. Lou-henia namona do oi karaia totona hegaegae dalana be dahaka?
6. Guna magasin ta ia abia ruma tauna oi lou henia neganai, oi hereva henia dalana namona be dahaka?
7. Lou-henia ita karaia ena badina badana be dahaka?