Mauri Hanaihanai Bona Dirava Momokani Tamona Bukadia Stadilaidia
1 Pepapepa, buklet, magasin, bona buka—iboudiai ita gaukaralaidia diba kamonai taudia dekenai Baibel stadi do ita hamatamaia totona. Tau Hereadaena buka momo ita hariharilaidia bona taunimanima idia moalelaia dainai, unai buka amo Baibel stadi ita hamatamaia. Momokani, namona be taunimanima iboudiai ita hagoadadia unai buka idia duahia bona idia stadilaia totona, bona nega ibounai Kongregesen Buka Stadi totona unai buka idia hegaegaelaia bona buka stadi dekenai idia lao be gau badana.
2 To, kamonai matamata taudia ese Baibel ena hahediba herevadia bona Keristen ena taravatu idia diba bona edia mauri lalonai idia badinaia totona, gau badana be idia danu buka rua ita stadilaidia. Unai buka rua be: Mauri Hanaihanai Paradaiso Lalonai bona Dirava Momokani Tamona Tomadiho Henia mai Lalo-Tamona Danu bukadia. Bema haida ese buka idauna dekenai Baibel stadi idia karaia, namona be ia hegeregere neganai, unai buka umui rakatania bona atai ai torea bukana ta umui stadilaia hamatamaia. Bema Tau Hereadaena bukana amo stadi umui karaia, stadi tauna umui hagoadaia ia sibona do ia duahia noho totona. Ena be stadi tauna be bapatiso ia abia buka iharuana umui do haorea lasi neganai, to namona be unai tauna oi Baibel stadi henia ela bona Mauri Hanaihanai bona Dirava Momokani Tamona buka ruaosi umui stadi haoredia. Unai ese Baibel stadi tauna ia durua lauma dalanai do ia goada momokani totona.