Hari Hesiai Laganina Lalonai Dahaka Do Ita Karaia?
1 September 1 ai, 1994 ena hesiai lagani ia matamaia, unai dainai, hari be nega namona Iehova ena taunimanima ta ta sibona sibona idia laloa namonamo hesiai lagani matamatana lalonai dahaka do idia ura karaia.
2 Lauma Dalanai Ita Tubu Noho: Bema vanegai sibona hereva momokani lalonai ita vareai, namona be ita ura hereva momokani dekenai do ita goada momokani. (Heb. 6:1-3) Bema lauma dalanai ita goada vadaeni, kamonai matamata taudia bona ma haida do ita durudia be namo, to unai sibona lasi, namona be iseda goada lauma dalanai do ita naria danu, namo lasi ita laloa Baibel ena aonega bada ita abia vadaeni, bona Keristen ena mauri dalana ita manadalaia vadaeni dainai, ita hegeregere vadaeni. Dina edia siri, Haroro School Sediual lalonai idia torea Baibel duahiduahi ita karaia, bona Kongregesen Buka Stadi bona Gima Kohorona stadi totona ita hegaegae, a? Ita iboudiai be unai ita karaia be namo. Lauma dalanai ita tubu noho be gau badana bema ita ura inai kara dika negana amo do ita roho mauri, bona Dirava ena nega matamatana lalonai mauri do ita abia.—Filipi 3:12-16 itaia danu.
3 Lauma Dalanai Ita Goeva Noho: Iehova ese ita ia abia dae totona, gau badana be “tauanina bona lauma hamiroa karadia ibounai” amo do ita goeva. (2 Kor. 7:1) Ita goeva neganai, ita ura lasi inai tanobada dikana ena ‘kopukopu dekenai ma ita giroa lou,’ ani? (Petero Iharuana 2:22 itaia danu.) Gau badana be iseda lalona ita hadaia lauma dalanai ita goada bona ita goeva noho totona. Unai neganai, Satana ena ura dikana do ita diba dainai, do ita moru lasi, kara dika do ita karaia lasi bona Iehova ena lalo-namo ita dekenai do ita haboioa lasi.—2 Kor. 2:11.
4 Aonega Sisiba Badinaia: Hereva Lada-isidia 15:22 ia gwau: “Sisiba henia taudia idia momo neganai, do ita kwalimu momokani.” To, inai oi laloatao, unai hereva ia gwauraia tauna, Solomon, be Dirava ena sisiba, idau bese hahine adavaia lasi herevana, ia badinaia lasi dainai, gabeai ‘iena adavadia ese ena lalona idia giroa, dirava idaudia ia tomadiho henidia totona.’ (1 Pav. 11:1-4) Unai dainai, bema ita ta ta sibona sibona be aonega sisiba herevana ita badinaia lasi, Iehova ena hesiai gaukara do ita karaia namonamo diba lasi, bona iseda kara ia namo lasi haida do idia tohotohoa totona, ani? (1 Tim. 4:15) Baibel ena sisiba ese ita ia durua iseda kudouna do ita naria namonamo totona. (Her. 4:23) Bema Iehova ia lalokau henia gaudia ita lalokau henidia, bona ia inai henia gaudia ita inai henidia, hanaihanai iena hakaua herevadia ita tahua bona ia idia hamoalea gaudia ita karaia neganai, unai kara be ita idia naria momokani.—Her. 8:13; Ioane 8:29; Heb. 1:9.
5 Iseda tomadiho karana Iehova dekenai be karaia kava gauna lasi, sibodia idia gwauraia Keristen taudia edia tomadiho karana bamona lasi, to iseda tomadiho karana be Dirava ena Hereva lalonai ia noho hereva momokanina hegeregerena, mai iseda goada bona mai momokani ida ita karaia.—Ioane 4:23, 24.
6 Iseda lalona ita hadaia Dirava ena ura ita karaia totona, to reana dina ta ta iboudiai hedibagani ese ita idia koua toho. Namona be ita goada badina ita diba “ekalesia varavara tanobada kahana ibounai dekenai” ese unai bamona hedibagani idia davaria, bona ita diba Iehova ese ita do ia hagoadaia. (1 Pet. 5:9, 10) Unai dala amo 1994 ena hesiai lagani lalonai iseda hesiai gaukara do ita hagugurua diba.—2 Tim. 4:5.
[Questions]
1. Dahaka dainai hari be nega namona ita ibounai do ita ura karaia gauna ita laloa namonamo totona?
2. (a) Bema vanegai sibona hereva momokani lalonai ita vareai, namona be iseda ura be dahaka? (b) Namona be ita ibounai be dahaka ita karaia?
3. Iehova ese ita ia abia dae totona, dahaka ita karaia be gau badana?
4. Dahaka dainai ita ta ta sibona sibona be aonega sisiba herevadia ita badinaia be gau badana?
5. Iseda tomadiho karana Iehova dekenai ena dala oi gwauraia hedinarai.
6. Iseda hesiai gaukara ita karaia neganai, bema hedibagani ita davaria, dahaka ese ita do ia hagoadaia?