Henanadai

● Ena be hahediba matamata taudia be bapatiso idia abia vadaeni, to dahaka dainai ita do stadi henidia ela bona buka rua do idia haoredia be gau badana?

¹ Ita diba Iehova ese iena orea ia hanamoa badina kamonai matamata taudia momo be kongregesen dekenai idia vareai. Ita moale bada unai hutuma gogoa gaukarana ita itaia neganai. To, ita diba unai mamoe bamona taudia be Iehova idia hesiai henia totona, heduru bona hakaua hereva idia abia noho be gau badana.

² Hereva momokani ena diba maorona idia abia totona, kamonai matamata taudia ese heduru idia abia be namo. (Kol. 1:​9, 10) Iseda maduna be idia ita hadibaia Bible ena hahediba hereva badadia, Bible ia gwauraia mauri taravatudia, Keristen ena mauri dalana bona ma hereva haida danu idia diba namonamo totona. Unai diba idia abia neganai, hereva momokani dekenai do idia gini goada diba, herevana dahaka hetoho do idia abia.

³ Kamonai matamata taudia edia lalo-parara karana do ia bada be gau badana. (1 Kor. 14:20) Ia hedinarai goevagoeva, lauma dalanai tau badadia bamona ai idia lao totona, Bible dekena amo hadibaia tauna ese hahediba tauna ia do stadi henia be heduru gauna namona. Vadaeni, ena be ta ese bapatiso ia abia buka rua ia do stadilaia ore lasi neganai, to aonega dalana be Bible stadi do ia abia noho ela bona buka rua ia stadilaia ore.

BAPATISO MURINAI

⁴ Iesu ia gwau ita ese taunimanima haida hahediba taudia do ita halaodia​—idia ita bapatiso henia bona idia ita hadibaia. (Mat. 28:​19, 20) Hahediba taudia halaoa gaukara badana ita karaia hadibaia taudia ese bapatiso idia abia murinai. Ita hadibaia tauna ese buka tamona sibona ia stadilaia neganai, lauma dalanai ena diba ia do hegeregere lasi. Iena hesiai gaukara ia karaia namonamo totona, bona hari inai negai, Iehova ena hesiai gaukara idia karaia taudia idia davaria metau gaudia ia haheaukalaidia totona, ena diba ia habadaia be gau badana. Bema unai bamona ia karaia lasi, reana ia hegeregere lasi sibona ia gini goada totona. Herevana buka rua ia stadilaia ore eiava lasi, namona be abidadama matamata tauna ese bapatiso ia abia murinai, ita durua noho ia goada ia lao noho totona. Ia stadilaia buka ginigunana amo, Bible ena hereva badadia ia diba. Buka iharuana amo, Keristen ena kara idauidau do ia diba. Reana idia stadilaia buka ginigunana be Mauri Hanaihanai bukana bona iharuana be Dirava Momokani Tamona eiava Maino bukana. Bema unai buka umui abia diba lasi, unai bamona hereva idia hahedinaraia bukadia ma haida umui gaukaralaidia diba. Stadi oi karaia noho ela bona buka iharuana umui haorea, badina unai neganai ita hadibaia tauna be Iehova ena ura, ia gwauraia mauri dalana bona ena taravatu do ia diba namonamo. Unai ese abidadama matamata tauna ia durua Keristen ena dala maorodia ena anina ia diba totona, bona ena abidadama do ia hagoadaia.​—Kol. 2:7.

⁵ Oibe, bapatiso murinai, abidadama matamata taudia be lauma dalanai idia goada idia lao be gau badana. (Heb. 6:​1-3) Nega momo, unai buka iharuana idia haorea haraga. Unai neganai abidadama matamata tauna ena diba ia hegeregere sibona ia gini goada totona.