Baibel Ena Namo Hari Tanobadana Lalonai
1 Hari inai negai, taunimanima momo idia laloa Baibel be idaunegai gauna dainai idia badinaia be hegeregere lasi. Ena be taunimanima edia histori lalonai, buka iboudiai amo Baibel idia hariharilaia momo bona gado momo dekenai idia hahanaia, to taunimanima haida sibodia ese idia duahia, bona haida sibodia ese ena hereva idia badinaia.
2 To ita be idau, Baibel be Dirava ena Hereva dainai ita laloa bada. Hamomokania gaudia ese idia hahedinaraia Baibel ia gwauraia histori sivaraidia idia maoro. Danu, ena hereva idia tamona lasi, ena peroveta herevadia, ena aonega herevadia, bona ia be mai ena siahu taunimanima edia mauri lalonai namo havaraia totona, unai gaudia ese idia hahedinaraia Baibel be “Dirava ena Lauma ese ia havaraia.” (2 Tim. 3:16) Ita diba vadaeni gaudia dainai, bona unai harihari gauna namona ita laloa bada dainai, namona be unai ese ita ia hagoadaia ma haida do ita durudia Baibel ena namo bada do idia diba totona.
3 Inai bamona ita hereva diba:
◼ “Taunimanima ese hekwakwanai badadia idia davaria dainai, idia momo ese Dirava idia abidadama henia be ia auka, eiava idia laloa Dirava ese ita davaria hekwakwanai ia koudia diba lasi. Oiemu lalohadai unai hereva dekenai be dahaka? [Naria do ia haere totona.] Namona be inai pepapepa ena ladana Bible Oi Abidadama Henia Diba oi itaia.” Vairana laulauna oi gwauraia bena murinai rau 2 ena paragraf ginigunadia rua oi duahidia. Bema ruma tauna ia ura kamonai noho, oi ese paragraf iharuana dekenai ia noho Baibel siridia do oi duahia diba. Unai pepapepa ena sivarai haida do umui kikilaia totona, lou-henia negana oi gwauraia hegaegae, reana ena lalona veria totona unai pepapepa ena sinado ta be henanadai amo do oi gwauraia.
4 Oi hereva henia dalana ma ta be reana inai bamona:
◼ “Dahaka oi laloa, mauri ena hekwakwanai hanaidia totona taunimanima be heduru herevana idia abia be namo, a? [Naria do ia haere totona.] Gunaguna, taunimanima be Baibel dekenai idia lao heduru herevana idia abia totona, to hari unai bamona idia karaia lasi. Oi laloa hari inai nega lalonai Baibel ena hereva idia namo bona ita badinadia diba, a? [Naria do ia haere totona.] Namona be 2 Timoteo 3:16 ena hereva oi itaia. [Oi duahia.] Dirava ena Hereva idia torea bona ita ia durua mai aonega danu dala ita abia hidi totona, bona danu, dina vaira totona helaro namona ita ia henia.” Ioane 17:3 oi duahia. Baibel ena namo oi hahedinaraia totona, Buka Helaga—Dirava Ena Hereva Eiava Taunimanima Edia? bukana amo, guna oi hegaegaelaia hereva tamona eiava rua oi kikilaia. Bena murinai, New World Translation Baibel bona buka nega tamona oi henia toho.
5 Reasoning buka ena rau 10 dekenai, sinado maragina “Bible/God” henunai, hamatamaia herevadia haida ese oi idia durua diba. Ta be inai: “Namo. Lau mai, badina lau ura anina bada herevana ta lau gwauraia hedinarai oi dekenai. Mani emu kara inai hereva Baibel amo oi kamonai. [Siri ta, Apokalupo 21:3, 4 eiava unai bamona sirina ma ta oi duahia.] Unai hereva be edena bamona oi laloa? Oi moalelaia, a?” Eiava inai bamona oi hereva diba: “Ai ese taunimanima edia lalona ai hagoadaia edia Baibel do idia duahia totona. Baibel ena haere henanadai badadia dekenai ese taunimanima momo ia hahoadia. Ta be inai: . . . (Sal. 104:5; eiava Dan. 2:44; eiava siri ma ta).”
6 New World Translation Baibel Oi Hariharilaia Neganai: Nega ginigunana ruma tauna oi haroro henia neganai eiava oi lou henia neganai, New World Translation Baibel oi henia toho be namo. Reana ruma tauna do oi nanadaia ia be mai ena Baibel bona ena hereva ia duahia be ia auka eiava lasi. Ena haere murinai, ia dekenai New World Translation Baibel ena heduru gaudia haida oi hahedinaraia.
7 Namona be ita gima noho bona dala ia kehoa neganai taunimanima ita hagoadadia Baibel do idia duahia totona. Kamonai taudia ita durudia Dirava ena Hereva idia matauraia bona idia ura henia bada totona. Bema edia mauri lalonai ia gwauraia taravatudia idia badinaia, bona hereva momokani idia abia dae, hari inai negai bona vaira dinadia ai danu hahenamo momo do idia davaria.—Sal. 119:105.
[Questions]
1. Hari inai negai, taunimanima momo edia lalohadai Baibel dekenai be dahaka?
2. Ita diba vadaeni gaudia dainai bona Baibel ena namo ita diba dainai, namona be unai ese ita ia hagoadaia dahaka gaukara do ita karaia totona?
5. Iduara dekenai oi gini neganai, Baibel oi herevalaia hamatamaia dala namona ta be dahaka?
6. New World Translation Baibel be edena negai do ita henia toho be namo?