December Lalonai Baibel Stadi Hamatamaia Dalana
1 Iesu ese iena hahediba taudia ia haganidia sivarai namona hadibaia taudia ai do idia lao totona. (Mat. 28:19, 20) Taunimanima ita hadibaia dala badana ta be Baibel stadi karana amo. Oi ese unai gaukara oi karaia, a? Bema lasi, stadi ta be edena bamona do oi hamatamaia diba bona taunimanima hadibaia gaukara moalena oi habadaia diba?
2 Reana ruma tauna dekenai Inai Tanobada Do Ia Ore Eiava? pepapepana ta ita henia, bona ita hamaoroa gabeai do ita giroa lou ena hereva ma haida do ita kikilaia totona.
Bema guna pepapepa ta be ruma tauna dekenai ita henia, ita lou henia neganai, inai bamona ita hereva diba:
◼ “Dina haida gunanai lau mai neganai, hari be mai anina bada negana bona Iesu ese hari idia vara gaudia ia perovetalaia sivaraidia ita kikilaia. Lau ura miniti haida lalonai, guna oi lau henia pepapepana amo sivarai ma haida do ita kikilaia. Namona be inai hereva maragina ta ladana ‘Toa’ henunai ia noho sivaraina oi laloa.” Pepapepa oi kehoa rau 4 dekenai, bona paragraf ginigunadia rua eiava toi edia sivarai oi kikilaia, bema nega ia hegeregere idia torea Baibel siridia oi duahidia danu. Hari inai negai, Iesu ena peroveta hereva ia guguru dalana oi hahedinaraia. Unai hereva maragina henunai idia noho paragraf ma haida do umui kikilaia totona, oi hegaegae do oi giroa mai totona. Ruma tauna oi hagoadaia oi do giroa mai lasi neganai, unai sivarai ia duahia hegaegae totona.
3 Eiava inai bamona oi hereva diba:
◼ “Guna ita kiki hebou neganai, pepapepa ta ladana Inai Tanobada Do Ia Ore Eiava? oi dekenai lau henia. Unai nega lalonai, Iesu Keriso ena kara inai tanobada dekenai ita kikilaia. Baibel dekenai iena hereva Ioane 17:3 lalonai ita duahia diba. [Oi duahia.] Bema ita ura mauri hanaihanai do ita abia, iseda diba Dirava bona Iesu dekenai ita habadaia be gau badana; unai bamona diba ita tahua neganai namo do ita davaria. Iesu be tanobada dekenai ia noho neganai, ia ese Dirava ena kara namodia momo ia hahedinaraidia. Vadaeni, bema Iesu dekenai iseda diba ita habadaia, anina be iseda diba iena Tamana dekenai ita habadaia danu, ani? [Naria ia haere totona.] Namona be inai Tau Hereadaena bukana ena hereva oi laloa.” Karoa 116, rau 10 ena paragraf ginigunana bona iharuana oi duahidia. Oi hahedinaraia Evanelia buka hani dekenai Iesu ena kara ibounai be unai buka dekenai idia torea, idia vara ena nega korikorina hegeregerena. Buka ena rau ginigunadia dekenai, karoa ta ta ladadia, mapu, bona laulau haida be ia dekenai oi hahedinaraia. Bena murinai unai buka oi henia toho.
4 “Tau Hereadaena” buka ia abia tauna ita lou henia neganai, ita hanamoa murinai inai bamona do ita hereva diba:
◼ “Guna lau mai neganai, oi dekenai lau gwau Tau Hereadaena buka be namo herea Baibel oi stadilaia totona. Lau ura nega sisina lalonai oi gaukaralaia diba dalana lau hahedinaraia.” Buka ena karoa 1, “Hereva Haida Guba Amo,” oi kehoa. Ruma tauna ena matana oi veria henanadai idia torea gabuna dekenai. Henanadai ginigunana oi duahia, bena murinai paragraf ginigunadia haida edia sivarai oi kikilaia. Rau 2 ai, laulau ena anina oi kikilaia. Emu nega hegeregerena, henanadai oredia oi herevalaidia bona edia haere oi gwauraidia. Lou-henia oi do haorea lasi neganai, do umui kiki lou totona, edena negai ma oi giroa lou oi hegaegaelaia.
5 Bema iseda lalona ita hadaia momokani, ita hegaegae namonamo, bona ita gima noho, December lalonai do ita hegeregere Baibel stadi ta do ita hamatamaia diba totona.
[Questions]
1. Hereva momokani ita hadibaia dala badana ta be dahaka?
2. Baibel stadi ta hamatamaia totona, guna pepapepa oi henia tauna dekenai oi lou henia neganai, dahaka do oi hereva diba?
3. Guna, pepapepa ta ita henia dainai ita lou henia neganai, ia dekenai buka be edena bamona ita hahedinaraia diba?
4. Tau Hereadaena buka dekena amo Baibel stadi hamatamaia dalana ta be dahaka?
5. December lalonai, Baibel stadi ta ita hamatamaia diba totona, dahaka gau toi ese ita idia durua ita hegaegae totona?