Mai Laloa Maoro ida Sivarai Namona Harorolaia
1 Ita ibounai ita ura iseda gaukara lalonai ita moale bona ita kwalimu, taunimanima be hahediba taudia ai halaoa gaukarana lalonai unai ura be bada. Dahaka ese unai namo do ia mailaia? Ena matamana be do ita laloa maoro noho taunimanima ita durua gaukarana namona ita goadalaia noho lalonai. (Aon. 11:25) Tiokratik gaukara dekenai ita bisi bada herea dainai iseda Witness lasi tama sina eiava varavara ma haida dekenai ita haroro lasi, ia vara diba, a? Iseda abidadama lasi varavara taudia dekenai ita karaia gau namo hereana be hereva momokani idia dekenai ita hahedinaraia. Unai ita karaia neganai, namona be ita gado-namo. Bema ruma ita rakatania vadaeni, hanaihanai revareva ita siaia, Iehova amo ita abia hahenamo ita gwauraia bona ita naria noho hahenamo danu, unai amo idia ita durua. Reana Mauri Hanaihanai Paradaiso Lalonai bukana be harihari gauna bamona idia dekenai ita henia diba.
2 Momokani, nega o dala idauidau ai iseda varavara eiava turadia ma haida dekenai ita haroro neganai, buka ita henia diba harihari gauna bamona bona ena davana ita noia lasi. To ita diba lasi taudia dekenai ita hereva neganai, hegeregere ruma-ta-ruma-ta gaukarana lalonai, namona be buka ita hariharilaidia edia davana korikorina ai. Unai dala amo idia ita durua idia abia gauna ena namo do idia laloa bada bona unai ese reana edia lalona ia veria unai buka do idia duahia. Mani English, Hiri Motu, bona New Guinea Pidgin gado bukadia edia davana idaudia umui laloatao. Namona be nega ibounai inai buka namona haida be emui ruma dekenai idia noho.
3 “Mauri Hanaihanai” bukana be nega ginigunana oi hariharilaia neganai, reana inai bamona oi gwau:
◼ “Oi laloa nega vairai taunimanima be noho namona do idia abia diba, a? [Haere naria.] Baibel ese ia hahedinaraia taunimanima be nega vairai noho namo hereana do idia abia, maino ai do idia noho hanaihanai.” Salamo 37:29, 37 oi duahia. Unai siri oi herevalaia sisina bena oi gwau, “Unai salamo ese ita ia hadibaia danu edena bamona hari mauri aukana ita haheaukalaia diba bona mai abidadama ida nega vaira namona ita naria diba.” Hari siri 39 oi duahia. Mauri Hanaihanai bukana oi kehoa bona rau 9 ena laulau bona rau 11 ia lao 13 ai idia noho taudia edia mauri namona edia idau oi hahedinaraia. Dokonai ruma tauna oi hadibaia bema ia ura momokani do ia mauri hanaihanai bona paradaiso lalonai mauri namona do ia moalelaia, namona be iena diba ia habadaia. Bena Mauri Hanaihanai bukana oi hariharilaia.
4 Oi lou henia neganai, reana inai henanadai oi gaukaralaia:
◼ “Hari inai negai dubu momo idia noho dainai, taunimanima momo idia gwau edena tomadiho ita abia dae be anina lasi. Dahaka oi laloa? [Haere naria.] Iesu ese ita ia durua haheitalai ta ia henia.” Mataio 7:13, 14 oi duahia. Paragraf 5 bona 6 Mauri Hanaihanai bukana ena rau 26 bona 27 dekenai oi herevalaia. Oi hahedinaraia unai haheitalai amo ita diba momokani edena tomadiho ita abia dae be mai anina bada. Tomadiho iboudiai be gabu tamona dekenai idia lao dala idauidau lasi. Oi hadibaia Baibel stadi be edena dala amo Dirava ese ia lalo-namo henia tomadihona do ia hahedinaraia. Oi nanadaia bema Baibel stadi ia ura abia. Bema ia ura, Diba bukana amo stadi oi hamatamaia.
5 Reana inai hereva oi tohoa “Mauri Hanaihanai” bukana be harihari gauna bamona emu varavara eiava turadia dekenai oi henia neganai:
◼ “Nega ibounai lau oi kara namo henia. [Eiava reana badina ma ta oi gwauraia.] Lau ura lau laloa bada bukana ta oi dekenai lau henia. Ia ese oi do ia durua oiemu diba Dirava ena kara bona ena ura vaira negana totona do oi habadaia. Mani inai rau 156 bona 157 dekenai idia noho laulau oi itaia, idia be Baibel ena gwauhamata idia hahedinaraia.” Siri namodia haida oi duahia bona rau 156 ia lao 158, bona 161, 162 dekenai idia noho laulau oi herevalaia. Oi hadibaia inai be oiemu harihari gauna ia dekenai bona oi hagoadaia do ia duahia totona.
6 Oiemu varavara eiava turadia oi vadivadi lou neganai:
◼ “Vanegai, Dirava ese tanobada bona kara maoromaoro idia ura taudia totona ia laloa mauri namona ita herevalaia. Lau ura vanegai lau henia bukana lalonai ia noho gau ma ta lau hahedinaraia. [Reana oi noia unai buka ia mailaia bema ia noho kahirakahira ai.] Mani oi itaia Dirava ena kara be edena bamona ia herevalaia.” Rau 38 oi kehoa bona paragraf 12 bona 13 oi duahia bona ia ida oi herevalaia. Bema ia ura kamonai, oi hahedinaraia edena dala ai hanaihanai umui karaia Baibel stadi amo heduru ia abia Dirava do ia diba totona. Diba bukana oi hahedinaraia bona stadi oi hamatamaia.
7 Sitoa ta sitoa ta dekenai oi gaukara neganai, reana inai hereva kwadogina bona “Mauri Hanaihanai” bukana oi gaukaralaia diba:
◼ “Hari ai be inai gabu dekenai idia noho bisinesi taudia durua gaukarana ai karaia. Ita ibounai be raskol karadia bona dagedage iseda gabu dekenai idia bada idia lao dainai ita laloa bada. Oi laloa, tauna ta ese unai hekwakwanai ia hanaia dalana ia diba, a? [Haere naria.] Dirava be mai ena hanamoa dalana.” Mauri Hanaihanai bukana ena rau 13 oi kehoa; Isaia 11:6-9 oi duahia bona herevalaia. Reana oi ura laulau oi herevalaia bona buka oi hariharilaia.
8 Bisinesi tauna ta dekenai “Mauri Hanaihanai” bukana oi rakatania murinai oi lou henia neganai, reana inai bamona oi gwau:
◼ “Vanegai lau vadivadi neganai, lau gwau Dirava sibona be raskol karadia bona dagedage haorea dalana ia diba. Iena gwauhamata hegeregerena, ita diba momokani maino tanobadana do ia vara. Mani ita vairanai ia noho abia hidi oi laloa.” Paragraf 13, Mauri Hanaihanai bukana ena rau 255 dekenai oi duahia, Mataio 7:13, 14 danu. Baibel stadi oi hahedinaraia, edia bisinesi gabuna ai eiava edia ruma dekenai do umui karaia diba.
9 Ita be ‘Dirava ena gaukara ita karaia hebou’ taudia dainai, badina momo idia noho mai laloa maoro ida sivarai namona ita harorolaia. (1 Kor. 3:9) Ita laloa maoro noho karana ese Iehova ena hahenamo momo do ia mailaia.