Bema Ita Lou Henidia Lasi Edena Bamona Do Idia Kamonai?
1 “Bema haroro tauna be lasi neganai edena bamona do idia kamonai?” (Roma 10:14) Oibe, bema lou-henia namodia ita karaia lasi, edena bamona hereva momokani ena anina do idia diba? Bema ruma tauna ese ita harorolaia Basileia sivaraina ia kamonai, namona be ita lou henia. Hari hua lalonai, buklet ita hariharilaidia neganai, namona be unai taudia ita lou henidia, bona guna ita kikilaia herevana habadaia totona ita henidia buklet amo Baibel ena hereva ma haida ita gwauraia, bona reana Baibel stadi do ita hamatamaia diba.
2 Bema guna oi ese “Noho Namona—Oi Davaria Diba” buklet maragina oi henia, oi lou henia neganai, inai hamatamaia herevana amo Baibel stadi abia totona oi veria diba. Buklet ena vaira kahana laulauna oi duduia, bena ia dekenai oi gwau:
◼ “Oi ura vaira dinadia dekenai oi bona emu ruma bese taudia ese noho namona do umui davaria diba gabuna dekenai umui noho, a? [Naria do ia haere totona. Bena murinai, buklet oi kehoa paragraf 2 ai.] Ita ibounai be unai ita ura, to taunimanima momo idia laloa do ia vara diba lasi. To unai do ia vara be Dirava ese ia gwauhamatalaia, bona ia havaraia diba.” Isaia 32:17, 18 be paragraf amo eiava Baibel amo oi duahia. Bena oi gwau, tanobada hegegemadai taunimanima momo idia moale bona lalo-maino idia abia badina idia diba gabeai noho namona do idia abia diba. Paragraf 3 amo Baibel ena hereva haida oi kikilaia, bena oi hahedinaraia, bema unai buklet ia stadilaia ena diba do ia habadaia. Bema oi itaia ruma tauna ia ura momokani ia kamonai, hereva ma haida do umui kikilaia totona, nega oi hegaegaelaia do oi lou henia haraga totona.
3 Bema guna “Dirava ese Ita Ia Laloa, Eiava Lasi?” buklet maragina oi henia, lou henia oi karaia neganai, reana inai bamona oi hereva be namo:
◼ “Guna oi lau vadivadi henia neganai, ita kikilaia henanadaina be, Dirava ese ita ia laloa eiava lasi? Oi laloa Dirava ese ita ia laloa bada dainai hisihisi bona dagedage karadia do ia haoredia, a? [Ruma tauna ia haere murinai, buklet oi kehoa paragraf 32 ai, bena oi kiki noho.] Dirava ese inai kara dika tanobadana do ia haorea bona tanobada matamatana do ia karaia, bona ia lalonai kara namo taudia be maino dekenai do idia noho ia gwauhamatalaia. [Salamo 37:11 oi duahia.] Bema Baibel ena hereva ita abia dae bona ena sisiba ita badinaia, oi bona lau be unai tanobada matamatana lalonai mai moale danu do ita mauri noho diba.” Taunimanima dekenai Baibel stadi karaia dalana oi hahedinaraia.
4 Bema guna “Itaia! Lau ese Gau Iboudiai Lau Hamatamataia” buklet badana oi henia, lou henia oi karaia neganai, buklet ena vairana bona murina dekenai ia noho laulauna oi hahedinaraia bena inai henanadai oi henia:
◼ “Oi laloa tanobada goevadaena dekenai ita noho be ia namo, a? [Ruma tauna ena lalohadai oi veria.] Inai laulau be idia torea kava gauna lasi; Baibel ena gwauhamata herevadia dainai ita diba momokani do ia vara. [Apokalupo 21:4 bona Salamo 37:11, 29 oi duahia.] Lau ura oi lau hadibaia edena bamona oi bona emu ruma bese taudia be unai hahenamo do umui moalelaia diba.” Bema oi itaia ruma tauna ia ura kamonai noho, umui kiki noho, bona murinai Baibel stadi karaia totona oi nanadaia.
5 Hereva momokani idia tahua kudou-maoro taudia ita davaria neganai, bema ita lou henidia bona ita durudia idia kamonai herevadia idia badinadia totona, idia dekenai lalokau momokani ita hahedinaraia. Ita dekenai hereva momokani helagadia idia noho, bona ita herevalaidia neganai, ita bona ita idia kamonai henia taudia be hahenamo do ita abia diba ela bona hanaihanai.—1 Tim. 4:16.