Haida Ida Haroro Hebou Karana amo Idia Vara Hahenamodia
1 Oi laloa ma haida ida haroro gaukara umui karaia hebou neganai hahenamo haida do oi davaria, a? Iesu be unai bamona ia laloa. Ena be uma anina be bada bona gaukara taudia be momo lasi, to ia ese hahediba taudia 70 uma dekenai ia siaidia, “rua rua amo” ia siaidia. “Ia be idia edia murina dekenai do ia lao, ia ese do ia lao hanuadia bona gabudia ibounai idia ese do idia lao henia guna,” bona edia haroro gaukara amo hahenamo momo idia davaria!—Luka 10:1, 17; Mat. 9:37.
2 Ma haida ida oi gaukara hebou neganai oi ia hagoadaia. Ita haida be hemarai taudia bona ita diba lasi taudia ita hereva henidia be ia auka. Ta ese ita ia bamoa neganai, reana ita hemarai lasi bona gari lasi dekenai Dirava ena Hereva ita harorolaia diba. Haroro gaukara karaia dalana be ita idia hadibaia, bona ta ese ita ia bamoa neganai, unai ese ita ia durua unai dala amo ita haroro totona. (Her. 27:17) Aonega tauna ia gwau: “Taunimanima rua edia namo ese tamona ena namo ia hanaia.”—Koh. 4:9.
3 Pablisa bona painia idauidau ida oi gaukara hebou be namo. Aposetolo Paulo ida idia haroro hebou taudia haida be Banaba, Sila, Timoteo, bona Ioane Mareko, bona idia haroro hebou neganai hahenamo momo idia davaridia. Hari inai negai danu unai ia vara. Nega daudau lalonai hereva momokani oreana lalonai ia noho tauna ta ida oi haroro hebou, a? Mai aonega danu ia haroro dalana oi itaia neganai, reana unai ese oi ia durua oiemu haroro dalana oi hanamoa totona. Pablisa matamata taudia ida oi haroro hebou, a? Bema oibe, reana idia dekenai oi diba gaudia haida oi hadibaia, bena unai amo oi durudia edia haroro gaukara idia hanamoa bona haroro gaukara idia moalelaia bada totona.
4 Baibel stadi ta oi karaia, a? Bema oibe, namona be elda ta eiava sekit naria tauna ta oi noia oi ia bamoa totona, ani? Iseda Baibel stadi taudia bona elda taudia idia hedavari heheni be namo. Bema elda tauna ta vairanai stadi oi karaia hemaraina oi hemarai, reana ia ese do ia ura karaia, bona ia karaia dalana oi itaia. Murinai, oi gari lasi to oi nanadaia Baibel stadi tauna be edena bamona oi durua diba ia goada ia lao haraga totona.
5 Haida ida oi haroro hebou neganai namona be hagoadaia hereva oi gwauraia. Teritori oi gwauraia dika lasi. Taunimanima dekenai oi udu-mauri lasi eiava kongregesen ena gaukara do oi maumauraia lasi. Namona be emu hesiai gaukara bona Iehova dekena amo oi davaria hahenamo oi laloa noho. Bema unai bamona do oi karaia, oi bona oi idia bamoa taudia be ruma dekenai umui giroa lao neganai, lauma dalanai umui goada.
6 Reana oi be dala lasi tadikaka bona taihu ida hanaihanai umui haroro hebou totona. To, namona be nega oi atoa pablisa ma ta ida do umui haroro hebou totona, ani? Unai neganai umui ruaosi be hahenamo do umui davaria!—Roma 1:11, 12.