Painia Taudia ese Ma Haida Idia Durua
1 Iesu ia gwau: “Uiti anina be ia momo herea vadaeni, to utua taudia be momo lasi. Unai dainai uma biaguna dekenai do umui noinoi, ia ese utua taudia haida do ia siaia, iena uiti do idia utua.” Aposetolo edia negai idia noho uiti utua taudia be momo lasi bona edia teritori be bada dainai, Iesu be idia ta ta ia siaia diba, taunimanima momo herea dekenai sivarai namona idia herevalaia totona. To unai bamona ia karaia lasi, “rua rua dekena amo ia siaia.” (Luka 10:1, 2) Dahaka dainai rua rua amo ia siaidia?
2 Idia be hahediba matamatadia bona diba maragi taudia. Idia gaukara hebou neganai, ta ta amo diba idia abia bona idia hagoadaia heheni diba. Solomona ia hereva hegeregerena, “tau rua ese tau tamona idia hereaia.” (Had. 4:9, 10) Pentekoste 33 C.E. ai, lauma helaga idia abia murinai, Paulo, Banaba, bona ma haida be haroro gaukara lalonai edia tadikaka idia bamoa. (Kara 15:35) Idia haida be unai diba bada tatau amo diba idia abia be hahenamo badana ta!
3 Hadibaia Gaukara Namona Ta: Aposetolo edia negai ia noho kongregesen hegeregerena, hari inai negai ia noho Keristani kongregesen be haroro gaukara oreana. Ia ese ita ia hadibaia danu. Namona be ita ta ta be mai eda lalona ibounai ida ita ura dala namona ai sivarai namona do ita harorolaia. Pablisa ma haida be edia haroro dalana idia hanamoa totona, heduru ia noho.
4 Vanegai idia karaia Basileia Haroro Sikuli dekenai, Society ese painia taudia be haroro gaukara lalonai ma haida idia durua gaukarana ta idia herevalaia. Unai gaukara be mai anina bada, a? Oibe. Idia hanaia laganidia toi lalonai pablisa taudia milioni ta mai kahana be bapatiso idia abia, bona namona be idia momo be heduru idia abia haroro gaukara dekenai anina namona idia havaraia totona. Daidia ese unai heduru idia henia diba?
5 Ful-taim painia taudia ese heduru idia henia diba. Iehova ena orea be sisiba bona hadibaia herevadia momo herea ia henidia. Painia Gaukara Sikuli ai, painia taudia ese hadibaia herevadia idia abia edia manoka gaudia idia hanamoa totona. Danu, sekit bona distrik naria taudia ida idia hebou negadia ai, bona danu elda taudia edia hakaua herevadia amo, heduru idia abia. Ena be painia taudia iboudiai edia diba be Paulo bona Banaba edia hegeregerena lasi, to idia be mai anina bada hahediba idia abia vadaeni bona idia ura haida dekenai unai idia herevalaia.
6 Daidia be Namo Do Idia Davaria? Pablisa matamata taudia eiava bapatiso matamata taudia sibona ese unai gaukara matamatana amo heduru do idia abia, a? Lasi momokani! Matamata bona buruka taudia haida ena be lagani momo lalonai hereva momokani idia diba, to idia ura haroro gaukara ena kahana haida dekenai heduru idia abia. Haida be buka bona magasin hariharilaia gaukarana idia karaia namo herea, to idia dekenai lou henia karaia eiava Baibel stadi hamatamaia gaukarana be ia auka. Ma haida be Baibel stadi idia hamatamaia diba, to idia itaia edia stiuden taudia be idia goada idia lao lasi. Dahaka ese idia ia koua? Reana idia manada vadaeni painia taudia do idia noia unai gaudia dekenai heduru idia henia totona. Painia taudia haida be dala namodia ai ruma tauna ena lalona idia veria, Baibel stadi momo idia hamatamaia, bona stiuden matamata taudia be orea dekenai idia hakaua mai. Unai gaukara matamatana ai edia diba be heduru gauna namona.
7 Oiemu sediual ese oi ia koua dainai kongregesen ena haroro grup idauidau dekenai oi lao diba lasi, a? Pablisa ma haida be idia hegeregere lasi oi ida idia gaukara totona neganai, reana painia tauna ta be do ia hegeregere.
8 Gaukara Hebou Karana Namona be mai Anina Bada: Lagani ta ta ai, nega rua elda taudia be heduru idia ura abia taudia totona palani do idia karaia Painia Taudia ese Ma Haida Idia Durua gaukarana amo heduru do idia abia. Bema unai bamona heduru oi abia dae, namona be oi ia durua totona idia abia hidi painia tauna oi hereva henia. Haroro gaukara totona sediual namona umui karaia, bena oi badinaia. Umui abia hidi negana ta oi reaia lasi. Umui gaukara hebou neganai, sivarai namona harorolaia dala namodia oi itaia namonamo. Oi tahua dahaka dainai hereva hamatamaia daladia haida be namo idia havaraia. Painia tauna ese emu hereva dalana oi hanamoa totona ia henia heduru herevadia oi laloa namonamo. Oi dibaia gaudia oi badinaia neganai, oi bona taunimanima ma haida do idia itaia haroro gaukara dekenai oi goada oi lao. (1 Timoteo 4:15 itaia.) Dala ia noho negadia ibounai lalonai umui gaukara hebou, haroro gaukara ena dala idauidau umui karaia, nega bona gabu idauidau haroro gaukarana danu, to heduru oi ura abia kahana dekenai oi gaukara goada.
9 Haroro naria tauna ese haroro gaukarana dekenai do oi goada oi lao karana ia laloa bada. Nega haida, ia be Kongregesen Buka Stadi naria tauna do ia hereva henia badina ia ura itaia edena bamona inai gaukara matamatana ese oi ia durua noho. Sekit naria tauna be unai hegeregerena oi do ia durua, kongregesen ia vadivadi henia neganai.
10 Iehova ia ura ena taunimanima be diba idia abia bona idia be ‘hegeregere momokani, vadaeni kara namodia ibounai do idia karaia diba.’ (2 Tim. 3:17) Namona be ita laloa Painia Taudia ese Ma Haida Idia Durua gaukarana be heduru namona idia ura edia haroro gaukara idia hanamoa taudia dekenai. Bema unai gaukara dekenai oi vareai diba, namona be mai tanikiu bada ida, bona mai manau bona moale ida unai oi karaia.