Sibona Ena Stadi—Laloa Bada Gauna
1 Dahaka gau idauidau ita lalodia bada? Iehova ita tura henia matamaia bona unai tura henia karana ita naria bona ita laloa bada momokani be namo. Unai hetura habadaia karana dekenai, ita sibona eda stadi be mai anina bada. Hari, ita momo lasi be nega tamona ai nega bada herea ita henia diba gau ta ita lalohadailaia o sibona eda stadi ita karaia totona. To, bema dina iboudiai Dirava ena Hereva ita duahia lasi, do ita manoka ela bona iseda goada do ia hegeregere lasi bena tanobada ena lauma bona tauanina ena ura dikadia do ita dadaraia diba lasi.
2 Iena Hereva Umui Ura Henia: Dirava ena palani ita dibaia matamata neganai, iseda diba habadaia urana ia bada. To nega ia heau noho lalonai, sedira lauma aniani dekenai iseda hitolo be ia maragi ia lao. Namona be lauma aniani ‘ita ura henia’ matamaia. (1 Pet. 2:2) Edena bamona unai ura ita havaraia diba?
3 Ita ura momokani aniani gauna ena bonana ita kamonai dainai hitolo hemami do ia havaraia, gau gunadia ita lalodia lou dainai. Lauma dalanai, nega kwadogi lalodiai sibona eda stadi karana be unai hegeregerena. Mai digara lauma aniani sisina ita moalelaia dainai, hereva momokani ena dobu gaudia dekenai iseda hitolo do ia habadaia. Diba abia karana ena moale be ita do ia hagoadaia Iehova ena Hereva ita stadilaia goadagoada totona.
4 Oi Dekenai Ia Hegeregere Sediual Namona Havaraia: Haida ese adorahi ta idia makaia sibodia edia stadi karaia totona, bona ma haida idia ura idia kwadogi stadi negadia sisina momo idia makaia. Bema daba momokani dekenai oi laloa namonamo diba, reana daba aniani oi do abia lasi neganai oi stadi be namo. Bema hanuaboi ai oi laloa namonamo diba, reana oi do mahuta lasi neganai do oi stadi. Herevana edena nega oi abia hidi, oi dekenai ia hegeregere sediual namona hanaihanai oi badinaia be gau badana.
5 Ita idia hagoadaia sibona eda stadi karana ita habadaia neganai, reana kara haraga do ita gwau iseda sediual ia honu vadaeni. To, ita ibounai be iseda nega gaukaralaia dalana ita laloa maoromaoro. Dina ta ta ai, TV ena program ita itaia dainai, hora momo ita haorea, a? Iseda ura gaudia haida do ita bouboulaia bamona, a? Iseda nega haorea dalana ita laloa namonamo neganai, reana do ita itaia, dina ta ta ai nega sisina ita gaukaralaia namonamo diba sibona eda stadi karaia totona.—Ef. 5:15, 16.
6 Dirava ena Hereva ita stadilaia neganai, ia sibona ita laloa be maoro. Bema nega tamona ai ita stadi bona ma gau ta ita karaia toho, stadi ena namo ibounai do ita davaria lasi. Bema aniani, reidio kamonai henia, eiava TV itaia negadia ai nega tamona ita ura ita stadi, ita stadilaia gaudia do ita laloa diba lasi mai iseda lalona ibounai ida. (1 Tim. 4:15) Unai dainai, iseda lalona idia veria oho gaudia iboudiai ita koua be namo.—Haroro School Ena Buka, rau 10-12 itaia.
7 Dina ta ta ai, stadi bona Baibel sisiba badinaia karadia be mai anina bada, badina unai amo Iehova ese ita ia hakaua. Namona be emu tahua gauna be inai: pepa dekenai idia printaia hereva momokanidia be emu lalona dekenai do oi atoa. Ena be reana nega sisina sibona ia noho, to nega ta oi reaia lasi; hanaihanai lauma gaudia oi duahia, oi riviulaia, bona mai emu lalona ibounai ida oi lalohadailaia.—Deut. 6:6-8; Kol. 1:9, 10.