Gau Momo Idia Henia—Gau Momo Idia Tahua
1 Hereva momokanina ita abia be hahenamo badana ta! Iehova dekenai iseda mauri ita gwauhamatalaia dainai, sivarai namona ia henia ita dekenai. (1 Tes. 2:4) Iseda maduna ia habadaia unai. Iesu ia gwau: “Gau momo ia dekenai do idia henia tauna dekena amo, be gau momo do idia tahua.”—Luka 12:48b.
2 Unai hereva be momokani! Dirava ena Hereva ita diba, tadikaka oreana namona lalonai ita noho, bona helaro namo hereana ta ita abia dainai, ita gwau diba gau momo ita idia henia. Vadaeni, ita dekena amo, gau momo do idia tahua.
3 Maduna Ita Laloa Maoromaoro: Haida idia laloa ita amo gau momo idia tahua be maoro lasi. Iesu be Keristani kongregesen ena kwarana dainai, ia heau namonamo totona “ta ta edia gaukara” be dahaka ia ese ia gwauraia. (Ef. 4:15, 16) Ita ia hadibaia, ‘iena huaia auna be ia metau lasi, bona huaia neganai danu hekwarahi lasi.’ (Mat. 11:28-30) Mai lalokau ida taunimanima edia noho ia laloa. (Luka 21:1-4) Bema iseda gau namodia ita henia, herevana idia be momo eiava lasi, hahenamo do ita abia.—Kol. 3:23, 24.
4 Oi sibona oi nanadaia, ‘Basileia gaukarana be gau ginigunana egu mauri lalonai, a? Egu nega bona kohu gaukaralaia dalana be Dirava ena ladana ia hanamoa bona taunimanima ia durudia, a? Moale bada lau davaria Iehova hesiai henia karana amo, eiava mai mataganigani ida tauanina gaudia moalelaia karana amo?’ Unai henanadai edia haere korikoridia ese iseda lalona idia biagua gaudia do idia hahedinaraia.—Luka 6:45.
5 Hedibagani Dadaraidia: Hari idia noho hedibagani idauidau, mataganigani, sibona laloa, bona lebulebu ura henia karadia be guna inai bamona lasi. Dina ta ta iboudiai iseda kara maorona idia tohoa, idia lalo-rua havaraia hedibaganidia amo. Unai hedibagani karadia ita hanaia totona, Iehova amo heduru ita noia be gau badana. (Mat. 26:41) Ena lauma amo, ita ia hagoadaia diba. (Isa. 40:29) Dina ta ta ibounai Dirava ena Hereva ita duahia be heduru badana. (Sal. 1:2, 3) Sibona ena ura biagua bona koua karadia be gau badadia danu.—1 Kor. 9:27.
6 Namo ita lalokau henia sibona be hegeregere lasi—dika ita inai henia danu be gau badana. (Sal. 97:10) Anina be gau dikadia ura henia mamina ita habadaia lasi. Aonega Herevadia 6:16-19 ese Iehova ia inai henia gaudia 7 ia gwauraia hedinarai. Vadaeni, ia ura Iehova ia hamoalea tauna be unai gaudia do ia inai henia danu. Hahenamo ita davaria badina hereva momokani ena diba maorona ita abia. Unai dainai, namona be ita ura iseda kara be unai diba hegeregerena, bona gau namodia sibona ita lalodia noho.
7 Ita guriguri iseda noho be do ia hegeregere “Lohiabada ena gaukara do [ita] karaia goadagoada” totona be maoro. (1 Kor. 15:58) Iehova ena hesiai gaukara lalonai idia bisi bada herea bona anina lasi gaudia idia tahua totona nega be lasi dainai, taunimanima momo idia laloa unai ese ia naridia.
8 Ita itaia diba, Iehova ese ita amo ia tahua gaudia be auka momokani lasi. (Mika 6:8) Hesiai gaukara ita abia be iseda moale ena badina. (Ef. 5:20) Unai dainai ita “hekwarahi bona ita hisihisi noho,” bona ita diba, do ita abia ahuna be ita amo idia tahua gaudia edia bada ia hanaia momokani.—1 Tim. 4:10.