Mai Eda Ura ida Gaukara Namodia Do Ita Karaia

¹ Buka ta be Iehova ena Witness taudia ia herevalaia, ia gwau: “Iehova ena Witness taudia be gaukara bada herea idia karaia edia orea lalonai, orea ma ta ena memba taudia be idia hegeregerena lasi.” Dahaka dainai Iehova ena Witness taudia be idia gaukara goada bona mai edia ura ida idia karaia?

² Badina ta be, idia diba nega ia kwadogi. Iesu be tanobada dekenai ia gaukara neganai, ia diba ena gaukara negana be mai ena dokona. (Ioa. 9:4) Hari, Dirava ena Natuna be ena inai taudia bogaragidiai ia kwalimu negana lalonai, Iehova ena taunimanima idia diba edia gaukara negana danu be mai ena dokona. Unai dainai, mai edia ura ida hesiai gaukara helagana idia karaia. (Sal. 110:​1-3) Uiti gogoa taudia ma haida ita abia be namo, bona utua gaukara lalonai ita hesiku lasi. (Mat. 9:​37, 38) Unai dainai, idia ura Iesu ena haheitalai goevana idia tohotohoa, ia be mai ena ura bona mai ena haheauka ida ena gaukara ia karaia.​—Ioa. 5:17.

³ Iehova ena Witness taudia be mai edia kudou ibounai ida Iehova ena gaukara idia karaia ena badina ma ta be, edia orea, tanobada hegegemadai oreana be orea iboudiai amo ia idau. Tomadiho oreadia ma haida idia laloa edia memba taudia be nega bona goada sisina sibona edia tomadiho dekenai idia henia neganai, unai be hegeregere. Idia abia dae herevadia ese edia noho dalana, taunimanima kara henia dalana, bona edia mauri lalonai idia ura karaia gaudia ia haidaua lasi eiava ia haidaua sisina sibona. Abidadama momokanina idia abia lasi dainai, idia ura edia gunalaia taudia ese ‘idia ura henia gaudia sibona do idia gwauraia,’ idia ura idia gwau edia tomadiho karana be namo. (Isa. 30:10) Idia hamoaledia totona, pasto taudia be “unai taudia idia ura kamonai gaudia sibona” idia gwauraia, bona unai dainai edia memba taudia be tomadiho idia laloa bada lasi bona lauma dalanai idia lahedo.​—2 Tim. 4:3.

⁴ Iehova ena Witness taudia be idau herea! Iseda tomadiho karana ita goadalaia, ita lahedo lasi, ita gaukara. Dina ta ta ai, iseda kara ibounai amo, iseda abidadama ita hahedinaraia. Hereva momokani ese ita ia hamoalea, to “mai gari danu” ita hekwarahi ena oda do ita hagugurua totona. (1 Tesalonika 2:2 itaia.) Mauri durua gaudia abia ena maduna idauidau ese taunimanima momo edia nega ibounai ia ania diba. To, unai lalo-hekwarahi ese iseda Basileia atoa guna karana do ia koua lasi.​—Mat. 6:33.

⁵ Iehova ena hesiai gaukara be mai anina bada bona nega ia kwadogi dainai, ita ura lasi iseda nega ita ‘haorea kava’ to unai nega be lauma gaudia tahua totona ita gaukaralaia. (Ef. 5:16) Dirava badinaia karana bona mai eda ura ida Iehova ena gaukara ita karaia karana amo ia ita hamoalea, unai be iseda gaukara do ita goadalaia ena badina hereadaena. Hari, bona gabeai, hahenamo namodia do ita abia dainai, Basileia totona ita ura “ita hekwarahi bona ita hisihisi noho”​—1 Tim. 4:10.

⁶ Dirava Badinaia Bona Sibona Ena Ura Dadaraia Karadia: Taunimanima momo be edia mauri lalonai kohu bona edia ura gaudia idia atoa guna. Idia laloa bada gaudia be, dahaka do idia ania, inua, eiava dahaka dabua do idia atoa. (Mat. 6:31) Mauri gaudia idia abia dainai idia moale lasi, idia ura idia taga bena idia gwau diba, ‘kohu be momo herea, lagani momo ena hegeregerena; lau laga-ani, do lau aniani, do lau inuinu, do lau moale.’ (Luka 12:19) Dubu dekenai idia lao taudia momo idia laloa bema dubu ese ia hamaorodia idia gaukara goada ia totona, unai be maoro lasi. Edia ura gauna o kohu idia reaia eiava dadaraia lalohadaina idia inai henia. Idia laloa edia ura be gau badana dainai, idia dekenai sibona edia ura dadaraia lalohadaina be momokani lasi, idia laloa do idia karaia diba lasi gauna.

⁷ Iseda lalohadai be idau. Dirava ena Hereva ese iseda laloa dalana ia hanamoa bona Dirava ena lalohadai ita laloa to taunimanima edia ita laloa bada lasi. (Isa. 55:​8, 9) Iseda tahua gaudia be tauanina gaudia lasi. Guba bona tanobada ai, Iehova ena lohia siahuna hamomokania bona ena ladana hahelagaia be mai edia anina bada herea karadia. Unai kara ruaosi edia anina be bada momokani dainai, bema bese ibounai ida oi hahegeregerea, idia “be gau ta lasi Lohiabada ena vairanai.” (Isa. 40:17) Dirava ena ura dadaraia karadia iboudiai be kavakava karadia.​—1 Kor. 3:19.

⁸ Ena be kohu ita abia be namo bona haida be iseda Basileia gaukara lalonai do ita gaukaralaia, to ita diba idia be anina bada lasi gaudia sibodia. (Fil. 1:10) 1 Timoteo 6:8 ena sisiba ita badinaia bona kohu ita tahua goadagoada lasi bona mai aonega ida iseda lalona do ita hadaia ‘matana dekenai ita itaia lasi to nega hanaihanai do idia noho gaudia’ do ita laloa guna.​—2 Kor. 4:18.

⁹ Dirava ena lalohadai ita laloa badabada neganai, kohu do ita lalo-hekwarahilaia momo lasi. Ita dainai ia karaia vadaeni gaudia, bona ia gwauhamatalaia hahenamodia ita laloa neganai, dahaka ia ura ita dadaraia do ita dadaraia. (Mar. 10:​29, 30) Ia dainai ita noho. Bema ia be hebogahisi bona lalokau lasi Diravana, hari iseda mauri bona mauri gabena do ita moalelaia lasi. Unai dainai mai iseda ura ida ita gaukara, badina be iena hesiai gaukara lalonai ita karaia gaudia ibounai be ‘iseda gaukara sibona,’ gau idauna ta lasi. (Luka 17:10) Iehova ese ia noia gaudia ita henia mai moale ida, ita diba ‘anina momo do ita geia.’​—2 Kor. 9:​6, 7.

¹⁰ Harihari Gaukara Idia Ura Karaia Taudia Idia Tahua: Keristani kongregesen ia matamaia negana amo, gaukara badana negana lalonai ia vareai. Ierusalema be lagani 70 C.E ai ia do moru lasi neganai, haroro gaukara idia karaia namonamo be namo. Unai nega ai, Iesu ena hahediba taudia be ‘nega ibounai idia haroro goada noho.’ (Kara 18:5) Orea ia tubu daekau haraga dainai, haroro idia karaia diba taudia, bona naria taudia idia hadibaia bona edia heduru idia noia. Edia ura be gavamani taudia ida herevahereva idia manadalaia vadaeni tatau bona diba bada taudia be kongregesen ena moni abia bona haria gaukarana idia karaia; unai bamona taudia idia ura davaria. (Kara 6:​1-6; Ef. 4:11) Haida sibona ita diba, momo edia ladadia ita diba lasi. To idia iboudiai be idia “raka goada,” mai lalo-tamona bona mai lalona ibounai ida, unai gaukara haorea totona.​—Luka 13:24.

¹¹ Ena be unai nega lalonai bona lagani handred momo murinai, tanobada hegegemadai lalonai idia haroro lasi, to Basileia gaukara haginia lou negana be lagani 1914, Iesu be ena King dagina ia abia negana. Guna, idia diba lasi Basileia ena gaukara do ia bada herea bona gaukara taudia do idia tahua neganai, tanobada hegegemadai taunimanima milioni haida do idia durua.

¹² Hari iseda nega lalonai, iseda orea be gaukara idauidau momo idia karaia noho dainai, ena kohu moni, kahirakahira ibounai idia gaukaralaia. Basileia gaukara be ia bada ai ia lao. Nega dokona ia ore gwauraia dainai ita ura ita hekwarahi bada bona iseda imana dekenai ia noho kohu ita gaukaralaia unai gaukara hagugurua totona. Inai tanobada dikana ena oromana ia ore gwauraia dainai, ita diba iseda gaukara do ia bada ia lao. Iehova dekenai idia gwauhamata bona bapatiso hesiai taudia ibounai e, mai emui ura bada ida inai haboua gaukarana lalonai oi vareai.

¹³ Dahaka Ita Karaia be Namo? Hari ita gwau “nega ibounai Lohiabada ena gaukara do umui karaia goadagoada” be namo badina gaukara momo ia do noho. (1 Kor. 15:58) Teritori momo lalodiai uiti ena anina abia negana ia ginidae, to utua taudia be momo lasi. Namona be iseda kahana ita karaia sibona lasi, to iseda teritori lalonai haroro gaukara ita karaia neganai, taunimanima ibounai ita haroro henia namonamo, bona tadikaka be momo lasi gabudia ai ita lao bona ita haroro danu.

¹⁴ Ai moale badina tanobada hegegemadai Witness taudia be mai edia ura ida gaukara idauidau idia karaia. Haida be volantia gaukara idia karaia; tomadiho gabudia haginia, hebouhebou ena gaukara, dika bada herea ia vara negadia ai, Kingdom Hall hagoevaia negadia ai, idia lao bona idia durua. Kingdom Hall hagoevaia gaukara ita kikilaia neganai, namona be hanaihanai hebou ia ore murinai, ia goeva bona ena gau ibounai be edia gabu korikoridia dekenai ita rakatania. Unai bamona gaukara taunimanima momo idia ura lasi gaukarana, ita karaia neganai, ita hahedinaraia Iesu ena hereva Luka 16:10 ai ena anina ita lalo-pararalaia: “Gau maragina ia karaia maoro tauna ese gau badadia do ia karaia maoro, to gau maragina ia karaia kerere tauna ese gau badadia do ia karaia kerere danu.”

■ Kongregesen Ena Gaukara Oi Durua: Ena be kongregesen ta ta be orea ena kahana ta bona “Hesiai tauna mai ena kamonai, bona mai ena kara maoromaoro” amo hakaua herevadia idia abia to ita diba kongregesen be Basileia pablisa amo idia karaia. (Mat. 24:45) Witness ta ta edia ura bona dahaka idia karaia diba ese edia kongregesen ena gaukara hagugurua dalana ia hanamoa o ia hamanokaia. Kongregesen ena teritori lalonai sivarai namona harorolaia, hahediba taudia matamata halaoa, bona ia hagoadadia gaukara do ia atodia guna. Ita ibounai be unai gaukara lalonai kahana ta ita abia diba. Tahua gaudia ita atoa; siboda eda stadi karana lalonai, hebou lalonai haere namodia henia, iseda kongregesen lalonai idia noho manoka taudia ita durudia. Unai gaudia ese dala ia kehoa iseda ura ita hahedinaraia totona.

■ Naria Dagina Idia Abia Taudia Idia Hakaua: Iehova ese kongregesen ta ta ena naria gaukara be elda taudia dekenai ia henia. (Kara 20:28) Unai tatau be idia gaukara goada do idia hegeregere unai hahenamo abia totona. (1 Tim. 3:1) Kahirakahira kongregesen ena tadikaka iboudiai ese gaukara ma haida do idia karaia diba bema idia tahua. Lauma dalanai tadikaka momo idia goada idia lao bona kongregesen ena elda taudia be mai lalokau ida idia idia hakaua bona durua noho. Namona be unai tatau ese Baibel bona Baibel idia herevalaia bukadia idia stadilaia namonamo. Lauma helaga ena heduru amo idia abia hidi elda taudia idia kamonai henia, bona edia abidadama, bona edia naria karadia namodia idia tohotohoa neganai, idia hahedinaraia idia ura bada gaukara idia karaia.​—Heb. 13:​7, 17.

■ Ful-taim Gaukara Idia Karaia: Kongregesen ena badina badana be sivarai namona harorolaia. (Mat. 24:14) Mai edia goada ida haroro gaukara idia karaia taudia be painia gaukara idia hamatamaia neganai, unai be hahenamo badana! Nega momo edia mauri ena heau dalana idia haidaua unai idia karaia totona. Idia karaia noho totona, ma gau haida idia haidaua danu be namo. Lagani ta murinai, edia painia gaukara lalonai reana hekwakwanai haida idia davaria to idia hekwarahi noho taudia ese Iehova ena hahenamo do idia mamia. Mai edia lalokau elda taudia bona lo tadikaka be edia hereva o edia kara amo painia taudia idia hagoadaia diba. Sikuli ia ore murinai, ura namona idia hahedinaraia matamata taudia be maoromaoro painia gaukara idia karaia. Unai lalohadai namona idia hedinaraia lo taudia haida danu, edia gaukara ia bada lasi neganai, idia be regula painia gaukara idia karaia. Ia gwauhamata vadaeni Keristani tauna be Iehova ese gogoa gaukara ia haharagaia negana lalonai ia durua neganai, ia moale bada!​—Isa. 60:22.

■ Hebou Gabudia Haginia Bona Hanamoa Gaukarana: Kingdom Hall bona Assembly Hall handred momo idia haginia vadaeni. Ita hoalaia gauna be inai: kahirakahira gaukara ibounai idia karaia taudia be edia diba bona nega idia henia tadikaka bona taihu ese idia karaia. (1 Siv. 28:21) Mai edia ura ida gaukara namodia idia karaia taudia tausen tausen ese unai ruma idia hanamodia bona herevana dahaka gaukara idia abia, unai gaukara idia haorea. (2 Siv. 34:8) Unai be edia hesiai gaukara helagana ena kahana ta, mai edia ura ida idia gaukara, moni idia noia lasi, hegeregere edia ruma-ta-ruma-ta gaukara, pablik haroro kongregesen lalonai, hebouhebou, o distrik hebouhebou gaukara totona, moni idia noia lasi danu. Unai volantia taudia be Iehova hanamoa totona unai tomadiho rumadia edia palani bona haginia gaukara idia karaia sibona. Gavamani pepadia idia hahonua, akauns idia karaia, ruma haginia gaudia idia haboua, dahaka do idia gaukaralaia idia lalohadailaia. Mai edia kamonai ida Iehova idia hesiai henia taudia be edia gaukara amo moni o kohu idia tahua lasi badina edia diba bona edia goada be Iehova dekenai idia gwauhamatalaia vadaeni. ‘Mai edia kudouna ibounai’ ida Iehova dainai idia gaukara taudia sibodia idia karaia diba.​—Kol. 3:23.

¹⁵ Dahaka dainai ita gwau diba Iehova ena taunimanima edia lalona be hegeregere gaukara karaia totona bona unai be idau? Ia be edia henia lalohadaina. Edia moni bona kohu idia harihari bada sibona lasi​—“mai edia ura” ida sibodia idia henia. (Sal. 110:3) Unai be iseda gwauhamata Iehova dekenai ena badina badana. Dala idauna ta amo ahuna do ita abia. Iseda “moale” do ita habadaia bona “anina momo” do ita geia badina ma haida ese iseda gaukara do idia laloa bada, bena gau haida ita dekenai do idia henia. (Kara 20:35; 2 Kor. 9:6; Luka 6:38) Ita do ia Harihari Henia Bada Tauna be iseda guba Tamana, Iehova; ia ese ‘mai moale danu ia henia tauna ia lalokau henia.’ (2 Kor. 9:7) Nega handred handred amo ita do ia hanamoa, bona unai hahenamo do idia noho ela bona hanaihanai. (Mal. 3:10; Roma 6:23) Bema Iehova ena hesiai gaukara lalonai hahenamo ta ia noho, mai eda ura ida do oi volantia bona Isaia hegeregerena inai bamona do oi haere: “Lau be inai, do lau lao! Lau do oi siaia,” a?​—Isa. 6:8.