Gau Ibounai Lalonai Dirava Hanamoa
1 Iseda lalokau tadikaka bona taihu ida ita hebamo be namo herea! (1 Kor. 16:17, 18) Iseda kongregesen hebou, hebouhebou badadia bona maragidia, bona haroro gaukara dekenai unai ita karaia. Bona hebou lasi negadia danu ita hebamo, iseda ruma ai vadivadi taudia idia mai neganai. Unai ita karaia neganai, heabidae karana ita hahedinaraia bona ita hagoadaia heheni. (Roma 12:13; 1 Pet. 4:9) Headava ena aria hegaegaelaia neganai, namona be Gima Kohorona, January 1, 1985 ena sisiba laloatao.
2 Moale Karadia: Ita ‘aniani o ita inuinu, o dahaka dahaka ita karaia neganai’ namona be ‘gau ibounai ita karaia Dirava hanamoa totona.’ (1 Kor. 10:31-33) Haida be inai sisiba idia badinaia lasi, bona moale karadia dekenai taunimanima momo idia lao bona idia naridia namonamo lasi dainai hekwakwanai idia vara. Namo lasi headava aria be tanobada taudia edia kara bamona, idia be Baibel ese ia gwauraia kara goeva bona ena hakaua herevadia idia badinaia lasi.—Roma 13:13, 14; Ef. 5:15-20.
3 Hutuma bada naria namonamo be auka dainai, hemataurai lasi karadia, inuinu kekero, bona kara bodaga idia vara danu. (Ef. 5:3, 4) Moale karadia dekenai unai bamona idia vara be Iehova idia matauraia lasi. To, unai ese kongregesen ena ladana namona idia hadikaia bona haida ia hamanokaia. (1 Kor. 10:23, 24, 29) Bema iseda moale karadia, hegeregere headava ariana be ‘6 ela bona 6’ hanuaboi ibounai disko, tanobada mavaru danu, miusiki regena bada herea, bona keristani lasi karadia idia vara, madi unai be dika momokani.
4 Keristani taudia ese heabidae karana idia hahedinaraia be namo, to unai kara lalonai hahegoada heheni karana be gau badana. (Roma 1:11, 12) Moale karadia maragidia be namo herea. Iseda Hesiai Gaukara bukana rau 135-6 dekenai ia gwau: “Nega haida, reana ruma bese haida idia hebou ruma tamona lalonai Keristen ena hebamo karana idia moalelaia totona. . . . Dala namona be, unai hebou idia naria taudia ese unai gabu ai idia vara gaudia idia naridia namonamo, kerere ia vara garina. Unai idia laloa neganai, aonega Keristen taudia ese unai hebou dekenai idia mai taudia edia namba idia habadaia lasi bona unai hebou edia nega idia hadaudaua lasi.” Iesu ia hahedinaraia aniani toana namona be gau badana lasi badina iseda ura be lauma dalanai iseda turadia ita hagoadaia.—Luka 10:40-42.
5 Iseda Keristani tadikaka dekenai heabidae karana ita hahedinaraia be namo herea. To, iseda ruma dekenai hebou karana namona ita karaia be renta rumana dekenai tanobada ena kara ia badinaia moale karana amo ia idau momokani. Oi ese haida oi boridia neganai, namona be grup ena namba be hegeregere oi naria namonamo totona.—Gima Kohorona, August 15, 1992, rau 17-20 itaia.
6 Momokani, Iehova ese ita ia hanamoa badina iseda tadikaka oreana amo goada ita abia diba kara namo ita hahedinaraia noho totona. (Mat. 5:16; 1 Pet. 2:12) Iseda moale karadia lalonai ita kara namo bona laloa namonamo karana ita hahedinaraia neganai, nega ibounai Iehova do ita hanamoa bona haida do ita durudia.—Roma 15:2.