Distrik Bona Sekit Hebouhebou Gaukaradia Haharagaia Daladia
1 Lauma ariadia ita moalelaia, ani, herevana idia be kongregesen heboudia ai, sekit hebouhebou ai, dina-tamona hebouhebou ai, eiava distrik hebouhebou ai! Badina be dahaka? Badina be Dirava garina idia gari taudia ida ita hebou negadiai unai ese ita ia hagoadaia, bona lauma gaudia idia herevalaia dainai mai anina bada gaudia ita laloa.
2 Vanegai laganidia lalonai, taunimanima tausen tausen ma haida be unai lauma ariadia dekenai idia mai. Lagani 1985 ai, tanobada hegegemadai kongregesen iboudiai be 49,716, to lagani 1994 ai idia be 75,573, anina be unai lagani padadiai, kongregesen edia momo be 50 pesen amo ia bada. Iehova ese taunimanima gogodia gaukarana ia haharagaia, unai dainai unai hegeregerena distrik hebouhebou bona sekit hebouhebou ma momo be tanobada hegegemadai idia karaia. (Isa. 60:22) Papua New Guinea ai, distrik hebouhebou 14 be lagani 1994 bona 1995 ai idia karaia, bona hebou taudia iboudiai be 8,953. Unai hebouhebou hegaegaelaidia bona naridia gaukarana be ia bada ia lao. Ita hebou ena badina be lauma anianina ena namo do ita abia totona, unai dainai aonega karana be taunimanima momo lasi be unai hebouhebou ai do idia gaukara iseda tauanina durua gaudia naria totona.
3 Kara Ma Haida: Iehova ena hahenamo dainai gaukara ia bada ia lao, bona ita moale badina be ia ese aonega bona lalo-parara be ena orea taudia ia henidia, unai gaukara do idia karaia totona. Ita diba hesiai tauna mai ena kamonai oreana amo, Iesu Keriso ese unai gaukara ia biagua namonamo, Iehova ena palani do ia guguru totona. (Mat. 24:45-47; Kol. 1:9, 10) February 15, 1995, ena Gima Kohorona ena hereva hegeregerena, lagani 1995-96 ena distrik hebouhebou be gabu 9 sibodia dekenai do idia karaia. Bona, elda taudia ai idia dabu gabudia dekenai sekit edia momo ai hadihoa, unai dainai hari sekit ibounai be 9 bona sekit hebouhebou edia namba danu ia diho. Unai dainai, pablisa taudia iboudiai ai hagoadaia, edia gabu amo ia kahirakahira gabuna dekenai do idia karaia hebouheboudia lao henidia dalana do idia tahua goadagoada. Unai amo idia ese hadibaia karana idia manadalaia elda taudia edia hahediba namona amo namo do idia davaria, bona tadikaka momo edia hebamo ese edia abidadama do ia hagoadaia. (Neh. 8:8; Heb. 10:25) Momokani, inai ese haida edia hekwarahi do ia habadaia, to bema edia goada idia henia bona idia palani namonamo, lauma hahenamodia momo do idia abia, bona hebouhebou ese iseda abidadama bona eda hahemauri helarona do idia hagoadaia.—Roma 13:11.
4 Gaukara haharagaia dalana be lagani 1995-96 ena distrik hebouhebou ai do idia hamatamaia; dalana ta be aniani do idia hamaragia, eiava hebouhebou haida ai aniani be lasi. Ai ese umui ibounai ai noia, bema mai dalana ta ta ena aniani ena aniani bona ena inuinu gauna ena inuinu gauna do umui mailaia. Taoni badadia ai reana aniani do idia abia lasi, inuinu gaudia sibodia. Hanua daudaudia ai do idia karaia distrik hebouheboudia dekenai, reana sitoa anianina sisina do idia abia, gabu daudaudia amo do idia mai taudia totona, to aniani do idia nadua lasi. Bema mai dalana, namona be iboudiai ese sibodia edia aniani idia mailaia. Hari amo ela bona December 1995, sekit hebouhebou bona dina-tamona hebouhebou ai, vaia edia kara aniani do idia abia diba. To January 1996 ai, sekit hebouhebou bona dina-tamona hebouhebou dekenai, distrik hebouhebou ai idia karaia karadia do idia badinaia matamaia. Reana oi ura diba inai kara idauna ese dahaka namo do ia havaraia.
5 Idia hanai laganidia lalodiai, taoni badadia dekenai, aniani idia hamaragia sisina. Mauri ena metau bona iseda tadikaka edia maduna idauidau, bona iseda orea ia bada ia lao noho dainai, hebouhebou edia gaukara haida idia haharagaia. Unai idia karaia dainai, hebouhebou dekenai gaukara be bada lasi, unai dainai gaukara taudia be mai edia nega program ena hereva momo do idia kamonaia bona do idia moalelaia. (Deut. 31:12) To dahaka gaukara idia hadokoa diba, bena ma haida ese program ena hereva iboudiai do idia kamonaia diba?
6 Do Idia Haidaua Karadia: Gabu haida dekenai aniani idia hamaragia laganidia lalonai, idia davaria “gau tamona sibona” be hegeregere. (Luka 10:38-42 itaia.) To, hebou taudia iboudiai ese unai gau do idia abia totona, aniani naria taudia ese gaukara bada idia karaia, bona moni bada idia haorea, frisa bona aniani nadua gaudia hoia totona. Inai danu, volantia taudia momo idia gaukaralaia unai gaukara naria bona durua totona.
7 Aniani Dipatmen dekenai idia gaukara volantia taudia edia heduru be mai anina bada bona hebou taudia ese idia moalelaia bada. To, unai gaukara ai haharagaia dainai, guna aniani hoia, hegaegaelaia, bona henia gaukaradia idia karaia volantia taudia ese edia nega do idia gaukaralaia diba, Basileia gaukaradia ma haida totona bona hebou taudia do idia bamodia momo diba. Aniani Dipatmen dekenai guna idia gaukara taudia momo be dipatmen idaudia, hegeregere Atendan bona Hagoevaia gaukaradia edia dipatmen dekenai do idia heduru diba. Unai ese iboudiai edia maduna do ia haharagaia, bena hanuaboi momokani, daba momokani, eiava program negana lalonai, momo do idia gaukara lasi, Aniani Dipatmen dekenai guna momo idia karaia bamona.
8 Dala Matamatana Durua: Lagani momo lalodiai umui tadikaka bona taihu ese distrik hebouhebou gaukaradia, aniani henia karana danu, be umui durua ‘mai emui laloa namo danu,’ bona Association ese emui heduru namona idia moalelaia bada. (1 Siv. 29:9) Emui heduru dainai, hebouhebou gabuna ena davana bona hebouhebou gaudia ma haida edia davana ai karaia diba. Bona, hebouhebou dekenai idia mai taudia be dina tubua ena laga-ani negana kwadogina lalonai hebou gabunai idia noho, aniani idia abia haraga diba, bena idia goada lou, bona adorahi ena program idia kamonaia diba. Ai diba tadikaka bona taihu ese edia kontribusen monidia amo inai hebouhebou do idia durudia noho, guna idia durudia bamona. Kontribusen henia karana amo idia hahedinaraia unai hebouhebou idia moalelaidia.—Aon. 11:25; Luka 16:9.
9 Sibomu Emu Aniani Oi Mailaia: Hebouhebou gaukaradia haida do idia haidaua dainai, namona be dina tubua ena aniani negana totona, hebou taudia ta ta iboudiai ese sibodia edia aniani do idia mailaia be namo. Ita ese program ena lauma anianina ena namo ita laloa bada. Bema ta ese tauanina anianina ia laloa bada bona lauma anianina ia laloa maragi, unai be aonega karana lasi. Gau badana be ita ta ta ibounai ese ‘gau namodia edia toana do ita diba.’ (Fil. 1:9, 10a) Vanegai, Poland, Russia, Ukraine, bona ma gabu haida dekenai, Iehova ena orea taudia edia hebouhebou badadia dekenai aniani idia henia lasi, to unai hebouhebou idia heau namonamo. Bona inai tano ai danu, sekit haida ese edia sekit hebouhebou bona dina-tamona hebouhebou dekenai aniani idia henia lasi. Unai hebouhebou idia lao henidia taudia iboudiai ese sibodia edia aniani idia laohaia. Do ita davaria, bema dina tubua totona aniani sisina mo ita laohaia, iseda darana do idia noga noho, bena adorahi ena program amo namo do ita abia guguru diba. Unai hegeregerena, namona be hebou taudia iboudiai ese aniani haragana, edia tauanina do ia durua anianina idia laohaia. Iesu ese taunimanima hutuma ia ubua neganai, aniani rua sibona, paraoa bona gwarume, ia henidia. (Mat. 14:16-20; ma danu Luka 10:42a itaia.) Vadaeni, dina tubua ena laga-ani negana do ia kwadogi bona iseda hebou gabudia edia oromana dainai, ai ura heduru herevadia haida do ai gwauraia hedinarai.
10 Hebouhebou do idia lao henia taudia bema idia palani namonamo, daba anianina be sibodia edia famili ida do idia ania hebou diba. Hanuaboi ai bema oi mahuta haraga, daba ai do oi toreisi haraga diba, bena emu nega do ia hegeregere daba anianina do oi abia bona nega korikorina ai hebouhebou gabuna ai do oi ginidae, bena hebou taudia do oi hebamo henidia diba.
11 Dina tubua ena laga-ani negana do idia hakwadogia. To, nega do ia hegeregere do oi aniani bona haida do oi hebamo henidia. Iseda tadikaka bona taihu, dina ta ta iboudiai edia ruma do idia lou henia taudia, be mai edia dala sibodia edia ruma ai dina tubua anianina sisina do idia hegaegaelaia edia ruma bese taudia totona, bena do idia laohaia hebou gabuna dekenai. Reana sanwis, au huahuadia, eiava idia nadua vadaeni raisina o uma anianina idia laohaia diba. Taunimanima momo be vaia unai bamona anianidia be edia gaukara gabudia dekenai idia laohaia, dina tubua totona.
12 Momokani, inai dala matamatana dainai, taoni murimurina amo hebou idia lao taudia do idia hekwarahi, to namona be idia palani namonamo guna, dina tubua anianina do idia laohaia totona. Reana idia haida idia laloa au huahuadia eiava uma anianidia do idia hegeregere idia dekenai. Bema unai bamona, sibodia edia ruma amo do idia mailaia diba. Dina tubua ena aniani ma haida be reana hebouhebou idia karaia taonina ena sitoa ta dekenai do idia hoia diba. To, siboda eda aniani be hebouhebou gabuna ita laohaia neganai, namo lasi hebouhebou ena program negana lalonai ita ania eiava ita hegaegaelaia. Hebouhebou gabuna ai bona Association ese ia henia mahuta gabudia ai, namona be hebouhebou naria taudia edia taravatu aniani nadua karana dekenai ita badinaia goevagoeva.
13 Hahenamo Ma Haida: Momokani, inai kara matamatadia edia namo ita lalo-pararalaia. Hebou taudia iboudiai be mai edia dala lauma gaudia edia hahenamo abia karana do idia laloa mai edia lalona ibounai ida—ita hebou ena badina korikorina unai. Unai hahenamo be tadikaka bamodia bona program kamonaia karadia amo ita abidia. Unai dainai, dina tubua ena laga-ani neganai, namona be hebouhebou gabuna ita rakatania lasi aniani abia totona, to ruma amo aniani sisina ita mailaia be namo, bena ita be mai eda dala iseda tadikaka bona taihu do ita hebamo henidia bona adorahi ena program ibounai do ita kamonaia.
14 Unai hebouhebou idauidau ai, buka matamatadia, hahediba herevadia namodia, bona sisiba namona ita abia; unai lauma ariana ita moalelaia bada. Hebou taudia iboudiai ese unai hahenamo bona Dirava ena orea taudia ida idia hebou ena moale idia laloatao. Aonega Herevadia 10:22 ia gwau: “[Iehova] ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.” Unai ia vara badina be ita Iehova ena orea taudia be hebouhebou ita lao henidia negadiai, tauanina durua gaudia ita laloa bada lasi. Ita hebou badina be ita ura momokani lauma dalanai hahenamo bada herea do ita abia, bona iseda lalohadai maorona dainai Iehova ese davana namo hereana be ita ia henia.—1 Tim. 6:6-8; Heb. 11:6.
15 Unai hahegoada negadia dainai, ita ese lauma uitina utua gaukarana ita laloa danu. (Ioa. 4:35, 36) Isaia karoa 54 ena hereva ginigunadia ese Iehova ena orea, ena adavana bamona oreana, idia hamaoroa, mai ena moale ida do ia bada ia lao dainai, do ia hegaegae. Isaia ia peroveta hegeregerena, Iehova ena orea be do ia bada ia lao bona do ia goada ia lao; ia gwau: “Oiemu palai ruma do oi habadaia. Iena varo do oi halataia, bona palai ena ikoko do oi hagoadaia. Badina be oi ese oiemu tano do oi habadaia, kahana kahana dekenai.” Unai peroveta herevana namona ena anina ia vara dainai, tomadiho momokani be hoa dalanai ia bada ia lao momokani, hari ita itaia hegeregerena.—Isa. 54:1-4.
16 Toana be inai kara matamatana, aniani hamaragia karana, do ita badinaia be aonega karana, badina be gaukara do ia bada lasi bona idia hegaegaelaia lauma anianina be hebou taudia iboudiai ese do idia moalelaia diba. Emai helaro be Iehova ese emai kara, sekit bona distrik hebouhebou edia momo hadihoa karana, do ia hanamoa, badina be unai dala amo hebouhebou edia program herevadia edia namo do ia habadaia, bona hebamo namona, inai dina gabedia lalonai ita abia be namo hebamona, do ita abia diba. Ita abia be namo gaudia bema ita laloa, idia totona ita hegaegae dinadia lalonai hebamo namona bona lauma gaudia namodia do ita moalelaia diba. Mai emai momokani ida Iehova ai noia, ia ese iseda hekwarahi iboudiai do ia hanamoa, do ita hebou loulou bona iena pata ai do ita aniani loulou neganai.—Deuteronomi 16:14, 15 itaia.
[Box on page 5]
Aniani Hamaragia Karana Ena Namo
◼ Program vairanai, lalonai, bona murinai, gaukara be bada lasi dainai, hebamo negana do ia bada
◼ Aniani dipatmen kohudia momo lasi do idia naria
◼ Momo ese program ena hereva iboudiai do idia kamonaia
◼ Volantia taudia momo be dipatmen idaudia ai do idia heduru diba
◼ Nega do ia bada tiokratik gaukaradia ma haida totona
Inai Bamona Aniani Oi Mailaia Diba Dina Tubua Totona
◼ Aniani haragadia, emu tauanina do idia durua gaudia
◼ Sanwis, nadua vadaeni gaudia, au huahuadia
Hebouhebou Gabuna ai Inai Gau Oi Mailaia Lasi
◼ Kekero muramuradia
◼ Eski badadia