Oi Durudia Baibel Ena Namo Idia Laloa Bada
1 Iesu ese ena hahediba taudia ia durua. Luka 24:45 ia gwau: “Ia ese Buka Helaga ena anina ia hadibaia idia dekenai, ela bona edia lalona idia kehoa.” Ia diba bema idia ura iena Tamana ena lalo-namo idia abia, gau badana be Dirava ena Hereva, Baibel, idia stadilaia bona idia lalo-pararalaia. (Sal. 1:1, 2) Iseda tahua gauna, ita haroro neganai, be unai. Iseda tahua gauna be Baibel stadi ita hamatamaia, bena unai dala amo ‘Iesu ia henia hereva ibounai be taunimanima dekenai do ita hadibaia.’ (Mat. 28:20) Unai tahua gauna ita laloa noho lalonai, reana inai hereva haida ese oi do idia durua, lou henia namona karaia totona.
2 Bema guna umui ese “Maino bona Noho Namona” buka umui kikilaia, reana inai bamona oi hereva diba:
◼ “Lau ura Baibel ena sisiba ena namo ia haheitalaia gauna ma ta do lau hahedinaraia oi dekenai. Taunimanima momo idia davaria ma haida idia tura henia haraga lasi badina edia kara o edia hereva idia abidadama henia diba lasi. Dahaka ita karaia diba iseda dekena taudia ida iseda hetura karana ita hanamoa totona? [Haere ia henia murinai, Sekaraia 8:16 duahia. Lao rau 114 dekenai, bona paragraf 9-11 ai idia noho lalohadai oi kikilaia.] Unai be Baibel ena sisiba lalonai ia noho aonegana ena haheitalai ma ta. Ma gabeai lau mai neganai, lau ura Baibel ena heduru herevadia, headava taudia be moale bada herea idia davaria dalana, do lau hahedinaraia.” Nega umui abia hidi do oi giroa lou bena rau 145-54 edia hereva do umui kikilaia totona, unai rau dekenai Baibel ena sisiba famili lalonai moale oi davaria dalana oi gwauraia.
3 Bema tau ta oi davaria bona Baibel ia ura henia, to buka o magasin ia ura lasi, reana Baibel stadi hamatamaia totona inai oi tohoa:
◼ “Vanegai iseda herevahereva kwadogina be namo herea, lau moalelaia. Lau moale Baibel ia laloa bada tauna lau davaria diba. Baibel idia laloa bada taudia ida lau kiki neganai, lau itaia gauna be idia iboudiai idia ura maino bona noho namona tanobadana ai idia noho. Bema unai be iboudiai edia ura, dahaka dainai iseda tanobada be daradara bona dagedage amo ia honudae, a? [Haere naria.] Baibel lalonai unai henanadai ena haere do oi davaria.” Korinto iharuana 4:4 oi duahia. Oi hahedinaraia edena dala ai Dirava ese Diabolo do ia hadikaia bona maino bona moale idia noho tanobadana do ia havaraia. Apokalupo 21:3, 4 oi duahia. Bena oi gwau: “Ma nega ta oi do lau vadivadi henia, lau ura inai davana lasi pepapepana, [ruma tauna dekenai ta oi henia.] Daika ese Tanobada Ia Lohiaia? dekenai idia noho siridia haida do ita kikilaia. Ia hahedinaraia dahaka dainai hisihisi be lasi tanobadana dekenai do oi noho diba.”
4 Bema guna oi haroro neganai idia kamonai namonamo, reana oi giroa neganai, oi gwau:
◼ “Vanegai, ita be dahaka dainai Baibel ita stadilaia ena badina haida ita kikilaia. Mai eda ura ida stadi karana ita habadaia neganai, Dirava ena palani ita totona do ita davaria. [Ioane 17:3 duahia.] Ai be Baibel stadi program ta ai karaia bona unai ese taunimanima tausen tausen ia durua Dirava ena gwauhamata bona Ia ita hamoalea dalana idia dibaia totona.” Mauri Hanaihanai bukana hahedinaraia, karoa edia sinado riviulaia, bona Baibel stadi karaia dalana oi hahedinaraia.
5 Bema kudou namo taudia oi durua Dirava ena Hereva ena namo goevadaena idia laloa bada totona, idia oi durua momokani unai. Baibel ena rau amo idia abia aonegana ese “mauri namona, idia dekenai do ia henia” bona moale bada danu.—Aon. 3:18.