Kamonai Taudia be Edeseniai Lau Davaria?
1 Filipi hanuana lalonai, ‘hahine ta ena ladana be Lidia, ena gaukara be dabua kakakaka ia hoia. Hereva ia kamonai bona Lohiabada ese iena lalona ia kehoa, bona ia ese Paulo ia kamonai henia.’ (Kara 16:14) Unai sivarai amo dahaka ita dibaia? Kamonai ese hereva momokani dibaia iduarana do ia kehoa. Basileia ena sivarai harorolaia gaukara lalonai do ita kwalimu lasi bema ruma tauna ia kamonai lasi. Kamonai tauna ita davaria murinai, ia dekenai iseda sivarai ita gwauraia be auka lasi. To nega haida taunimanima idia ura lasi idia kamonai. Dahaka ita karaia?
2 Haroro gaukara ita do hamatamaia lasi neganai, namona be iseda toana bona do ita gaukaralaia gaudia ita laloa. Badina be dahaka? Bema toana namona ita hahedinaraia, taunimanima sisina momo ese iseda hereva do idia kamonai henia. Iseda dabua edia toana be namo bona mai hemataurai ida ita atoa, a? Ena be tanobada taudia momo ese edia toana idia laloa lasi, to namona be ita naria namonamo badina ita be Dirava ena Basileia ena gwaukau taudia. Basileia ena sivarai ita harorolaia neganai, goeva bona toana namona dabuadia ese iseda sivarai do idia hahairaia.
3 Oi Gado Namo Henia Bona Matauraia: Ena be hari iseda nega ai lalohadai be idauidau, to taunimanima momo be Baibel idia laloa bada noho; mai ena hemataurai ida bona mai ena moale toana ida Baibel ia kikilaia tauna do idia dadaraia lasi. Bema ta be moale toana korikorina ia hahedinaraia, ruma tauna ena lalona ia veria bona herevahereva namonamo dalana do ia hamatamaia diba. Mai iseda momokani bona hemataurai ida ita be ruma tauna ita hereva henia bona iena lalohadai ita kamonai henia be gau badana.
4 Iseda tahua gauna be Baibel ena helaro namona ma haida ida ita kikilaia. Unai ita laloa noho dainai, namona be taunimanima edia lalona veria dalana ai ita hereva, heai havaraia dalana ai lasi. Hepapahuahu ia ura havaraia tauna dekenai iseda nega do ita halusia kava lasi. (2 Tim. 2:23-25) Ita ese hagoadaia kiki herevadia namodia momo Iseda Basileia Gaukara pepana bona Buka Helaga Herevalaia bukana amo ita abia hidi diba. To momokani, namona be ita hegaegae guna bena taunimanima idia ura kamonai dalanai do ita gwauraia diba.—1 Pet. 3:15.
5 Ruma taudia ita rakatania murinai, momo be ita herevalaia gaudia iboudiai do idia laloatao diba lasi. To, reana idia ibounai ese iseda hereva henia dalana do idia laloaboio lasi. Namona be ita laloatao kara namo bona hebogahisi be mai edia siahu. Iseda teritori lalonai, Lidia bamona, hereva momokani do idia kamonai henia mamoe bamona taudia momo idia do noho. Bema iseda toana bona iseda hereva henia dalana ita laloa namonamo noho, unai ese kudou-namo taudia do ia hagoadaia Dirava ena Hereva do idia kamonai henia bona do idia abia dae.—Mar. 4:20.