Bema Medikal Dalanai Emu Abidadama Idia Tohoa, Oi Hegaegae Vadaeni, A?
Oi davaria haraga diba gabuna ai inai hereva oi atoa
1 Taunimanima momo idia laloa lasi hari dina ai eiava kerukeru hospital dekenai do idia lao. To, ‘nega bona kara be ita ibounai dekenai idia vara kava.’ (Had. 9:11) Ena be emu gorere hanamoa totona medikal dalana ta oi abia dae lasi, to bema aksiden dainai oi mase-rea bona hospital dekenai oi idia abia lao haraga neganai, ena be oi ura lasi oi dekenai rara idia henia hanai, to edena bamona idia oi koua diba? Oibe, aksiden ta dainai eiava gorere oi abia haraga neganai, oiemu abidadama idia tohoa diba.
2 Bema hospital dekenai oi lao, edena bamona emu abidadama dekenai oi gini auka diba bema ta ia gwau rara oi dekenai idia henia lasi neganai do oi mase? Do oi abia dae haraga unai hereva ia momokani, a? Emu lalona oi hadaia momokani oi ura lasi rara oi abia, a? Emu abidadama be inai dala ai idia tohoa neganai oi hegaegae vadaeni ‘rara dadaraia’ totona, a?—Kara 15:28, 29, NW.
3 Bema oi ura lasi oi dekenai rara idia henia hanai, lauma dalana ai oi ia hamiroa diba dainai, namona be oi diba momokani do oi dadaraia. Baibel ena hereva rara dekenai oi lalo-pararalaia goevagoeva dainai unai bamona oi hereva be gau badana. Bema lasi, ma tau ta ia gwau emu gorere dekenai iena diba ese oiemu diba ia hanaia neganai do oi gari bena iena ura do oi karaia badina oi lalo-parara lasi. Oi idia koia, bena sedira oi laloa doketa taudia edia diba rara dekenai ese Dirava ena diba ia hanaia, a? Momokani, unai neganai, herevana taunimanima be dahaka idia gwau, do oi ura momokani Iehova ‘ena vairana dekenai emu kara be maoromaoro.’ (Deut. 12:23-25) To unai hetoho be sibona do oi hanaia, a?—Had. 4:9-12.
HOSPITAL INFORMATION SERVICES BONA HOSPITAL LIAISON COMMITTEE
4 Brooklyn dekenai, Society ese Hospital Information Services ia haginia, tadikaka idia doria rara henia hanai karana idia abia dae totona neganai, idia durua diba. Hari tano 75 dekenai, Hospital Liaison Committee 900 idia haginia vadaeni. Unai komiti lalodiai unai gaukara totona idia hadibalaia namonamo elda taudia idia noho.
5 Hospital Information Services taudia be medikal bukadia 3,600 amo rara idia gaukaralaia lasi operesen daladia bona gorere hanamoa daladia herevadia idia tahua diba. Hospital Liaison Committee taudia, hospital o kliniki, bona doketa haida dekenai edena bamona matamata gaudia idia noho idia hamaorolaidia. (Nega haida Hospital Information Services be pepapepa haida idia torea bona idia hahedinaraia rara lasi gorere hanamoa daladia haida be dahaka bona hospital dekenai ia vara hepapahuahu idia hanamoa diba.) Ia ese komiti taudia ia hamaoroa bema kota dekenai kota biaguna tauna ese hahemaoro namona idia karaia, bena hahemaoro taudia ma haida do ia durua Witness taudia idia kota henia neganai, unai hereva idia laloa danu. Danu, tanobada ibounai lalonai rara do idia henia lasi doketa taudia 40,000 edia ladana ena lista idia naria, unai dainai bema rara henia hanai hekwakwanai ia vara neganai, komiti taudia be edia faila dekenai ladana ta do idia davaria haraga.
6 Hospital Information Services ese Hospital Liaison Committee taudia ia naria bona ia hadibaia. Hospital Liaison Committee taudia ese edia siti lalonai idia noho hospital bona ena gaukara taudia idia vadivadi henia loulou hetura namonamo totona. Danu, nega haida hospital taudia dekenai henanadai pepadia idia henia, rara do idia gaukaralaia lasi doketa ma haida idia tahua totona. Unai tadikaka idia gini hegaegae oi idia durua totona, to gau badana be oi ese gaukara haida oi karaia guna, bena oi do idia durua namonamo diba.
HEGAEGAE TOTONA ANINA BADA GAUDIA—OI KARAIA VADAENI, A?
7 Gau ginigunana be inai: emu ruma bese taudia iboudiai be sibodia edia medikal pepana ena hereva ibounai idia torea hegaegae—saini dinana, idia sainia, bona sainia karana idia itaia taudia edia ladadia idia sainia danu. Tadikaka haida be hospital dekenai idia ginidae, to edia pepa sainia dinana bona sainia karana idia itaia taudia edia ladana idia noho lasi dainai, doketa taudia ese unai pepa ena hereva idia abia dae lasi. Bona iseda bapatiso lasi natudia iboudiai ese edia identity kadi, oi torea hegaegae gauna, idia dogoatao, a? Bema lasi, emu natuna be gorere dikana ia abia neganai, hospital taudia be edena dala ai emu lalohadai rara dekenai do idia diba, bona edena bamona idia diba daika ese do idia hereva henia?
8 Namona be dala oi karaia NEGA IBOUNAI unai pepa bona kadi idia dogoatao. Dina ta ta iboudiai, sikuli ai idia do lao lasi neganai, gadara gabuna ai idia do lao lasi neganai danu, oi itaia guna emu natudia dekenai idia noho eiava lasi. Namona be ita ibounai be gaukara gabuna ai, laga-ani neganai, eiava Keristani hebouhebou ta ai, unai gaudia be ita dekenai idia noho. Nega iboudiai oi dekenai idia noho!
9 Namona be inai oi laloa: bema gorere dikana ta eiava aksiden ta dainai hospital ena emergency wodi dekenai oi idia abia lao, bona oi mase-rea eiava oi hereva diba lasi, dahaka do ia vara diba? Bema oi dekenai unai pepa ia noho lasi, bona hospital dekenai emu varavara ta eiava elda ta ia noho lasi emu ura idia gwauraia hedinarai totona, bona hospital taudia idia gwau ‘rara idia henia’ oi dekenai be namo, sedira rara oi dekenai do idia henia hanai. Madi, haida dekenai unai bamona ia vara. To unai pepa be ita dekenai ia noho neganai, unai pepa ese iseda lalohadai, iseda ura, ia gwauraia.
10 Unai dainai aiona dekenai eiava imana dekenai mai ena toretore medikal kwatua gauna be ia namo sisina, to medikal pepana be ia namo momokani. Aiona eiava imana dekenai gauna ese ia hahedinaraia lasi iseda Baibel lalohadaina be dahaka, bona iseda hereva hamomokania totona iseda ladana ita sainia lasi unai gaudia dekenai. Canada kota herevana ta be taihu ta ena pepa ia herevalaia, ia gwau: “[Gorere hahinena] ese ia noho dalana tamona sibona ia gaukaralaia doketa taudia bona muramura henia taudia iboudiai ia hamaorodia, bema ia mase-rea eiava dala be lasi iena ura ia gwauraia totona, ia ura lasi ia dekenai rara idia henia hanai.” Unai dainai nega iboudiai oi dekenai ia noho!
11 Ai hegaegaelaia medikal pepana be emergency negadia totona sibona, unai dainai bema gabeai operesen ta do oi abia bona oi do idia ivaia, namona be oi sibona oi torea hereva iboudiai gauna oi karaia (ai torea medikal pepa gauna amo hereva oi abia diba), bena hereva ma haida oi torea namonamo diba, hegeregere edena bamona operesen do oi abia, doketa edia ladadia, bona hospital ena ladana. Mai emu maoro unai bamona oi karaia diba bona unai amo oi abia hidi dalana do oi abia diba. Ena be oi bona emu doketa umui laloa hekwakwanai badadia be lasi, to oi hamaorodia bema umui laloa lasi gauna ta ia vara operesen neganai, oi torea pepana idia badinaia be namo.—Aon. 22:3.
12 Danu, namona be oi abia hidi operesen dekenai eiava emergency neganai, oi do idia durua medikal taudia oi hereva henidia. To edena taudia umui hereva henidia be gau badana?
MEDIKAL TAUDIA HEREVA HENIDIA
13 MEDIKAL TAUDIA: Unai neganai taunimanima umui gari henidia lasi be gau badana. (Aon. 29:25) Bema emu toana ia daradara, haida do idia laloa emu lalohadai momokani oi gwauraia lasi. Bema oi do idia ivaia, herevana unai be oi abia hidi operesen ta eiava emergency gauna, namona be oi eiava emu ruma bese varavarana ta ese mai ena goada ida operesen ia biagua tauna dekenai henanadai badadia ia henia. Henanadai badana ta be: Operesen neganai operesen idia karaia taudia be dala iboudiai dekenai gorere tauna ena lalohadai rara dekenai do idia matauraia, eiava? Bema unai idia hamomokania diba lasi, reana emu ura do idia matauraia lasi.
14 Emu lalohadai be mai emu hemataurai bona goada ida oi gwauraia namonamo. Namona be oi hahedinaraia goevagoeva oi ura rara gaukaralaia lasi dalana ai emu gorere idia hanamoa. Mai manau bona gari lasi ida emu medikal pepana oi herevalaia bona danu hospital ena release from liability fom oi herevalaia. Bema ivaia doketa ia ura lasi emu ura ia badinaia, hospital administrator oi noia doketa ma ta ia tahua be namo. Unai be ena gaukara ta.
15 ANESTHETIC IA HENIA DOKETA: Operesen oi do abia lasi neganai, medikal taudia iboudiai amo INAI DOKETA DEKENAI OI HEREVA HENIA BE GAU BADANA. Iena gaukara be operesen neganai, doketa ta ese oi ia ivaia neganai, anesthetic ia henia doketa ese rara henia hanai eiava lasi karana ia biagua. Unai dainai oi do ia ivaia doketa tauna sibona oi hereva henia be hegeregere lasi. Unai dainai, anesthetic ia henia doketa oi hereva henia bona emu lalohadai be ia dekenai oi hadibaia namonamo, bona oi itaia diba ia ese oiemu ura do ia matauraia eiava lasi.—Luka 18:3-5 itaia danu.
16 To, nega momo, idia karaia dalana be operesen idia do karaia lasi hanuaboina ginigabena ai, operesen negana kahirakahira ai, anesthetic ia henia doketa ese nega sisina lalonai gorere tauna ia vadivadi henia—unai be nega namona lasi oi hadibaia bema emu lalohadai rara dadaraia karana dekenai ia abia dae eiava lasi. Namona be oi hereva goadagoada ivaia doketa be emu lalohadai ia matauraia anesthetic henia doketa ia abia hidi guna, bena nega bada ai, operesen oi do abia lasi negana ai, oi hereva henia diba. Unai neganai bema ia abia hidi tauna ginigunana ia ura lasi emu ura ia matauraia, nega ia noho ma doketa ta oi tahua totona. Namo lasi ta ese oiemu lalona ia ania bona emu lalohadai oi haidaua, badina oi be mai emu maoro oiemu operesen dekenai oi ura anesthetic henia doketa oi abia.
17 Idia iboudiai dekenai, namona be oi hahedinaraia goevagoeva oiemu lalohadai idia haidaua diba lasi: RARA LASI. Oi hamaorodia emu operesen dekenai rara henia hanai lasi to dala ma haida dekenai emu gorere idia hanamoa diba. Rara lasi dala ma haida amo oiemu gorere idia hanamoa diba oi hadibadia. Bema medikal taudia idia laloa unai hereva be anina lasi oiemu gorere dekenai, oi noidia ma medikal bukadia dekenai dala ma haida idia tahua oi idia durua totona. Oi hamaorodia bema idia ura neganai, emu elda taudia be Hospital Liaison Committee amo heduru sivarai ma haida idia abia diba.
MAI EMU MAORO DALA HAIDA OI KARAIA
18 Hospital oi vareai neganai, namona be idia henia consent fom eiava release from liability fom oi do sainia lasi neganai oi itaia namonamo guna. Nega haida do idia gwau emu ura do idia matauraia, bena paragraf haida murinai do ia gwau oi sainia neganai hospital be mai ena maoro “hamauria” durua karadia idia karaia diba bema hekwakwanai ta ia vara. Idia ta be reana rara henia hanai karana. Oi be mai emu maoro unai bamona hereva oi haidaua, oi gwau rara do oi abia lasi, eiava unai kahana oi kokia diba. Sista taudia reana do idia gwau oi karaia diba lasi, to oi karaia diba! Unai be kontraka ta bona emu gwaumaoro do oi henia lasi bema emu ura ia matauraia lasi. Bema oi idia doria, oi hamaorodia oi ura hospital administrator eiava hospital ena patient representative oi itaia.
19 Unai oi karaia diba, a? Oibe, oi karaia diba. Namona be oi diba hospital ai idia vareai taudia be mai edia maoro dahaka do idia karaia. Hospital oi vareai neganai, unai maoro daladia idia boio lasi. Oiemu gorere ia namo totona, mai emu maoro ida oi abia hidi daladia idia kokia diba lasi. Namo lasi ma ta ena hereva dainai oi laloa unai dala be idia maoro lasi.
20 Oiemu maoro dalana ta be inai: oi be mai emu maoro, hereva ibounai be oi dekenai idia hadibaia, anina be muramura ta eiava medikal heduruna ta oi dekenai idia do henia lasi neganai, oi dekena amo gwaumaoro idia abia guna. Bema oi ura neganai, medikal heduru daladia iboudiai oi dadaraia diba. Medikal taudia be oi dekenai idia karaia gwauraia daladia iboudiai idia gwauraia hedinarai namonamo guna, idia vara diba kereredia danu, bena, unai murinai sibona oiemu gwaumaoro oi henia eiava lasi. Bena, oi dekenai idia karaia diba medikal daladia ma haida idia gwauraia guna. Oi idia hadibaia murinai, oi gwau diba edena medikal dalana oi ura abia hidi.
21 Oi dekenai do idia karaia medikal daladia idia hegeregere bona emu gwaumaoro oi do henia lasi neganai, oi lalo-pararalaia lasi gaudia oi henanadailaidia BE GAU BADANA, unai be hospital taudia ese idia gwauraia hereva aukadia eiava medikal herevadia danu. Hegeregere, bema doketa ta ia gwau ia ura oi dekenai “plasma” ia henia, oi diba lasi dainai reana oi laloa ia be “plasma volume expander” ia herevalaia, to unai ia gwauraia lasi. To gwaumaoro oi do henia lasi neganai, namona be oi nanadaia: “Unai be rara gauna ta, eiava?” Ia gaukara daladia iboudiai dekenai, inai henanadai oi henia: “Unai dala dekenai rara gaudia do oi gaukaralaia, eiava?” Bema do ia gaukaralaia masini ta ia herevalaia, oi henanadai: “Unai masini oi gaukaralaia neganai, egu rara be gabu ta ai nega sisina lalonai ia noho, eiava?”
22 To dahaka do oi karaia bema ataiai ia noho sisiba oi badinaia bona oi idia durua lasi eiava emu hereva idia dadaraia noho? Oi naria lasi, heduru oi noia. Guna haida idia naria bona heduru idia abia haraga lasi dainai kahirakahira edia mauri idia haboioa.
HEKWAKWANAI NEGANA AI HEDURU NAMONA
23 Mani inai heduru abia dalana oi badinaia: (1) Oi eiava emu ruma bese tauna idia diba operesen do idia abia bona hospital taudia idia ura rara idia gaukaralaia; eiava (2) bema oi eiava emu ruma bese tauna ena gorere be haraga herea ia dika ia lao; eiava (3) bema emu mero o kekeni (eiava tau o hahine) dekenai, doketa, sista, eiava administrator idia gwau kota ena gwaumaoro do idia abia rara henia totona, bena:
24 KONGREGESEN ELDA TAUDIA OI HAMAOROA bema oi do karaia lasi. (Momokani, iseda lalohadai rara dekenai dainai, aonega dalana be hospital dekenai ita lao neganai, namona be elda taudia ita hamaoroa.) Bena, bema idia laloa namona be idia karaia, ELDA TAUDIA ESE HOSPITAL LIAISON COMMITTEE DO IDIA HAMAOROA. Bema oi ura, unai neganai Hospital Liaison Committee taudia do idia lao hospital dekenai bona oi do idia durua.—Isa. 32:1, 2.
25 Unai Hospital Liaison Committee elda taudia idia diba edena doketa taudia ese emu ura do idia badinaia bona idia ese reana hospital ma ta do idia tahua hamatamataia oi idia durua totona. Bema haida be emu gabu dekenai idia noho lasi, elda taudia be ia kahirakahira komiti ma ta do idia nanadaia. Bema idia kwalimu lasi, Port Moresby ena Brens Opesi ena Hospital Information Services do idia hamaoroa. Reana oi ida ia ura ia gaukara doketa ta do idia davaria bona ia be medikal taudia dekenai dahaka idia karaia diba, mai rara lasi karadia, ia hahedinaraia. Hospital Liaison Committee tadikaka idia hadibaia vadaeni bona idia diba dahaka idia karaia be namo.
26 Hospital Liaison Committee taudia ese oi eiava emu varavara do idia durua doketa eiava administrator umui hereva henia neganai, to do idia karaia lasi bema idia oi noia lasi. Unai tadikaka be dahaka do oi karaia do idia abia hidi lasi oi totona, to Society ena lalohadai, medikal daladia idauidau, bona gavamani ena taravatu be dahaka, unai dala amo oi do idia durua.
27 Bema medikal taudia idia ura lasi oi ida idia gaukara, namona be hospital taudia oi hereva henia bona oi noia oiemu ura do idia matauraia medikal durua taudia ma haida ese edia gabu idia abia. Bema ia ura lasi ia karaia, bona ivaia doketa ma ta oi davaria momokani vadaeni ma hospital ta lalonai bona oi do idia abia dae, unai neganai SIBONA oiemu ura hegeregerena, pepapepa ta dekenai oi idia ura lasi idia durua doketa taudia edia sivarai, deit, bona emu ladana oi atoa, bona oi gwau diba hari idia be oiemu gorere durua taudia lasi. Unai pepa be administrator dekenai oi henia.
28 Oi karaia diba, a? Oibe, oi be mai emu maoro. Bona bema gabeai kota dekenai oi lao, kota biaguna dekenai unai pepa ese oiemu ura do ia hahedinaraia goevagoeva. Danu reana dala do ia kehoa ivaia doketa ma haida ese oi do idia durua badina doketa gunadia be hari do idia hahemaraia o habadua lasi badina oi hamomokania idia be oiemu doketa lasi. Gau badana be oi ia ruhaia emu gorere ia do dika momokani lasi neganai, doketa ma haida edia heduru do oi tahua diba. Naria daudau lasi!
INAI HENANADAI DEKENAI OI NARIA NAMONAMO
29 Namona be oi diba doketa taudia bona ma haida ese henanadai haida idia henia neganai mai edia ura namona ida idia henia lasi. Nega momo doketa taudia (bona hahemaoro taudia haida) ese idia henia henanadai be inai:
• “Oi ura oi mase (emu natuna ia mase) badina ‘hamauria rara henia hanai karana’ oi dadaraia dainai, a?”
30 Bema oi haere oibe, unai be tomadiho dalana ai ia maoro. To nega momo unai haere ena anina idia abia kerere bona nega haida kota dekenai ita ura lasi hahemaoro herevana idia henia. Namona be oi laloatao unai neganai oi be haroro gaukara dekenai oi noho lasi. To, oi be gorere hanamoa medikal dalana oi herevalaia. Unai dainai, oi hereva henidia taudia, medikal taudia eiava kota taudia, hegeregeredia oi haere.—Sal. 39:1; Kol. 4:5, 6.
31 Doketa tauna, hahemaoro tauna, eiava hospital biaguna, dekenai bema oi gwau “oibe” neganai, do idia laloa oi ura emu abidadama dainai do oi mase eiava emu natuna do ia mase. Unai neganai bema oiemu abidadama goadana toreisi lou dekenai oi hadibadia unai ese oi do ia durua lasi. Do idia gwau oi be tomadiho karaia goada kavakava tauna bamona, bona mauri eiava mase dalana oi abia hidi totona oi laloa maoromaoro diba lasi. Natudia idia gorere neganai, do idia gwau oi be natudia oi naria namonamo lasi tamana eiava sinana, bona oi be “hamauria” medikal dalana oi dadaraia.
32 To medikal heduru dalana oi dadaraia LASI. Oi hepapahuahulaia gauna be doketa ese EDENA DALA AI medikal heduruna ia henia. Unai bamona oi hereva neganai, nega momo oi dekenai edia lalohadai dalana ia idau. Ma danu, bema idia gwau “hamauria” dalana TAMONA SIBONA be rara, idia hereva kerere. (How Can Blood Save Your Life? buklet, rau 7-22 oi itaia.) Unai dainai, unai hereva oi gwauraia hedinarai namonamo. Edena dala ai oi karaia diba? Inai bamona oi haere diba:
• “Lau ura lasi lau (Lau ura lasi egu natuna ia) mase. Bema lau ura lau (lau ura egu natuna ia) mase, ruma dekenai lau noho. To lau mai medikal heduruna lau abia totona badina lau ura lau (lau ura egu natuna ia) mauri. Lau ura gauna be lau (egu natuna) ese rara lasi medikal heduruna lau (ia) abia. Daladia haida idia noho.”
33 Doketa taudia eiava hahemaoro taudia ese nega momo idia henia henanadai ma haida be inai:
• “Bema kota taudia be herevana dahaka oi ura neganai idia gwau rara oi dekenai do idia henia hanai dahaka do ia vara oi dekenai? Unai neganai kerere be oi dekenai do idia gwauraia, eiava lasi?”
• “Bema rara idia henia hanai karana oi abia dae eiava oi idia doria oi abia totona, emu tomadiho amo oi do idia lulua eiava mauri hanaihanai dalana do idia koua, a? Emu kongregesen taudia be edena bamona oi do idia laloa?”
34 Taihu ta be hahemaoro tauna ta dekenai ia haere, ia gwau unai neganai kerere be ia dekenai lasi bema hahemaoro tauna ese unai hahemaoro hereva ia henia. Ena be dala ta dekenai unai be maoro, to hahemaoro tauna ia laloa kerere, ia laloa unai taihu be kerere lasi dainai, maduna be hahemaoro tauna ese do ia abia. Hahemaoro tauna ena oda be rara do idia henia hanai.
35 Namona be oi diba unai henanadai idia henia neganai, haida be dala idia tahua rara oi dadaraia herevana idia hanaia totona. Namo lasi oi naria namonamo lasi dainai unai dala be idia dekenai oi kehoa! Unai dainai, edena dala ai haere idia abia kerere dalana ita koua diba? Inai bamona oi haere diba:
• “Herevana edena dala ai, to bema lau idia doria rara lau abia totona, unai be hegeregere tau ta ese lau ia hadikaia bamona. Ela bona egu mase dinana ai egu lalona ai bona lauma dalanai unai kara ia havaraia hisihisina do lau mamia. Mai egu goada ibounai ida egu tauanina ia hadikaia karana do lau dadaraia badina gwaumaoro lau henia lasi. Lau ese hadikaia taudia do lau kota henidia hegeregerena, lau ese rara lau dekenai idia henia toho taudia do lau kota henidia danu.”
36 Namona be idia diba momokani bema oi idia doria rara henia hanai karana oi abia totona, unai be iseda tauanina hadikaia karana ena dika hegeregerena. Unai be karaia kava gauna lasi. Unai dainai oi gini auka. Oi hereva hedinarai goevagoeva oi ura rara lasi medikal heduruna oi abia.
DAHAKA DO OI KARAIA OI HEGAEGAE TOTONA?
37 Oi bona emu ruma bese taudia dekenai rara henia hanai karana idia doria lasi totona, ita be heduru hereva haida sibona ita herevalaia inai. (Gabeai, dahaka oi karaia diba bema hekwakwanai ia vara bona emu beibi o natudia dekenai rara henia hanai karana idia doria toho, heduru herevadia ma haida do ai henia.) Hari ita itaia Society be mai ena lalokau ida nega korikori ai heduru idia henia. Emu abidadama tohoa medikal dalana oi hegaegaelaia totona, dahaka do oi karaia inai hereva oi diba dainai?
Gau ginigunana: Emu ruma bese taudia ida oi herevahereva, dahaka do idia vara diba gaudia totona umui hegaegae, dahaka do umui hereva bona dahaka do umui karaia, emergency negadia ai danu.
Unai murinai: Namona be do umui gaukaralaia pepadia iboudiai be umui dekenai idia noho.
Bena: Namona be Iehova oi guriguri henia goadagoada, oiemu lalohadai ‘rara dadaraia noho’ dekenai oi ia durua noho. Iena taravatu rara dekenai ita badinaia dainai, ita do ia lalo-namo henia bona mauri hanaihanai do ita abia.—Kara 15:29, NW; Aon. 27:11, 12.
[Box on page 5]
Bema emu gorere ia dika ia lao bona rara henia hanai karana idia doria toho, namona be inai maua ia herevalaia dalana oi badinaia:
1. Oi ese kongregesen elda taudia edia heduru oi noia.
2. Bema rara henia hanai karana idia doria, elda taudia oi noia Hospital Liaison Committee taudia idia hamaoroa.
3. Doketa eiava ma oi haida hereva henidia neganai, Hospital Liaison Committee taudia ese oi idia durua diba.
4. Hospital Liaison Committee taudia ese oi idia durua doketa ma ta ida oi kiki bona emu ivaia doketa dekenai rara lasi medikal heduru daladia idia herevalaia.
5. Hospital Liaison Committee taudia ese oiemu ura do ia matauraia hospital ma ta idia tahua diba bona oi do idia durua unuseniai oi hanaia.
This is a repeat of article in km 11/93 taken from km-E 11/90 “Are You Ready to Face a Faith-Challenging Medical Situation?”