Henanadai Mauana

◼ Hari Diba ese Mauri Dekenai Ita Ia Hakaua Lao bukana ita abia dainai, Baibel stadi karaia karana ena lata be edena bamona?

Iseda Basileia Gaukara pepana, September 1993 gauna ia gwau namona be kamonai matamata taudia ida ita stadi ela bona buka rua ita stadilaia haorea. Hari Diba bukana ita abia dainai, January 15, 1996, Gima Kohorona, rau 13 bona 14 ena hereva hegeregerena, unai karaia dalana do ita haidaua.

Diba bukana be “mauri hanaihanai abia totona taudia” totona idia karaia. Ia amo diba idia abia bena do idia hegeregere Iehova dekenai edia mauri idia gwauhamatalaia bona idia bapatiso. (Kara 13:48) Unai dainai, unai buka matamata umui stadilaia haorea murinai, buka iharuana be unai stiuden ida do umui stadilaia lasi. Emu Baibel stiuden taudia ese hereva momokani idia badinaia matamaia neganai, namona be idia oi hagoadaia Iehova ena Witness taudia edia hebou dekenai idia lao, bona Baibel bona Keristani buka idauidau idia duahia edia diba idia habadaia noho totona.

Bema Hesiai Gaukara Karaia Totona Ita Hegaegae bukana ena rau 175 ia lao 218 ai idia noho henanadai oi dibaia namonamo guna, oi do ia durua. Ena be unai henanadai be emu Baibel stiuden ida do oi duahia o riviulaia lasi, to Diba bukana umui stadilaia neganai unai henanadai edia haere do oi hahedinaraia goevagoeva. Elda taudia ese gabeai Baibel stiuden dekenai bapatiso henanadai idia henia neganai, Baibel ena hereva badadia do ia gwauraia hedinarai namonamo diba mai ena lalo-parara ida.

Baibel stadi lalonai Diba bukana oi gaukaralaia neganai, hereva ma haida do oi atoa kau lasi Baibel ena hahediba herevadia hamomokania eiava hadibaia herevadia koikoidia oi hakoikoia totona. Bema unai oi karaia, buka stadilaia negana do oi halataia. Namona be buka umui stadilaia haorea haraga, reana hua 5 bamona lalodiai. Unai ena anina be buka ita hegaegaelaia namonamo guna, iseda hadibaia dalana ia goeva bona maoromaoro totona. Stiuden oi hagoadaia iena buka do ia stadilaia bona idia gwauraia Baibel siridia ia itaia guna, bona karoa ta ta ena anina korikori do ia tahua ia lalo-pararalaia goevagoeva totona.

Gima Kohorona ia hahedinarai gau badana be Iehova ena Witness taudia ese nega kwadogi lalonai Baibel stadi namodia, anina bada idia havaraia gaudia, do idia karaia. (Isaia 60:22 itaia.) Diba bukana ita gaukaralaia namonamo neganai, matamata taudia ese mauri dekenai idia ia hakaua lao dibana do idia abia bona ia hegeregerena do idia kara diba.​—⁠Ioa. 17:⁠3.