Oi Bisi Bada Herea, A?

¹ Paulo ese ia sisiba henia, ia gwau “nega ibounai Lohiabada ena gaukara do umui karaia goadagoada.” (1 Kor. 15:58) Ita idia hagoadaia dina ta ta ai sibona eda stadi ita karaia, haroro gaukara ita karaia hanaihanai, hebou ita lao henia loulou, bona kongregesen lalonai ita abia gaukarana ita karaia namonamo. Iseda maduna ma ta be iseda heduru idia ura taudia ita durua be namo. Gaukara idauidau momo idia noho dainai, reana iseda hemami be ita hegeregere lasi, bona ita laloa gaukara hamaragia daladia ita tahua be maoro.

² Nega haida aonega dalana be kara haida do ita karaia lasi eiava do ita hamaragia. Haida edia lalohadai be bema ma haida be idia noia kara ta idia karaia totona, do idia karaia sibona. Unai lalohadai kererena ese idia ia hametaua bona ia hadikaia diba bema unai gaudia idia laloa maoromaoro lasi.

³ Laloa Maoromaoro: Laloa maoromaoro karana ena ki be Paulo ena sisiba do ita badinaia, ia gwau “mai anina bada gaudia do umui diba namonamo.” (Fil. 1:​10, NW) Ena anina be anina bada gaudia totona iseda nega ita atoa guna, bena, bema iseda nega bona goada ia hegeregere, edia anina be bada momokani lasi gaudia do ita karaia. Ruma bese naria maduna be mai anina bada gauna ta. Moni gaukara ena maduna haida do ita huaia danu. To, Iesu ese ia hadibaia hegeregerena, unai gaudia ita laloa neganai, Basileia do ita atoa guna. Namona be ita do idia durua iseda gwauhamata Iehova dekenai ita badinaia totona gaudia ita karaia guna.​—⁠Mat. 5:3; 6:⁠33.

⁴ Unai ita laloa noho dainai, ita bisi bada herea neganai, iseda sediual amo sibona eda ura tahua karadia, moale karadia momo, bona anina maragi maduna do ita kokia. Wiki ta ta totona palani ita karaia neganai, nega do ita atoa sibona eda stadi, haroro gaukara, hebou lao henia, bona iseda tomadiho lalonai idia vara gaudia ma haida totona. Ia do noho nega orena do ita haria namonamo ma gau haida karaia totona, to namona be unai gaudia ese ita do idia durua ita be Basileia ita atoa guna Keristani taudia ai do ita lao totona.

⁵ Ena be unai bamona ita karaia, to reana ita laloa iseda maduna ia do metau herea. Bema unai bamona ita laloa, Iesu ena boiboi ita kamonai be namo: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai.” (Mat. 11:28) Danu, Iehova dekenai ita lao, “ia ese dina ibounai iseda maduna metaudia ia huaia noho,” bona hesiku taudia ia hagoadaia noho. Iena gwauhamata be kara maoromaoro taudia do ia durua noho idia moru lasi totona. (Sal. 55:22; 68:19; Isa. 40:29) Ita diba iseda guriguri do ia haerelaia, bena unai amo tiokratik gaukara do ita karaia goadagoada noho diba.

⁶ Ita diba Basileia gaudia ita tahua noho neganai do ita bisi, to ita moale badina ita diba Lohiabada ena gaukara lalonai iseda hekwarahi be hekwarahi kava lasi.​—⁠1 Kor. 15:⁠58.