Emu Dekena Tauna Dekenai Hereva Momokani Oi Gwauraia
1 Taravatu hereadia ruaosi amo ta be inai: “Oiemu badibadinai tauna dekenai oi lalokau henia, oi sibona oi lalokau henia bamona.” (Mat. 22:39) Unai bamona lalokau ese ita ia veria, ita abia gau hereadaena be ma haida dekenai ita gwauraia hedinarai—ia be Dirava ena Hereva amo ita davaria hereva momokanina unai. Gima Kohorona bona Noga! magasin ese Baibel ia gwauraia hereva momokanina idia halasia dainai, ita ese May lalonai unai magasin rua do ita hariharilaia be ‘ta ta dekenai hereva momokani ita gwauraia’ dalana ta.—Ef. 4:25.
2 Namona be April-June ena “Noga!” ita hariharilaia noho ela bona ibounai idia ore momokani. Oiemu hereva oi hamatamaia totona reana inai bamona do oi nanadaia:
◼ “Oiemu lalohadai be dahaka tuari be lasi tanobadana dekenai? [Haere naria.] Guna oi diba tanobada ena tomadiho oreadia ese tuari bona ala-ala karadia idia durua, a? [Haere naria.] To Dirava idia tomadiho henia taudia korikoridia be idia idau momokani, mani oi itaia Baibel ese edia kara be edena bamona ia gwauraia.” Magasin ena rau 4 ena ataiai kahana ia noho sirina, Isaia 2:4 oi duahia, bona rau 10 ena kwarana maragina “Maino Idia Lalokau Henia Taudia Idia Boiridia” henunai ia noho paragraf ginigunana oi duahia. Bena oi nanadaia: “Oi diba Dirava be edena dala ai unai do ia karaia, a? Haere be inai magasin lalonai do oi davaria diba. Lau ura oi dekenai lau henia, iena davana be 30 toea sibona.”
3 April 15 ena “Gima Kohorona” ese “Tomadiho Momokani ese Dirava Ena Hahenamo Ia Abia Ena Badina” ia herevalaia. Oi do hahedinaraia lasi neganai, inai bamona oi nanadaia diba:
◼ “Tanobada lalonai tomadiho oreadia handred momo idia noho, oi laloa Dirava ese idia ibounai ia abia dae, a? [Haere naria.] Iesu ia peroveta ia gwau, ena be tomadiho taudia momo edia hereva be idau, to Dirava ena ura idia karaia lasi taudia be ia ese do ia dadaraia. [Mataio 7:21-23 duahia.] Gau badana be Iesu ia hadibaia tomadiho korikorina ita davaria.” Rau 16 amo ia matamaia herevana “Tomadiho Momokani ese Dahaka Huahua Ia Havaraia be Namo?” oi kehoa, bona haheitalai ta oi herevalaia mai anina bada herevana ia hedinarai namonamo totona.
4 Bema hereva kwadogina oi ura gwauraia, reana inai do oi tohoa:
◼ “Momo idia laloa taunimanima ese idia ura bada magasin idauidau lalonai, bisinesi karadia, sihari kava karadia, bona dagedage karadia idia hahedinaraia bada. [Gima Kohorona bona Noga! hahedinaraia] Inai magasin namodia lalonai idia noho herevadia be Baibel ena amo. Idia ese gau idauidau idia hadibaia bona Dirava tomadiho henia karana, iseda dekena taudia lalokau henia karana, bona iseda kara hanamoa karadia dekenai diba idia henia. Bema unai bamona gaudia oi ura duahia, lau diba inai magasin rua lalonai oi davaria gaudia do oi moalelaia. Inai hua lalonai, ai be Gima Kohorona ena sabskripsen ai hariharilaia danu.” Sabskripsen ena davana oi gwauraia. Bema ia ura lasi, magasin rua bona Mase Taudia Edia Lauma buklet oi hariharilaia toho, edia davana be K1.00.
5 Bema mai goada ida iseda dekena taudia dekenai hereva momokani ita gwauraia, reana taunimanima momo dekenai moale bada do ita mailaia diba.—Kara 8:4, 8.