Sivarai Namona Ita Gwauraia Noho

¹ Keristani taudia ginigunadia ese edia haroro gaukara idia laloa bada. Luka ia gwau: “Dina ibounai, Dubu Helaga lalonai bona ruma lalonai, taunimanima idia hadibaia noho, bona Iesu Keriso ena Sivarai Namona idia gwauraia noho. Inai gaukara idia hadokoa lasi.” (Kara 5:​42) Gau ta lasi, dagedage karana danu ese idia ia koua diba lasi! (Kara 8:⁠4) Dina ta ta iboudiai idia ese taunimanima dekenai hereva momokani idia gwauraia.

² Ita be edena bamona? Sibona oi henanadai: ‘Lau abia dae nega ia kwadogi, a? Lau ura sivarai namona lau gwauraia noho, a?’

³ Hari Idia Haroro Noho Taudia Haida: Taihu ta, polio gorerena ese ia hadikaia taihuna, be masini badana, iron lung lalonai ia noho. Ia be Kingdom Hall eiava hebouhebou ta dekenai ia lao diba lasi. To ia ese sivarai namona ia gwauraia noho goadagoada. Lagani 37 unai masini lalonai ia noho neganai, taunimanima 17 ia durua hereva momokani idia dibaia totona! Edena bamona unai ia karaia? Ena be ruma ta ruma ta dekenai ia lao diba lasi, to dina ta ta iboudiai dala ia davaria ia idia hedavari henia taudia dekenai ia haroro totona.

⁴ Bosnia dekenai, iseda tadikaka ese tuari dainai bona edia gau ibounai idia haboioa dainai idia hekwarahi. To, hanaihanai taunimanima dekenai idia haroro noho. Sarajevo dekenai, pablisa taudia edia hora, hua ta ta iboudiai sivarai namona be haida dekenai idia haroro horadia, edia averes be 20, bona idia ta ta edia Baibel stadi edia averes be rua. Ena be edia noho ia auka herea, to edia haroro bona hadibaia gaukarana idia hadokoa lasi.

⁵ Matamata taudia danu ese haroro gaukara idia goadalaia. Rwanda dekenai, Witness famili ta be daiutu ta lalonai idia atoa tuari taudia ese idia hamasedia totona. Unai famili taudia idia noinoi bema namo idia guriguri guna. Gwaumaoro idia abia bona kekeni maragi, Deborah, ia guriguri badabada: “Iehova e, inai pura lalonai, lau bona Papa be magasin ima ai henia taunimanima dekenai. Edena bamona do ai giroa lou idia dekenai hereva momokani ai hadibadia, bona ai durudia idia mauri totona?” Iena abidadama goadana bona haroro gaukara ia ura henia bada dainai, unai famili taudia idia hamasea lasi.

⁶ Hari inai negai, namona be dala ita tahua taunimanima dekenai do ita haroro totona bona “mauri hanaihanai” do idia abia lalo-maoro taudia ita davaria totona. (Kara 13:48) Edia gabu ena noho dalana hegeregerena ai, kongregesen elda taudia ese dala idia hegaegaelaia nega namodia ai tadikaka idia haroro hebou totona, reana dabai, dina tubua murinai, eiava adorahi ai. Iseda Basileia Gaukara ena hereva haida bona Hesiai Hebou, sekit hebouhebou, bona distrik hebouhebou edia hereva haida ese ita idia durua bona hagoadaia dala idauidau ai Basileia haroro gaukarana ita karaia totona. Ma danu, sekit bona distrik naria taudia ese dala ai haroro gaukarana, bisinesi teritori ai gaukara daladia, bona taunimanima idia noho gabudia ai, haroro daladia ma haida be pablisa taudia dekenai idia hadibaia. Unai ibounai ese ia hahedinaraia sivarai namona ita gwauraia noho be gau badana!

⁷ Iesu ena aposetolo taudia be mai gari lasi ida idia gwau: “Ai itaia bona ai kamonai gaudia ai hunia diba lasi, aiemai uduna ai koua diba lasi.” Edena bamona idia haheauka ena be edia hekwakwanai be momo? Idia ese Iehova idia noia iena heduru ia henia totona, Iehova ese unai ia karaia, bona “Lauma Helaga ese ibounai ia hahonua, bona Dirava ena hereva idia gwauraia, mai goada danu.” (Kara 4:​20, 29, 31) Reana iboudiai ese haroro lalonai ekspiriens namodia idia abia lasi, to bema mai eda ura ida sivarai namona ita gwauraia noho bona bema ita hekwarahi dina ta ta iboudiai unai ita karaia totona, Iehova ese ita do ia durua.