Hadibaia Gaukara Oi Karaia Noho
1 Bible lalonai aposetolo taudia bona Keristen ginigunadia edia teritori toana ia hahedinaraia goevagoeva. Daudau lasi Iesu ia mase murinai, siahu taudia ese aposetolo taudia idia hamaorodia “Iesu ena ladana do idia harorolaia lasi, bona idia hadibaia lasi.” (Kara 4:18) Unai idia hereva ena badina tamona be Keristen taudia edia gaukara ia tubu bada. Kara 4:4 ia gwauraia hegeregerena, taunimanima tausen momo be hahediba taudia ai idia lao, ia gwau: “Edia hereva idia kamonai bona idia abia dae taudia be momo. Abia dae tatau ibounai be 5000 bamona.”
2 Ita danu be hadibaia gaukara ita karaia noho dainai, hari inai nega lalonai, taunimanima milion momo be hereva momokani idia abia dae. October lalonai ita be Gima Kohorona sabskripsen do ita henia toho. Ita daradara lasi, unai magasin edia heduru be bada, badina taunimanima idia hadibaia lauma gaudia idia tahua be gau badana. Momo be Iehova ena ura idia diba bona idia karaia neganai, moale bada idia davaria.—Mataio 5:3 itaia.
IBOUDIAI HARORO HENIDIA
3 Ena be nega momo iseda teritori dekenai ita haroro, to reana hereva momokani idia do kamonai henia lasi taudia do ita tahudia diba. Edena bamona? Bema ruma ta ruma ta gaukara lalonai taunimanima ita hereva henidia diba lasi neganai, telefon amo ita hereva henidia toho be namo, ani? Eiava hanuaboi kahirakahira neganai eiava Saturday bona Sunday dekenai ita haroro neganai, namona be ruma tauna ita tahua ita hereva henia totona, ani? Ruma ta ruma ta gaukara ita karaia neganai bema iseda noutbuk dekenai ita davaria taudia edia ladana ita torea, gabeai unai ruma dekenai ita haroro neganai, ruma bese tauna idauna ta do ita haroro henia toho, hegeregere, tubuna, ruma tauna ena sikuli ai ia lao tadikakana eiava natuna, eiava moni gaukara ia karaia ena nakimi. Bema ita goada karaia ruma dekenai idia noho taudia iboudiai do ita haroro henidia totona reana gaukara ena anina do ita davaria.
4 October ena hua lalonai Gima Kohorona sabskripsen abia dala namodia be idauidau. Hegeregere, iseda Bible stadi bona kamonai taudia ma haida ita henanadai henidia sabskripsen idia abia totona. Edia Gima Kohorona stadi hegaegaelaia totona, namona be ruma bese taudia ta ta iboudiai ita hagoadaia sibodia ta ta edia sabskripsen idia abia totona. Danu, dala namona ma ta be hanaihanai magasin idia abia taudia ita lou henidia bona kamonai bada taudia dekenai sabskripsen ita henidia toho. Danu kamonai bada taudia dekenai Bible stadi ita hamatamaia toho be namo.
HARORO GAUKARA OI HABADAIA
5 October ena hua lalonai heduru pioneer gaukara oi karaia totona, nega ia do noho pioneer aplikeisini pepena do oi torea totona. December ena hua lalonai tanobada taudia edia holide neganai oi bona emu ruma bese taudia be umui hegaegae diba pioneer gaukara karaia totona, a? Namona be hari umui hegaegae karaia dalana umui diba totona. Bema ruma bese taudia haida be heduru pioneer gaukara idia karaia diba, reana do umui hegaegae emui ruma bese tauna tamona eiava rua do idia karaia totona, a? Bema dala be lasi, reana emui haroro gaukara umui habadaia diba sisina Gima Kohorona magasin ena sabskripsen umui henia toho totona, ani?
6 Noga! bona Gima Kohorona magasin edia amo lauma dalanai heduru bada bona hahenamo momo ita abia dainai ita moale. Danu, ita diba iseda teritori lalonai, kudou-maoro taudia momo be unai magasin idia duahia hanaihanai neganai namo bada do idia davaria diba. October ena hua lalonai, namona be Iehova ese ita ia henia kohu namodia ita gaukaralaidia noho hahediba gaukara ita karaia totona. Unai ita karaia neganai, Iehova ena hahenamo do ita davaria bona iseda gaukara amo taunimanima ma haida ita hanamodia diba.—Gal. 6:9.
[Questions]
1. Dahaka dainai siahu taudia ese hahediba taudia idia hamaorodia Iesu ena ladana dekenai idia haroro lasi?
2. October lalonai dahaka do ita karaia hahediba gaukara ma haida do ita karaia totona? Bona dahaka do ia vara?
3. Ruma ta ruma ta gaukara ita karaia neganai, do ita goada karaia daidia ita hereva henidia totona?
4. Sabskripsen ita abia diba dala haida be dahaka?
5, 6. October ena hua lalonai, Iehova ena hahenamo ita abia bona taunimanima ma haida ita hanamodia daladia rua be dahaka?