Daika ese Iseda Haroro Sivaraina Do Ia Kamonai Henia?
1 Hari inai negai, taunimanima ese diba idauidau momo idia abia, nega momo unai diba be anina lasi bona taunimanima ia hakaua kerere. Unai dainai, taunimanima momo ese diba ma ta idia ura lasi, bona Dirava ena Basileia ena sivarai namona idia kamonai henia totona edia lalona ita veria be mai ena hekwarahi. Idia lalo-parara lasi Dirava ena Hereva idia kamonai henia karana amo moale do idia davaria.—Luka 11:28.
2 Ita moale badina tanobada ena kahana momo ai, taunimanima tausen momo ese unai sivarai idia kamonai henia bona Baibel stadi idia abia dae. To, ma teritori haida dekenai, unai bamona ia vara lasi. Nega momo ita haroro to anina ia vara lasi, bona reana ita laloa ta ese iseda haroro sivaraina do ia kamonai henia lasi.
3 Namona be ita naria namonamo ita lalo-manoka garina. Paulo ia gwau: ‘ “Dirava ena ladana idia noinoi henia taudia ibounai, be mauri do idia davaria.” To edena bamona Lohiabada do idia noinoi henia diba bema iena Sivarai idia kamonai lasi? Bona bema haroro tauna be lasi neganai, edena bamona do idia kamonai? Buka Helaga dekenai ia torea hegeregerena, ia gwau: “Sivarai Namona ena moale idia mailaia taudia edia aena, be namo herea momokani.” ’ (Roma 10:13-15) Bema Basileia uhe ita hadoa goadagoada, Dirava ese kudou momokani taudia edia lalona ai unai uhe do ia hatubua.—1 Kor. 3:6.
4 Hanaihanai Lou Henia Ita Karaia be Gau Badana: Taunimanima haida sibona ese haroro sivaraina idia kamonai teritori ai, ita davaria kamonai taudia edia ura ita habadaia be namo, herevana buka o magasin ita rakatania eiava lasi. Karaharaga ita laloa anina do ia vara lasi be mai badina ta lasi, ani? Uhe ita hadoa neganai, ita diba lasi edeseniai do ia tubu. (Had. 11:6) Bema ita hegaegae namonamo bena ita giroa lou Baibel ena hereva ta ita gwauraia totona, ena be hereva kwadogina sibona, reana kamonai tauna ena kudouna do ia hamarerea. Pepapepa ta ita rakatania diba eiava magasin matamata ita hariharilaia. Gabeai, reana Baibel stadi dalana ita hahedinaraia diba. Mai eda moale ida do ita hoa, Iehova ese iseda hekwarahi ia hanamoa neganai.—Sal. 126:5, 6.
5 Hahine ta ia kamonai sisina bena pepapepa ta idia henia. Idia davaria lou lasi ela bona hua rua murinai, bona unai neganai ia bisi bada herea dainai idia herevahereva lasi. Guna idia rakatania pepapepana ma ta idia henia lou. Ena be pablisa ia hekwarahi bada do ia davaria totona, to hua toi idia ore murinai ia davaria, bona unai neganai ia gorere. Pura ta murinai unai taihu be ia giroa lou, bona pepapepa idia herevalaia sisina. Pura ta murinai taihu ia giroa lou neganai, unai hahine ia ura bada Basileia ena sivarai ia kamonai. Ena mauri lalonai ena noho ia idau dainai ia lalo-parara lauma dalanai ia dabu. Baibel stadi idia hamatamaia, bona unai murinai pura ta ta ibounai mai ena ura ida ia stadi.
6 Gau ta ena tubu ita ura itaia neganai, herevana ia be palaoapalaoa, uma aniani, eiava Basileia ena sivarai kamonai henia urana, namona be ita gaukara goadagoada. Unai dainai nega ita atoa, ita hekwarahi, ita laloa bada, bona ita lalo-goada do ita hesiku lasi totona. Lagani gunanai, taunimanima 338,000, edia lalona ai Basileia ena uhe ia tubu taudia unai, be bapatiso idia abia! Bema ita haroro noho, iseda haroro sivaraina do idia kamonai henia taudia momo do ita davaria.—Galatia 6:9 itaia.