Hebouhebou Edia Program Matamata
1 February dekenai do ia matamaia program ena sinado be “Henia Karana Ena Moale Bada Oi Mamia.” (Kara 20:35) Hari inai negai, taunimanima momo idia ura dala idauidau ai mauri amo moale idia abia, bona idia abia neganai, ia noho daudau lasi. Unai be moale korikorina lasi. To, Iehova ese sibona ita hanamoa dalana korikorina ita ia hadibaia. (Isa. 48:17; 1 Ioa. 2:17) Sekit hebouhebou ena program matamatana ese lauma dalanai ita henia karana amo moale bada ita abia dalana ia herevalaia badabada. Haroro gaukara lalonai sibona ita henia diba dala namodia do ita kamonai.
2 “Iehova ese Ia Hadibaia Taudia ai Umui Lao” be February dekenai do ia matamaia dina tamona hebouhebouna ena program matamatana ena sinado. (Ioa. 6:45) Iehova ese ita ia hadibaia amo mauri mai anina ita abia momokani. Ia ese iseda lalona ai iseda ahuna lauma dalanai ita laloa bada karana ia habadaia. Unai program ese Dirava ena hahediba ena namo bona tanobada ena aonega ia havaraia dika ia hahedinaraia. Do ita itaia goevagoeva Iehova ese edukeisini hereadaena ia henia—unai edukeisini be ena Hereva, Baibel amo. Tomadiho karana ena kahana toi ia herevalaia goadagoada, idia lalonai ita moale bada badina Dirava ese ita ia hadibaia dainai. Ma danu, matamata taudia do idia hagoadaia Baibel lalonai idia noho haheitalai namodia, Davida bona Timoteo bamona taudia, edia kara do idia tohotohoa bona lauma gaudia be edia mauri lalonai do idia laloa bada. Buruka taudia edia badinaia karana idia hahedinaraia neganai, unai ese iseda abidadama do ia hagoadaia.
3 Sekit hebouhebou ena pablik tok ena sinado be “Dirava Ena Moale Taudia ida Umui Hebou.” Hari inai negai, taunimanima ese maino korikorina bona moale hanaihanai idia davaria lasi inai tanobada ena gavamani, Satani ese ia biagua gavamanidia henunai. (Had. 8:9) To moale bada do idia davaria Iehova ena moale taudia ida idia hebou neganai! (Sal. 144:15b) Dina tamona hebouhebouna ena hereva badana ena sinado be “Iehova ese Iena Ura Karaia Dalana Ita Ia Hadibaia.” Ita ibounai diba ita abia noho, abidadama dekenai ita gini goada, bona lauma dalanai ita tubu noho ena badina do ia hahedinaraia. Ita do idia hagoadaia Iehova ena kara ita tohotohoa, anina be mauri dekenai ita ia hakaua lao hereva momokanina be ma haida dekenai do ita hadibaia. Hagoadaia ekspiriens momo amo do ita itaia Society ena buka ese momo idia durua Iehova ese ia hadibaia taudia ai idia lao totona.
4 Sekit hebouhebou eiava dina tamona hebouhebou dekenai idia ura bapatiso taudia be kongregesen ena gunalaia tauna do idia hadibaia be namo, bena ia ese dala do ia karaia elda taudia be idia ida bapatiso henanadai do idia herevalaia totona. Dala goevana dekenai Iehova idia hesiai henia karana amo bapatiso matamata taudia ese moale bada do idia abia.
5 Mani oi hegaegae sekit hebouhebou bona dina tamona hebouhebou dekenai do oi lao totona. Kamonai taudia ibounai oi hagoadaia do idia mai totona. Lauma dalanai henia karana ena moale bada idia mamia taudia bona iseda Hadibaia Tauna, moale Diravana, ese gau namodia momo ia hadibaia noho taudia be do idia lalohisihisi lasi.—Isa. 30:20; 1 Tim. 1:11.
This article is unique to PNG.