Dirava Ena Hereva ese Ita Ia Hakaua
1 “Hari inai nega lalonai tanobada be Dirava ena ura hegeregerena idia noholaia, a? Momokani, tanobada ibounai lalonai idia noho. To, ia karadia Diravana ena ura hegeregerena bese tamona bamona idia noho mai edia moale danu, a? Lasi, ani? Tanobada taudia idia parara. Badu, taravatu utua karadia bona tuari idia vara. Taunimanima milioni momo idia hitolo bona idia gorere. Ma haida be ruma, gaukara bona moni dainai idia lalo-hekwarahi. Unai ese Dirava ena ladana ia hadikaia bona ia hahedinaraia tanobada be Dirava ena ura hegeregerena idia noholaia lasi.”
2 Unai hereva be Mauri Hanaihanai Paradaiso Lalonai bukana ena karoa ginigunana ena paragraf ta amo. Lagani 14 gunanai buka idia halasia neganai unai hereva be mai anina to hari inai negai ena anina be bada herea. Dirava ena Hereva ese ita ia hakaua bona iseda hekwakwanai ibounai kokia dalana ia hahedinaraia, taunimanima ese unai idia diba be gau badana. December lalonai taunimanima ita durua dalana badana be Mauri Hanaihanai bukana do ita hariharilaia, ena davana be K2.00. Bema ia namo, Dirava Ena Hereva Eiava Taunimanima Edia? bukana ita hariharilaia diba danu, ena davana be K1.50. To, ta dekenai buka ita rakatania ese ia hamomokania lasi Dirava ena hakaua dalana do ia abia dae. Namona be ita lou henia Baibel stadi ita hamatamaia totona. Bema unai bamona ita hekwarahi heduru do ita abia. (Mat. 28:19, 20) Haroro herevadia haida be iniseniai idia noho:
3 Bema buruka tauna oi davaria, inai hereva do oi tohoa diba:
◼ “Mani oi lau nanadaia: Oi matamata neganai, taunimanima be edena bamona idia kara heheni? [Haere naria.] Hari ia idau momokani, ani? Oi laloa taunimanima edia kara ia idau ia lao ena badina be dahaka? [Haere naria.] Unai ia vara neganai ita itaia Baibel ena peroveta herevana ia guguru. [2 Timoteo 3:1-5 duahia.] Baibel ese hari tanobada ena kara ia hahedinaraia maoromaoro, bona nega sisina murinai ia vara tanobada namona ia gwauhamatalaia danu. Unai dainai taunimanima ibounai ai hagoadaia Baibel do idia duahia totona.” Mauri Hanaihanai bukana hahedinaraia bona karoa 18 herevalaia, ia ese dina gabedia edia peroveta herevadia ma haida, edia guguru dalana ita itaia herevadia unai, ia hahedinaraia. Buka hariharilaia, ena davana be K2.00, bona hahedinaraia unai buka ese ta ia durua Baibel dekenai ia duahia gaudia do ia lalo-pararalaia totona. Oi hamaoroa do oi giroa unai hereva do umui kikilaia lou totona.
4 Ia dekenai buka oi rakatania buruka tauna oi lou henia neganai, oi gwau diba:
◼ “Guna ita hereva neganai, inai gauna dekenai ita lalo-tamona, hari tanobada maurina be lagani haida gunanai ena mauri ida ita hahegeregerea neganai, ita itaia dala momo ai ia dika ia lao. To, lau ura oi dekenai lau hahedinaraia Baibel ese nega vairai tanobada namona ita abia diba ia gwauhamatalaia. [Apokalupo 21:3, 4 oi duahia.] Ita abia dae unai be Dirava ena Hereva dainai, namona be unai ese ita ia hagoadaia Baibel ena hereva ma haida do ita duahia totona.” Mauri Hanaihanai bukana ena karoa 19 kehoa bona laulau ese idia hahedinaraia hahenamodia herevalaia. Davana lasi Baibel stadi hahedinaraia.
5 Bema matamata tauna ida oi herevahereva, oi gwau diba:
◼ “Lau ura henanadai ta oi dekenai lau henia: Oi matamata dainai oi laloa gabeai do idia vara gaudia dainai oi lalo-moale ena badina ia noho, a? Nega vaira be edena bamona oi laloa? [Haere naria.] Nega vaira be mai lalo-moale ida ita laloa ena badina badana ia noho. [Salamo 37:10, 11 duahia.] Taunimanima edia lalohadai be idauidau dainai, inai buka, Mauri Hanaihanai Paradaiso Lalonai, ai halasia. Mani oi itaia, ia ese Baibel ita duahia bona ita stadilaia ena badina ia gwauraia. [Rau 15 ai paragraf 18-19 duahia.] Ita abia dae Baibel ena hereva be momokani neganai, nega vaira ena helaro korikorina ita abia. Bema inai buka oi ura duahia, mai moale ida ta do lau rakatania, ena davana be K2.00.”
6 “Mauri Hanaihanai” bukana ia abia matamata tauna oi lou henia neganai, reana inai hereva amo do oi matamaia:
◼ “Lau moale badina oi gwau nega vaira oi laloa bada. Reana oi laloatao Baibel ena hereva ta lau hahedinaraia, ia gwauhamata nega vaira ai moale bona maino do ita davaria diba. Siri namona ma ta be inai. [Apokalupo 21:3, 4 duahia.] Oi dekenai lau rakatania bukana ese ia hamomokania Baibel be Dirava ena Hereva, ia be taunimanima edia hereva lasi. Unai dainai kara ta ita karaia be namo. Mani oi itaia unai kara be dahaka? [Rau 48 ai paragraf 6 duahia.] Lau be mai moale ida oi danu Baibel do lau stadilaia, davana lasi, bema oi ura neganai.” Bema stadi ia abia dae, oi nanadaia ia be mai ena Baibel eiava. Bema Baibel ia noho lasi, oi gwau ta do oi mailaia diba.
7 Mauri ena hekwakwanai haheaukalaia totona hakaua herevadia ia davaria gabuna ia daradaralaia tauna be reana inai hereva ia ura henia:
◼ “Hari ita noho negana lalonai, kahirakahira taunimanima ibounai be hekwakwanai badadia idia davaria. Momo be hadibaia taudia idauidau dekenai idia lao heduru idia abia totona. Haida be meamea taudia amo heduru idia tahua. Oi laloa edeseniai ita lao diba sisiba namona ita davaria totona? [Haere naria.] Baibel ese mai anina bada herevana ta ia gwauraia, ita ibounai ese unai ita lalo-pararalaia be namo.” Ieremia 10:23 oi duahia. Buka Helaga—Dirava Ena Hereva Eiava Taunimanima Edia? bukana kehoa rau 187 dekenai, bona paragraf 9 duahia. “Inai buka ese oi do ia durua bena do oi diba, Dirava ena Basileia henunai, iseda hekwakwanai ibounai do idia ore. Bema oi ura duahia, mai moale ida inai kopi lau rakatania diba oi dekenai, ena davana be K1.50.” Bema ia abia dae, oi gwau do oi giroa lou.
8 Bema ta ese taunimanima ia hakaua be namo oi herevalaia guna, reana oi lou henia neganai inai bamona do oi gwau:
◼ “Guna ita hedavari neganai, ita lalo-tamona Dirava ese ita ia hakaua be gau badana, mauri ena hekwakwanai ita haheaukalaia totona. Lau laloa lau rakatania buka ena hereva dokona do oi moalelaia, ia ese unai gauna ia herevalaia. [Dirava Ena Hereva bukana ena rau 189 ai paragraf 12-13 duahia.] Mai moale ida lau ura davana lasi Baibel stadi kosi ta oi dekenai lau hahedinaraia, bona lau hegaegae harihari unai lau karaia totona.”
9 Buruka taudia bona matamata taudia be Dirava ena Hereva bona ena hakaua dalana ena namo idia laloa bada totona ita durua neganai, Iehova ese iseda hekwarahi do ia hanamoa.—Sal. 119:105.