“Mauri Hanaihanai be Inai”
1 Iesu ena hereva Ioane 17:3 ai ita laloa bada be namo. Ena hereva be momokani—Dirava bona Keriso ita diba amo mauri hanaihanai ita abia! To Iehova bona Iesu ita diba sibona dainai ena davana mauri hanaihanai do ita abia, a? Lasi. Israela taudia idia diba Iehova be edia Dirava, to edia mauri ese unai diba ia hamomokania lasi. Unai dainai, idia ese ena lalo-namo idia haboioa. (Hos. 4:1, 2, 6) Hari inai negai taunimanima milioni momo be reana “Dirava ena hesiai gaukara idia ura karaia namonamo, to karaia dalana be idia diba lasi.” (Roma 10:2) Namona be idia ese Iehova, “Dirava momokani tamona,” idia diba, bona ena hesiai gaukara karaia dalana maorona idia diba danu. Unai totona, November lalonai Diba ese Mauri Dekenai Ita Ia Hakaua Lao bukana do ita hariharilaia. Edena hereva do oi gaukaralaia Diba bukana oi hariharilaia neganai? Oi idia durua diba haheitalai haida be inai:
2 Tanobada ai mauri hanaihanai lalohadaina be momo idia do kamonai lasi dainai, reana inai hamatamaia herevana ese edia lalona ia veria diba:
◼ “Emai dekena taudia dekenai henanadai ta ai henia. Bema oi idia boiria inai bamona tanobada dekenai do oi mauri hanaihanai totona, do oi abia dae, a? [Diba bukana ena rau 4-5 ai ia noho laulau oi hahedinaraia. Haere oi naria.] Inai bamona mauri do oi abia diba. To oi laloa dahaka oi karaia be namo, oi dekenai unai do ia vara totona? [Haere oi naria.] Ioane 17:3 ia gwauraia karana mani oi laloa. [Duahia.] Inai buka ese momo ia durua unai diba namona idia abia totona. Oi ura emu kopi ta oi abia, oi duahia totona, a? [Buka oi hariharilaia, ena davana be K1.50.] Do lau giroa mai neganai, dahaka dainai inai tanobada dekenai do ita mauri hanaihanai diba herevana ita abia dae be maoro do ita kikilaia.”
3 Ioane 17:3 oi herevalaia taudia dekenai oi lou henia neganai, reana inai bamona oi gwau:
◼ “Guna lau vadivadi neganai, Iesu ena hereva namona Ioane 17:3 dekenai lau duahia, unuseniai ia gwau Dirava bona ia ita diba amo mauri hanaihanai do ita abia. To taunimanima momo idia laloa mauri namona be guba sibona dekenai do ita abia. Dahaka oi laloa? [Haere oi naria.] Bema lau rakatania bukana oi abia diba, Paradaiso be tanobada dekenai do ia mai lou lalohadaina idia hamomokania Baibel siri haida do lau hahedinaraia diba. [Diba bukana ena rau 9-10 ai idia noho paragraf 11-16 oi herevalaia.] Do lau giroa mai neganai, lau ura Baibel dekenai ita davaria gwauhamata ita abidadama henia diba ena badina lau hahedinaraia. Lau do giroa lasi neganai, reana oi ese karoa 2 be oiemu buka lalonai oi duahia diba.”
4 Inai hereva be tomadiho idia laloa bada taudia dekenai reana oi gwauraia diba:
◼ “Dahaka dainai tanobada ena tomadiho be momo herea herevana be emai dekena taudia ida ai herevalaia. Papua New Guinea sibona dekenai tomadiho idauidau be 50 ma haida idia noho, bona tanobada hegegemadai ai be 10,000 ia hanaia. To, Baibel be tamona sibona. Inai tomadiho daradaralaia ena badina be dahaka? Dahaka oi laloa? [Haere oi naria. Diba bukana ena karoa 5 oi kehoa, bona paragraf 1 oi duahia.] Inai karoa oi duahia amo unai henanadai edia haere namodia do oi abia. Lau moale bema inai buka lau rakatania diba oi stadilaia totona.” Buka oi hariharilaia, ena davana be K1.50. Bema ia abia dae, do oi lou henia dalana oi karaia, bona oi gwau: “Do lau giroa mai neganai, reana do ita herevalaia diba gauna be tomadiho idauidau be dala idauidau sibona gabu tamona dekenai idia lao, eiava.”
5 Dahaka dainai tomadiho be momo herea herevana umui herevalaia noho totona oi giroa neganai, reana inai bamona oi gwau:
◼ “Guna oi dekenai lau hereva neganai, egu henanadai be inai: Tomadiho idauidau be dala idauidau sibona gabu tamona dekenai idia lao, eiava? Dahaka oi laloa? [Haere oi naria.] Lau rakatania bukana amo lau ura Iesu ena hereva unai lalohadai dekenai lau hahedinaraia. [Diba bukana ena karoa 5 oi kehoa, bona paragraf 6-7 oi duahia, bona Mataio 7:21-23 danu oi duahia.] Reana oi daradara dahaka dainai Dirava ena ura ita diba namonamo be gau badana. Do oi davaria idia noho paragraf ma haida ese diba namona idia henia. Mani inai karoa ena orena oi duahia. Do lau giroa mai neganai, lau moale bema Baibel dekenai diba maorona ena namo lau hahedinaraia diba.”
6 Nega momo Baibel stadi hamatamaia dalana namona be maoromaoro Baibel stadilaia herevana oi gwauraia. Iniseniai be “Herevalaia” bukana ena rau 11 dekenai ia noho hamatamaia herevana:
◼ “Lau mai, Baibel stadi kosi ta oi lau hamaorolaia totona. Ia be davana lasi gauna bona emu ruma dekenai do ita karaia diba. Bema emu lalona be hegeregere, harihari, nega sisina sibona lalonai, inai Baibel stadilaia dalana do lau hahedinaraia oi dekenai. Tano 200 bamona lalodiai ruma bese momo ese inai dala amo Baibel idia stadilaia. Inai hereva ta ita herevalaia diba. [Diba bukana ena karoa edia lista oi hahedinaraia.] Oi ura edena hereva ita tahua?” Oi naria ia ese ta ia abia hidi. Unai karoa dekenai buka oi kehoa, bona paragraf ginigunana amo stadi oi hamatamaia.
7 Maoromaoro stadi hamatamaia dalana ma ta inai, oi tohoa diba:
◼ “Lau ese Baibel stadi lau karaia davana lasi, bona egu sediual ia hegeregere stiuden ma ta lau abia totona. Ai ese inai Baibel stadi bukana ai gaukaralaia. [Diba bukana oi hahedinaraia.] Unai kosi ena lata be hua haida sibona bona inai bamona henanadai edia haere ia henia: Dahaka dainai Dirava ese hisihisi ia koua lasi? Dahaka dainai ita buruka ita lao bena ita mase? Dahaka ia vara iseda lalokau mase taudia dekenai? Bona edena bamona Dirava kahirakahira ita lao diba?” Bena oi nanadaia, “Oi dekenai stadi lau hahedinaraia diba, a?” Bema stadi ia ura lasi, oi nanadaia bema ia ura Diba bukana ia abia ia duahia totona. Buka oi hariharilaia, ena davana be K1.50.
8 Dirava bona Keriso idia diba taudia ta ta dekenai unai diba be kohu namo hereana bamona! Unai diba idia abia amo tanobada goevadaena ai mauri hanaihanai do idia abia diba. Namona be November lalonai nega ibounai ai taunimanima dekenai mauri hanaihanai dekenai ita ia hakaua lao dibana ita hariharilaia.