Taunimanima be Iseda Gaukara Idia Laloa Maragi Neganai, Edena Bamona Oi Kara?
1 Laloa maragi karana be ta ese gau ta ia mamia momokani lasi, ia ura lasi eiava ia laloa bada lasi karana. Unai kara idia hahedinaraia taudia be nega momo ita davaria iseda haroro gaukara lalonai bona unai laloa dalana idia hanaia be auka. Ia vara neganai edena bamona oi kara? Unai kara ese emu haroro gaukara ia hamaragia, a? Edena dala ai unai kara oi hanaia bena taunimanima dekenai Basileia sivarai namona do oi harorolaia diba?
2 Gau ginigunana be, dahaka dainai emu teritori dekenai taunimanima be iseda gaukara idia laloa maragi ena badina oi tahua. Ena badina be idia moale lasi edia politikol bona tomadiho gunalaia taudia dekenai, a? Idia laloa idia davaria hekwakwanai haorea dalana be lasi, a? Gau namona ta ena gwauhamata idia abia dae lasi, a? Lauma gaudia idia ura lasi idia laloa bema edia namo idia itaia maoromaoro lasi, a?
3 Basileia Helarona Oi Hahedinaraia: Basileia ia hegeregere hekwakwanai iboudiai hanamoa totona. Unai dainai nega ita davaria neganai, namona be Basileia ena gwauhamata ita herevalaia bona bema Baibel ena hereva ta oi duahia diba lasi, ena hereva badadia oi gwauraia hedinarai. (Heb. 4:12) To, edena bamona unai herevahereva dalana ita hamatamaia diba?
4 Namona be taunimanima ese iseda vadivadi ena badina idia lalo-pararalaia. Namona be idia diba unai ita karaia badina iseda dekena taudia ita lalokau henia bona iseda noho gabuna ita laloa bada dainai. Inai bamona henanadai namona ita gwauraia diba, “Dahaka oi laloa, edena bamona gauna be inai hekwakwanai [emu noho gabuna ai ia vara gauna] ia hanamoa diba?” Bema unai hamatamaia herevana ia namo lasi, hereva idauna ta oi tohoa.
5 Taga taudia idia noholaia gabuna ta dekenai taunimanima be Basileia sivaraina idia laloa maragi dainai, pablisa taudia ese edia lalona do ia veria hamatamaia herevana idia tahua. Tau ta mai ena adavana ida ese Diba bukana idia hariharilaia neganai, inai hamatamaia herevana idia tohoa: “Oi laloa edukeisini namona be mai anina bada gauna hari tanobada dekenai, ta ia kwalimu totona, a? Oi laloa edukeisini namona ena kahana ta be Baibel ita diba, a?” Adorahi tamona lalonai buka toi idia hariharilaia, bona buka ta ia abia hahinena ta be gabeai ia gwau Diba bukana ibounai ia duahia, bona ia ese Baibel stadi ia abia dae.
6 Bema oi davaria taunimanima be iseda gaukara idia laloa maragi, namona be hamatamaia herevadia idauidau, lalona veria henanadai, bona Dirava ena Hereva ena siahu oi gaukaralaia. Unai amo reana oi ese ma haida do oi durua diba Basileia helaro namona idia abia dae totona.