“Lau Ura Lasi”
1 Gabu haida dekenai momo be ita dekenai unai bamona idia hereva. Bema teritori dekenai ita davaria taudia idia ura lasi kamonai, dahaka ese ita do ia durua ita lalohisihisi lasi totona? Edena dala ai taunimanima edia ura ita habadaia diba sivarai namona idia kamonai totona?
2 Moale Noho: Bema taunimanima idia kamonai lasi ena badina ita diba, unai ese ita do ia durua ita moale noho totona. Evolusen idia abia dae eiava Dirava idia abia dae lasi besena amo idia mai taudia be Baibel ena hereva idia laloa bada lasi. Ma haida be tomadiho idauidau edia koikoi karadia idia itaia dainai idia lalohisihisi. To haida be reana gau haida dainai idia lalometau dainai do idia ura lasi kamonai. (Efe. 2:12) Bona ma haida be ‘idia laloa lasi’ dainai, mauri ena lalohekwarahi gaudia idia tahua momo.—Mat. 24:37-39.
3 Ena be haida idia kamonai lasi, to haroro gaukara ita moalelaia diba, badina ita diba iseda hekwarahi amo Iehova ita hanamoa. (1 Pet. 4:11) Danu, taunimanima ibounai, iseda hereva idia abia dae lasi taudia danu, dekenai hereva momokani ita herevalaia neganai, unai ese iseda abidadama ia hagoadaia. Namona be iseda teritori ai idia noho taudia be Iehova ese idia ia laloa hegeregerena ita lalodia. Iehova be Nineva taudia ia hebogahisi henia badina, “idia be dahaka be namo bona dahaka be dika idia diba lasi.” (Iona 4:11, NW ) Iseda teritori ai idia noho taudia be sivarai namona idia diba be namo! Unai dainai, ita hesiku lasi to dala ita tahua edia ura ita habadaia totona, unai amo Baibel ena hereva do idia laloa bada.
4 Noho Gabuna ai Idia Vara Gaudia Herevalaia: Reana emu hamatamaia herevana dekenai, ruma tauna ena noho gabuna ai ia vara gauna ta oi herevalaia diba, bona ruma tauna oi noia ena lalohadai ia gwauraia totona. Ruma tauna ia hereva neganai, oi kamonai, bena ia lalohekwarahilaia gauna hegeregerena, Baibel ena hagoadaia hereva oi henia. Witnes tauna ta ena noho gabuna dekenai dika badana ta ia vara murinai, ruma-ta-ruma-ta gaukara ia karaia. Ruma dekenai ia davaria taudia ta ta dekenai ena sori herevana ia gwauraia. Ia gwau: “Taunimanima idia herevahereva matamaia. Unai dina ai, taunimanima momo ida lau herevahereva namonamo, badina lau hahedinaraia edia mauri lau laloa bada.”
5 Taunimanima ese idia davaria hekwakwanai ta ta be Dirava ena Basileia ese do ia haorea. Ruma tauna ia laloa bada hekwakwanai oi herevalaia toho. Unai amo dala do ia kehoa Baibel ena helaro namona oi herevalaia totona. Bema ia ura lasi kamonai, laloa lasi, reana ma nega ta ai do ia ura kamonai.—Kara 17:32.