Ita Moale Haroro Gaukara Ita Karaia Namonamo Dainai
1 Ita ibounai ita moale ita karaia namonamo diba gaudia ita karaia neganai. Mareko 7:37 dekenai taunimanima ese Iesu idia herevalaia, idia gwau: “Gau ibounai ia karaia namo herea.” Unai dainai ita hoa lasi Iesu ia moale Iehova ena ura ia karaia neganai! (Salamo 40:8 itaia.) Bema gabeai idia noho hereva haida ita laloa neganai, moale do ita davaria Iesu ena oda, ‘taunimanima ibounai dekenai ita haroro’ odana ita badinaia neganai. (Kara 10:42) January hua lalonai ita ese davana idia hamaragia 25 toea eiava 50 toea buka do ita hariharilaidia. Edena bamona ita ese unai buka ita gaukaralaidia diba haroro gaukara namona karaia totona?
2 Nega momo taunimanima be gorere hanamoa daladia idia laloa momo dainai, reana inai bamona do oi hereva:
◼“Ena be medikol saiens taudia be nega momo idia kwalimu, to taunimanima momo herea be gorere dainai hisihisi idia do mamia noho. Oi laloa dahaka dainai unai bamona ia vara? [Haere naria.] Iesu Keriso ia gwau, daihanai goreredia be dina dokona ena toana ta. (Luka 21:11) To Baibel ese ia hahedinaraia danu nega ta do ia mai bena gorere be lasi. [Isaia 33:24 duahia.] Mani oi itaia edena bamona inai buka ese iseda helaro Baibel ena hereva badadia dekenai ia habadaia.” Buka amo hereva maorodia oi hahedinaraia, bona buka oi hariharilaia. Oi hahedinaraia ita ese unai buka be davana maragina dekenai ita hariharilaia.
3 Hoihoi gabudia dekenai ita haroro neganai, reana hanamoa herevana ta do oi gwauraia bena oi nanadaia:
◼“Oi laloa hari inai negai gau edia davana idia daekau momokani dainai, nega momo iseda moni be hegeregere lasi, a? [Haere naria.] Oi laloa nega ta do ia mai bena ogogami be do ia ore momokani, a?” Haere naria. Bena oi hariharilaia bukana amo Baibel siri namona ta oi hahedinaraia. Bena oi gwau: “Inai buka ese ia hahedinaraia edena bamona Dirava ese ena Basileia amo hari idia noho hekwakwanai do ia hamaoromaorodia.” Buka oi hariharilaia ena davana korikorina ai. Reana do oi hahedinaraia umui kikilaia gauna oi moalelaia bada, bena oi nanadaia: “Dala ia noho nega ma ta ai inai bamona do ita kiki lou totona, a?” Unai dala amo reana ena telefon namba eiava ruma ena adres oi abia diba.
4 “Maino Bona Noho Namona” bukana oi gaukaralaia neganai, reana inai hereva, tanobada ena maino herevana oi tohoa diba:
◼“Oi laloa dahaka dainai tanobada ena maino ita abia be ia auka? Haere naria. [Apokalupo 12:7-9, 12 duahia.] Tanobada ai maino ia vara diba lasi ena badina ta be, Diabolo be tanobada dekenai idia negea diho. Inai buka ese mai anina bada henanadai momo ia haerelaia, bona lau moale oi dekenai do lau rakatania, ia be mai ena davana maragina. [Buka ena davana oi gwauraia.]”—Unai 25 toea bona 50 toea buka hariharilaia dala namodia oi davaria totona, January 1996, bona November 1995 ena Iseda Basileia Gaukara pepadia edia murina kahana oi itaia.
5 Oiemu hereva idia kamonai taudia oi lou henia neganai, reana Baibel stadi hamatamaia totona inai bamona do oi hereva:
◼“Vanegai ita kiki neganai, oi ese hereva namona ta oi gwauraia. [Ruma tauna ia herevalaia gauna ta oi gwauraia.] Lau be unai lau laloa, bona lau ura ena anina be ma buka haida amo lau tahua hereva haida lau hahedinaraia. [Siri namona ta oi hahedinaraia.] Ai ese davana lasi Baibel stadi kosina ai karaia, unai kosi ese taunimanima milioni momo ia durua nega kwadogina lalonai Baibel ena hereva badadia idia dibaia totona. Unai bamona tahua karana ese oiemu abidadama ia hagoadaia Dirava ena gwauhamata be do idia guguru.” Baibel stadi karana ese do ia haerelaia henanadai haida hahedinaraia. Bema ruma tauna ia ura lasi Baibel stadi ia abia, oi hahedinaraia haraga idia haorea diba kosina ia noho danu, unai kosi be pura ta ta lalonai miniti 15 sibona lalonai ia karaia diba pura 16 lalonai. Dahaka Ita Karaia? buklet oi hahedinaraia, kahana 1 dekenai oi kehoa, bona nanadaia bema kahana ginigunana oi hahedinaraia diba.
6 Boiboi Pepadia Gaukaralaia: Idia oi gaukaralaia diba oiemu hereva oi hamatamaia neganai, unai ese ta ena lalona ia veria lauma gaudia ia laloa totona, eiava unai pepa oi rakatania diba bema magasin eiava buka ta idia abia lasi. Hereva idia kamonai taudia dekenai boiboi pepadia edia murina idia noho hereva oi gaukaralaia idia oi hagoadaia Baibel stadi idia abia dae totona bona iseda hebou dekenai idia mai totona.
7 Oiemu gaukara oi karaia namonamo neganai, do oi moalelaia. Haroro gaukara karaia namonamo, bona mai moale ida hesiai gaukara ena kahana idauidau oi karaia.—1 Tim. 4:16.