Goeva Karana ese Dirava Ena Ladana Ia Hanamoa
1 Taunimanima idia goeva noho totona, Mose ena Taravatu ese kara idauidau ia gwauraia idia badinaia totona. Israela besena be idau badina Taravatu ese ia haganidia lauma dalana ai bona tauanina dalana ai do idia goeva. (Lev. 11:35, 36; 15:1-11; Isa. 52:11) Idia goeva neganai unai ese Dirava ena ladana ia hanamoa bona bese taudia be gorere momo idia davaria lasi.
2 Hari inai negai danu, taunimanima idia diba goeva karana be Iehova ena orea taudia edia kara ta. Ena be unai goeva karana be Iehova ena orea toana, to orea taudia ta ta iboudiai dekenai unai be ia momokani, a? Bema iseda kohu ita atoa namonamo bona iseda tauanina ia goeva karadia ita laloa bada, unai ese ia hahedinaraia Iehova ena taravatu badinaia karana ita laloa bada.
3 Iseda ruma toana be edena bamona? Ita harorolaia Basileia sivaraina ia hadikaia, a? Ita haroro neganai ita gwau tanobada be paradaiso gabuna ai do ita halaoa, to bema iseda ruma toana be ia dika bona rei ita utua lasi eiava ava dikadia ita kokia lasi, reana taunimanima do idia gwau ita koikoi, ani? Bema iseda ruma ena kohu ita atodia namonamo lasi eiava iseda kara idia goeva lasi dainai bonana dikadia idia noho, ita gwau diba lasi ‘gabeai goeva karadia do ita karaia Dirava ena Basileia henunai, nega matamatana lalonai,’ ani?—om rau 130-1.
4 Haroro gaukara totona ita gaukaralaia motuka ena toana be edena bamona? Ena lalona bona ena murina kahana idia goeva dainai taunimanima ese iseda haroro gaukara do idia gwauraia dika lasi, a? Iseda dabua, iseda buka udaia baege, bona iseda toana be edena bamona? Gau ibounai idia goeva dainai taunimanima be idia badu diba lasi, a? Ita sibona eda tauanina bona iseda dabua idia goeva noho totona, namona be dina ta ta iboudiai ita digu bona iseda dabua ita huridia.—w89 12/1 rau 17-19.
5 Bema tadikaka ta be ena tauanina ia hagoevaia namonamo lasi bona ena ruma toana be ia dika dainai taunimanima ese kongregesen idia gwauraia dika, dahaka ita karaia? Reana ia buruka eiava ia gorere dainai unai bamona ia noho, unai dainai mai lalokau danu ia ita durua be namo. Bema ia ita durua unai be hebogahisi karana. Reana tau ta be unai bamona ia noho, to ia diba lasi unai be hekwakwanai gauna; hebogahisi dalana ai sisiba idia henia neganai reana ena kara do ia hamaoromaoroa. Nega ibounai goeva karana idia laloa lasi taudia be idia hegeregere lasi kongregesen dekenai dagi idia abia totona. Momokani, namo lasi elda taudia ese ma haida idia doria sibodia edia taravatu unai kara dekenai idia badinaia totona.
6 Kamonai matamata taudia ita boiria mai iseda Kingdom Hall dekenai lauma dalana ai aniani idia abia totona. Nega momo, iseda Kingdom Hall edia toana idia namo bona gau ibounai idia atoa namonamo dainai mai moale danu ita ura taunimanima ita boiria mai. To, edia toana idia namo noho totona, ita hekwarahi be gau badana. Namona be oiemu Kingdom Hall oi itaia. Helai gaudia, foloa, bona haba idia goeva, a? Mei rumadia idia hagoevaia hanaihanai, a? Bema hanaihanai ita itaia, foloa ia miro eiava haba ena peni ia kokia, reana ita manadalaia bona gabeai ita laloa unai be ia dika lasi. To, vadivadi taudia be nega ginigunana idia vareai bona idia itaia neganai reana idia moale lasi. Namona be ita goada karaia iseda Kingdom Hall ena toana ia namo noho totona, bema nega idia gwauraia unai gabu hagoevaia eiava hanamoa totona, namona be heduru ita henia. Ena be Kingdom Hall haida be uda gaudia amo idia karaia, to edia toana idia namo diba, bona idia hagoevaia bona gau ibounai idia atoa namonamo diba.
7 Ena be ita hereva lasi, to iseda tauanina idia goeva, iseda ruma, motuka, bona Kingdom Hall idia goeva neganai, unai ese Dirava ena ladana ia hanamoa. Iseda haheitalai ia namona dainai haida do ita hahekwakwanaia lasi, to ia hahedinaraia iseda tomadiho be ia goeva bona ia maoromaoro.—1 Kor. 10:31, 32; Iam. 1:27.
This is a repeat of article in km 4/94 taken from km-E 4/94 “Cleanliness Honors God.” Also repeated in 7/02.