August Ena Hesiai Hebou
August 3 Purana
Ane 216
10 min: Kongregesen ena hadibaia herevadia. Iseda Basileia Gaukara pepana amo Hadibaia Hereva haida abia hidi. Papua New Guinea ena bona kongregesen ena April haroro ripoti oi herevalaia.
15 min: “August Ena Hua Danu be Do Ia Idau, A?” Henanadai bona haere. Ibounai hagoadaia August lalonai bona hesiai laganina ena hua ta ta iboudiai lalonai haroro gaukara idia karaia totona.
20 min: “Buklet Oi Gaukaralaidia Taunimanima Edia Lalona Bona Kudouna Oi Veria Totona.” Helai taudia ida kikilaia. Idia hanaia laganidia lalonai taunimanima be Baibel ena anina idia diba totona idia halasia buklet idauidau oi herevalaidia sisina. (Watch Tower Publications Index 1986-1995, rau 652-3 itaia.) Buklet matamatadia hahedinaraia, bona daika be unai buklet ta ta do ia ura abia oi kikilaia. Haheitalai ta eiava rua karaia, buklet rua oi hariharilaia diba, davana be K1.00 eiava buklet tamona oi hariharilaia diba, davana be 50 toea.
Ane 191 bona guriguri.
August 10 Purana
Ane 127
8 min: Kongregesen ena hadibaia herevadia. Akaun ripotina. Pablisa taudia ibounai ese August lalonai haroro gaukara do idia karaia ena tahua gauna herevalaia.
17 min: Kongregesen durua herevana. Eiava “Tama Sina—Emu Natudia Umui Naria.” Elda ta ese hereva do ia henia February 15, 1998, Gima Kohorona, rau 8-11 amo.
20 min: “Goeva Karana ese Dirava Ena Ladana Ia Hanamoa.” Elda ese unai hereva be helai taudia ida ia kikilaia. Nega sisina lalonai sisiba namodia be inai buka bona magasin amo oi gwauraia, December 1, 1989, Gima Kohorona, rau 16-22, bona Noga!, Issue Number 2, 1989, rau 9-13.
Ane 37 bona guriguri.
August 17 Purana
Ane 163
12 min: Kongregesen ena hadibaia herevadia. “Henanadai Mauana” riviulaia.
33 min: “Hahediba Taudia Halaoa Gaukarana Badana Ita Laloa Noho.” Henanadai bona haere. Paragraf 5, 10, bona 11 duahia. Iseda kongregesen dekenai Baibel stadi karaia gaukarana be ia bada ia lao dalana kikilaia. Baibel stadi idia karaia taudia ibounai hagoadaia June 1996 Iseda Basileia Gaukara pepana lalonai idia udaia gauna do idia duahia lou, bena edia hadibaia daladia idia hanamoa diba. Unai udaia gauna ena paragraf 5 bona 25 herevalaia.
Ane 108 bona guriguri.
August 24 Purana
Ane 213
10 min: Kongregesen ena hadibaia herevadia. July 1998 Iseda Basileia Gaukara pepana lalonai ia noho mauana ladana “Taunimanima 3,400!” herevalaia. August hua lalonai Saturday tamona sibona ia do noho dainai, ibounai hagoadaia haroro gaukara lalonai do idia vareai hua ia do doko lasi neganai. Helai taudia oi nanadaidia edena bamona dala ai, maketi ai, eiava gabu ma ta ai idia haroro neganai kamonai tauna ta ena ladana bona adres idia abia diba bena lou henia idia karaia.
20 min: Pioneer Gaukara Haheaukalaia Noho Dalana. Unai hereva be September 15, 1993, Gima Kohorona, rau 28-31 ai ia noho herevana amo. Hekwakwanai idauidau ia haheaukalaia bona painia gaukara ia karaia noho painia tauna ta oi henanadai henia.
15 min: Iseda Basileia Gaukara Pepadia Gaukaralaidia Namonamo. Helai taudia ida kikilaia. Vanegai idia hedinarai herevadia amo, Iseda Basileia Gaukara pepadia lalonai nega korikori ai ita abia herevadia bona edia namo oi hahedinaraia: (1) ita idia doria haroro gaukara ita karaia hanaihanai herevadia; (2) iseda hesiai gaukara helagana lalonai ita idia hagoadaia ekspiriens namodia; (3) sivarai namona ita harorolaia namonamo totona heduru herevadia; (4) iseda teritori lalonai ita hariharilaia diba buka matamatadia ena hadibaia herevadia; (5) haroro ripoti, Basileia harorolaia gaukarana ena heau dalana ia hahedinaraia; (6) Orea Ena Sivarai, tanobada hegegemadai ena gaukara ia ripotilaia; (7) hadibaia herevadia bona sediual ese ita idia hadibaia dahaka gaudia do idia vara; (8) Henanadai Mauana ese ita laloa bada gaudia edia haere ia henia; bona (9) Iseda Basileia Gaukara pepana lalonai idia udaia gaudia haida ese hebouhebou, Baibel bukadia hariharilaia gaukara idaudia, bona dala haida dekenai lauma dalanai ita idia naria namonamo. Ibounai oi hagoadaia Iseda Basileia Gaukara pepa ta ta iboudiai idia duahia, edia heduru herevadia gaukaralaidia, Hesiai Hebou bona haroro gaukara hebou dekenai idia mailaia, bona sibodia edia laiberi dekenai idia atoa, gabeai idia gaukaralaia diba sibodia edia stadi idia karaia neganai.
Ane 210 bona guriguri.
August 31 Purana
Ane 65
12 min: Kongregesen ena hadibaia herevadia. Ibounai oi hamaorodia edia August haroro ripoti do idia henia. Namona be Kongregesen Buka Stadi naria taudia ese idia itaia edia grup dekenai idia noho taudia ibounai ese edia ripoti idia henia badina September 6 ai ripoti do idia duahia. September ena hua lalonai do ita henia gauna herevalaia. Inai henanadai, “Dahaka Dainai Ita ese Dirava Ena Ladana Ita Gaukaralaia be Namo?” ia haerelaia haheitalai kwadogina ta karaia. Diba bukana, karoa 3, paragraf 6 gaukaralaia unai henanadai haerelaia totona.
15 min: “Kongregesen Idia Hakaua Taudia—Kongregesen Gunalaia Tauna.” Kongregesen gunalaia tauna ese ia henia. Iena gaukara idauidau ia gwauraia murinai, ia ese kongregesen taudia ia tanikiu henidia badina idia ese elda taudia idia durua edia mamoe naria gaukarana idia karaia noho lalonai.
18 min: Natudia Durua Hekwakwanai Idauidau Sikuli Dekenai Idia Hanaia Totona. Elda ta ese edia natudia be sikuli dekenai idia noho tama sina rua eiava toi ida inai do ia kikilaia. Sikuli dekenai natudia ese idia davaria momo hekwakwanai idauidau gwauraia, August 8, 1994, Awake!, rau 5-7 dekenai ia gwauraia hegeregerena. Bena, rau 8-10 herevalaia, edena bamona tama sina ese edia natudia idia naria bona edena bamona idia ese sikuli tisa ida idia kiki namonamo diba.
Ane 24 bona guriguri.