Emu Tadikaka Oi Diba Namonamo
1 Tomadiho dekenai iseda tadikaka ita dibaia dalana be idia danu Kingdom Hall dekenai ita hebou mo sibona lasi. Ita be Dirava ena ura ita karaia, bona unai ena anina be lauma dalanai Iesu ita bamoa. (Mar. 3:34, 35) Bona, unai dainai, Keristen kongregesen taudia be ruma bese tamona bamona, lauma dalanai ita be tadikaka bona taihu, bona hahegani ita abia ita lalokau heheni totona. (Ioa. 13:35) Vadaeni, ita be “Dirava ena bese taudia korikori” dainai, namona be ta ta ita diba heheni.—Ef. 2:19.
2 Tadikaka Iboudiai Edia Ladadia Ita Diba be Namo: Oiemu Kongregesen Buka Stadi dekenai tadikaka bona taihu iboudiai edia ladadia oi diba, a? Nega momo grup be ia maragi, bona idia mai taudia haida, eiava iboudiai, oi diba be ia auka lasi. Bema edia ladadia oi diba lasi, oi gwau diba lasi idia oi diba namonamo, ani?
3 Namona be Kingdom Hall dekenai idia mai taudia ma haida, maragidia danu, ita diba namonamo, ani? Reana hanaihanai iseda turadia sibona ita bamodia. Ena be ia kerere lasi bema hanaihanai ita ura henia taudia sibodia ita bamodia, to namo lasi mai moale danu idia mo sibona ita hanamodia bona hagoadaia hereva ita henidia. Namona be iseda lalokau do ‘ita habadaia,’ bona ita goada karaia iseda tadikaka bona taihu iboudiai do ita diba namonamo totona. (2 Kor. 6:11-13) Unai ena anina be edia ladadia do ita diba danu.
4 Namona be kongregesen heboudia dekenai hereva idia henia taudia be idia goada karaia idia mai taudia iboudiai edia ladadia idia diba totona. Platfom amo tadikaka ese haere taudia edia ladadia idia boilaia neganai, haere taudia idia laloa tadikaka ese edia haere idia moalelaia, bona danu, helai taudia ia durudia edia ladadia idia diba totona. Momokani, nega haida vareai matamata taudia eiava vadivadi taudia idia mai hebou dekenai, bona reana tadikaka ese edia ladadia haida idia diba lasi. To, namona be mai edia ura danu idia goada karaia iboudiai edia ladadia idia diba totona, badina unai ese ma haida ia hagoadadia bona ia hahedinaraia taunimanima idia ura henidia.—Roma 1:11, 12.
5 Naria Lasi to Kara Oi Karaia Haida Do Oi Diba Namonamo Totona: Loaloa naria taudia be mai edia dala tadikaka bona taihu momo herea idia diba namonamo totona. Edena bamona unai idia karaia diba? Dala badadia be toi: (1) Nega momo idia ida idia haroro hebou; (2) bema idia hegeregere, taunimanima ese edia ruma dekenai idia boiridia neganai, idia lao; bona (3) idia naria lasi to hebou dekenai tau bona hahine bona natudia danu idia hanamodia.
6 Tadikaka bona taihu momo do oi diba namonamo totona bona emu lalokau oi habadaia daladia oi diba, a? Haida ita boiridia diba ita haroro hebou totona, ani? Ruma-ta-ruma-ta gaukara, lou-henia gaukara, Baibel stadi gaukara, eiava dala dekenai magasin gaukara ita karaia be dala namodia haida do ita diba namonamo totona. Danu, nega ta ta ai, iseda ruma dekenai haida ita boiridia mai ita aniani hebou, eiava ti kavakava ita inua totona be namo. Bema ita naria lasi to vareai matamata taudia eiava idia hemarai momo taudia dekenai ita lao neganai ita hereva henidia totona, lauma dalanai ita hagoadadia bona namo bada ia havaraia.—Kara 20:35; 1 Tes. 5:11.
7 Paulo be ena tadikaka ia diba namonamo. Iena revareva lalodiai idia momo edia ladadia ia gwauraia, bona unai ese ia hahedinaraia ia lalodia momo bona ia lalokau henidia momokani. (1 Tes. 2:17; 2 Tim. 4:19, 20) Bema ita goada karaia tadikaka bona taihu momo ita diba namonamo totona, ita ibounai be hahenamo do ita davaria.
[Questions]
1. Keristen kongregesen dekenai, iseda kara tomadiho tamona taudia dekenai be dahaka bamona?
2. Dahaka dainai Kongregesen Buka Stadi dekenai idia mai taudia edia ladadia ita diba be gau badana?
3. Lalokau ita habadaia bona tadikaka bona taihu do ita diba namonamo dalana be dahaka?
4. Namona be hebou dekenai hereva idia henia taudia be idia goada karaia dahaka do idia karaia totona?
5. Loaloa naria taudia be tadikaka bona taihu momo idia diba namonamo dalana be dahaka?
6. Tadikaka bona taihu momo do ita diba namonamo totona, edena dala idauidau amo iseda lalokau ita habadaia diba?
7. Edena bamona ita diba Paulo be nega ia atoa tadikaka do ia diba namonamo totona?