Sivarai Namona Ita Harorolaia
1 Hahenamo badana ita abia, badina gau namodia edia “Sivarai Namona” ita loalaia dainai! (Roma 10:15) Ita be mai eda hagoadaia sivarai namona, heiriheiri bona lalohisihisi huanai idia noho taudia dekenai ita gwauraia totona. Edena bamona idia ita durua diba, bena idia abia dae ita ese “sivarai namona” ita mailaia?—Isa. 52:7.
2 Sivarai Namona Hegaegaelaia: Iseda herevahereva haroro gaukara lalonai ese anina namona do ia havaraia bema hagoadaia gaudia ita herevalaia badabada. Unai dainai, iseda kiki herevana ita hegaegaelaia bona ita hariharilaia buka eiava magasin ita riviulaia neganai, namona be sivarai ena kahana namodia ita abia hidi. Baibel ese ia gwauraia helaro be mai eda ura bada ida bona abidadama hahedinaraia dalanai ita herevalaia neganai, anina do ita havaraia diba.—Aon. 25:11.
3 Ena be ita hebogahisi, taunimanima ese tanobada dekenai ia bada ia lao dika ese idia ia hadikaia karana idia gwauraia neganai, to namona be idia dekenai taunimanima edia hekwakwanai kokia gauna korikorina, Dirava ena Basileia, ita gwauraia. Iehova ese ‘dagedage taudia do ia halusia momokani’ dinana ita herevalaia neganai danu, ita ura hahedinaraia manau taudia dekenai unai be “Sivarai Namona.” (Isa. 61:1, 2) Ita idia kamonai taudia ita hagoadaia diba, Iehova ese ia karaia gaudia ibounai ese moale bada do idia mailaia bona anina namo hereana do idia havaraia.
4 Mai Moale Korikorina ida Hereva Momokani Hahedinaraia: Taunimanima ese iseda moale toana idia itaia bona abidadama ia hahedinaraia gado regena idia kamonai neganai, idia ura kamonai. Bema gau ibounai do idia namo lalohadaina ita hahedinaraia, iseda kamonai taudia do idia diba ita be ‘Lohiabada ena namo ita laloa noho mai moale danu.’ (Roma 12:12) Unai dainai, reana sivarai namona do idia kamonai haraga. Momokani, badina namona dainai iseda haroro gaukara ena kahana ibounai dekenai hanaihanai laloa dalana namona, bona moale toana ita hahedinaraia.
5 Sivarai namona ena haroro taudia bamona, taunimanima dekenai diba haida ita henia sibona lasi. Iseda haroro gaukarana ese mauri namona ena helaro hari bona vaira negana totona ia henia. (1 Tim. 4:8) Taunimanima ta ta ita davaria neganai, eda laloa dalana namona be eda hereva amo do ia hedinarai bona taunimanima do ia durua sivarai namona do idia abia dae totona. Namona be ita gwauraia herevana bona unai hereva ita gwauraia dalana ita naria namonamo karana amo, kudou-maoro taudia ita hagoadaia, ita harorolaia moale sivaraina namona idia abia dae totona!