‘Dahaka Lau Karaia Diba?’

¹ ‘Dahaka lau karaia diba?’ Ita laloa diba, unai henanadai be Charles Taze Russell ese lagani 1870 ai ia naria Baibel stadi grup maragina lalonai idia noho taudia ese idia laloa. Edia lalo-parara Dirava ena ura dekenai ia bada ia lao neganai, reana unai Baibel stiuden taudia idia laloa edena bamona ma haida idia durua diba, Dirava ena palani idia dibaia totona. Baibel amo idia abia dibana be tanobada ibounai dekenai do idia harorolaia be gaukara badana ta.

² Ita moale diba, badina idia ese unai idia karaia dalana idia davaria. Edena dalana ai idia karaia? Idia ta ta ese edia kahana maragina idia karaia, unai dainai hari, tanobada ibounai dekenai taunimanima ibounai ese Iehova ena Witnes taudia idia diba. Idia be orea ta mai ena Basileia harorolaia taudia kahirakahira milioni 6, tano bona davara ena motumotu 234 dekenai kongregesen 90,000 lalonai idia gaukara!​​—Isa. 60:22.

³ Emu Heduru Bada Oi Henia: Iesu ese dokona negana lalonai do idia karaia gaukara badana ia perovetalaia, bona ita ta ta ese unai gaukara ita durua be gau badana. (Mar. 13:10) Momokani, unai gaukara be idia momo lasi elda taudia dekenai ita rakatania diba lasi; bona haroro gaukara be painia taudia sibona ese idia huaia diba lasi. Momokani, gwauhamata Keristani taudia ibounai ese unai gaukara badana idia karaia be namo. Ita ibounai be dala idauidau dekenai haroro gaukara ita karaia diba. (1 Tim. 1:​12) Herevana iseda gaukara ena bada be edena bamona, to ita sibona bona ma haida ita durua.​​—1 Tim. 4:​16.

⁴ Ita ta ta danu ese dala namodia ma haida amo, eda Keristani tadikakadia dekenai heduru bada ita henia diba. Kongregesen ena hebou idauidau ita durua diba bema hanaihanai hebou ita lao henia bona mai ura bada ida haere ita henia. (Sal. 122:​1, 8, 9) Iseda kahana ita karaia diba kongregesen ia goeva totona. Iseda moni hegeregerena, tanobada ibounai gaukarana ita durua diba. Kingdom Hall hagoevaia gaukarana ita durua diba. Kamonai matamata taudia, matamata taudia, bona buruka taudia durua karana amo, kongregesen lalonai ibounai ese lalokau bona lalo-tamona idia habadaia diba.​​—Kol. 3:​12, 14.

⁵ Unai dainai reana oi henanadai, ‘Dahaka lau karaia diba?’ Ena be reana toana be emu hekwarahi be maragi, to emu kahana oi karaia neganai, heduru oi henia kongregesen ena goada bona namo oi habadaia totona. Unai dala namona amo ita ibounai ese Iehova ena ladana ita matauraia hebou!