Hahenamo ta Matamata Taudia Totona
1 Hari tama bona sina ai idia lao taudia momo be hereva momokani lalonai idia tubu daekau neganai idia moalelaia hahenamo idia laloa lou mai edia moale ida—Gima Kohorona bona Awake! idia hariharilaia. Oi do maragi neganai unai be ia momokani oi dekenai, a?
2 Emu Natudia ida Oi Gaukara: Idia do hegeregere lasi iduara dekenai Baibel idia herevalaia natudia maragidia be magasin idia hariharilaia diba. Unai idia karaia totona, auka lasi kiki hereva kwadogidia idia dibaia be namo. Hereva kwadogina, reana magasin ena laulau idia herevalaia, be ia hegeregere. Ruma taudia momo be iseda matamata taudia amo magasin idia abia dae haraga, bona nega momo inai matamata taudia edia kara momokani bona kara namodia dainai hereva namodia idia gwauraia. Heduru sisina sibona ida, inai gaukara be natudia ese idia karaia namonamo diba, bena Basileia ena sivarai halasia gaukarana idia durua bada. Momokani, natudia idia bada idia lao neganai, edia tama bona sina idia ura idia durua edia haroro daladia idia hanamoa totona.
3 Manuel ena mauri lagani be toi neganai, ruma ta ruma ta haroro gaukara ia karaia matamaia. Ena tama bona sina ese ia idia hadibaia kiki herevana kwadogina ia laloatao totona. Idia danu ia haroro goadagoada, bona magasin, buklet, bona pepapepa momo ia hariharilaia. Nega bona gabu idauidau dekenai ia haroro danu. Nega ta, ena tama sina ese ia idia hakaua lao loaloa uma gabuna ta dekenai moale karadia karaia totona, bona ia sibona be unuseniai idia noho taudia dekenai pepapepa haida ia hariharilaia. Ena be ia do matamata momokani, Manuel ena ura bada haroro gaukara ia karaia totona ese ena tama sina bona kongregesen taudia ibounai ia hagoadaia.—Aon. 22:6.
4 Lagani 2000 Calendar of Jehovah’s Witnesses lalonai ia hedinarai bamona, Saturday ibounai be “Magasin Dina.” Tama sina e, umui ai hagoadaia, emui ura inai gaukara totona umui hagoadaia, bona namona be emui natudia umui durua inai gaukara idia moalelaia hanaihanai totona.