Sivarai Namona Harorolaia—Natudia Dekenai
1 Kongregesen ena hebou bona hebouhebou badadia momo dekenai, uhau, ulato, bona maragidia momo herea oi itaia—unai natudia ese Iehova idia hanamoa. (Sal. 148:12) Unai dainai, namona be ita ta ta ibounai be haroro gaukara dekenai ita davaria natudia ita hadibadia toho Iehova bona iena gwauhamata namodia do idia diba totona. Bema dala ita tahua bona ita hegaegae noho natudia ita haroro henidia totona, do ita durudia diba. Unai ita karaia totona namona be gau haida ita laloa namonamo.
2 Namona be ita goada karaia natudia hadibadia totona badina natudia be Iehova idia lalokau henia diba. Haheitalai haida be Samuel, David, bona Timoteo, idia hahedinaraia matamata taudia ese Iehova idia abidadama henia diba. (1 Sam. 2:18; Sal. 71:17; 2 Tim. 3:14, 15) Hari inai nega lalonai danu natudia haida be unai bamona idia karaia vadaeni.
NATUNA BE IDUARA DEKENAI IA MAI NEGANAI
3 Natuna be iduara dekenai ia mai neganai oi hamaoroa ena tamana o sinana oi ura hereva henia, a? Bema ena tamana o sinana idia noho lasi, unai natuna oi rakatania bena oi lao ma ruma ta dekenai, a? Unai natuna ena mauri be mai anina bada danu. Unai dainai oiemu kiki herevana oi haidaua sisina bona sivarai namona unai natuna mero o kekeni dekenai oi harorolaia totona be namo, ani? Reana ena lalona veria totona do ia mai Paradaisona ena sivarai do oi gwauraia diba, eiava dina vairai dahaka do ia vara oi kikilaia diba ia dekenai. Haheitalai be inai: Natudia momo be Lohiabada ena Guriguri idia diba, unai dainai namona be unai guriguri herevana do ia guguru dalana bona tanobada ena kara do ia idau ita hadibadia diba idia lalo-parara totona.
4 Natuna ita haroro henidia neganai, gau badana be edia tamana bona sinana edia siahu ita matauraia. Ita naria namonamo buka o magasin ita henidia toho neganai. Bema idia do bada lasi, namona be ita nanadaidia, ita gwau: “Oiemu tamana bona sinana idia ura oi sibona be buka oi abia hidi oi duahia totona, a?” Bema idia gwau buka o magasin idia abia diba lasi, to bema hereva idia ura kamonai, vadaeni ita haroro henidia diba, bena lou henidia totona nega ita gwauraia, edia tamana bona sinana idia noho negana unai. Inai dala amo reana edia tamana bona sinana do ita durudia diba danu.
5 Bema ita hegaegae bona dala ita tahua natudia haroro henidia totona, unai ese ia hahedinaraia ita diba natudia idia tahua gaudia be ita dekenai idia noho. Iehova ena orea ese buka namodia idia halasidia, bona unai buka edia hereva ese lagani idauidau natudia iboudiai idia durudia diba. Natudia maragidia ese Hadibaia Tauna Badana Ita Kamonai Henia bukana bona Lau Egu Bible Sivarai Buka idia ura henidia bada. Memero Kekeni bona Ruma Bese bukadia lalonai hereva momo idia noho uhau bona ulato durudia totona. Danu Gima Kohorona bona Noga! magasin lalodiai heduru herevadia be momo! Noga! magasin lalonai “Matamata Taudia Idia Henanadai . . . ” bona Gima Kohorona magasin lalonai Iesu ena Mauri bona Gaukara sivaraidia do ita hahedinaraidia, natudia idia duahidia totona be namo herea. English gado dekenai unai magasin rua lalodiai idia karaia laulaudia edia kala be 4, bona natudia edia lalona idia veria bena idia itaia hoa gaudia iboudiai ia havaraia Diravana idia ura diba. Danu mai edia kala idauidau buklet, hegeregere Mauri Hanaihanai Tanobada Dekenai Oi Abia! idia karaia. Unai dainai haroro totona oi hegaegae neganai, namona be natudia do idia ura henia gaudia oi abidia loaloa danu.
6 Iehova ese hahemaoro do ia mailaia neganai, “uhau, ulato, memero kekeni danu” edia kara hegeregerena davana do ia henidia. (Esek. 9:6) Lagani momo lalodiai Iehova idia tomadiho henia taudia haida ese edia maragi negana lalonai hereva momokani idia abia dae, unai dainai gau badana be haroro dekenai natudia ita davaridia neganai ita haroro henidia be namo. Iesu ia karaia hegeregerena lalokau ita hahedinaraia bona unai amo sivarai namo ena hahenamo idia dekenai ita harorolaia diba. (Mat. 19:14, 15) Namona be ita goada karaia bona dala namona amo natudia do ita haroro henidia, bena reana idia danu be Iehova ena hanamoa taudia ai do idia lao diba.
[Questions]
1. (a) Hari inai nega lalonai Salamo 148:12 ena hereva be edena dala amo ia guguru noho? (b) Ita be mai iseda dala dahaka ita karaia totona?
2. (a) Dahaka dainai ita goada karaia natudia hadibaia totona? (b) Edena matamata taudia edia haheitalai amo ita diba natudia be Iehova idia abidadama henia diba?
3. Dahaka do ita karaia natuna ta be iduara dekenai ia mai neganai?
4. Iduara dekenai natudia ita haroro henidia neganai, dahaka dainai bona edena dala amo edia tamana bona sinana edia siahu do ita matauraia diba?
5. (a) Magasin lalodiai dahaka sivarai idia namo natudia idia duahidia totona? (b) Haroro totona ita hegaegae neganai dahaka ita abia natudia durudia totona?
6. (a) Iehova ese daidia do ia hahemaoro henidia? (b) Mataio 19:14, 15 lalonai Iesu ese edena haheitalai namona ia karaia ita tohotohoa totona? (c) Dahaka dainai natudia ita haroro henidia be namo?