Iehova Ena Haheauka Karana Oi Laloa Bada, A?
1 Bema Iehova be idia hanaia vadaeni lagani 10, 20, bona ma haida lalonai ia haheauka lasi bona nega ia henia lasi haroro gaukara idia habadaia totona, hereva momokani oi dibaia diba, a? Ita moale bada badina nega ia henia taunimanima ma momo ese ‘dika dekena amo edia lalona idia giroa’ totona. To, Iehova ena kota badana dinana be “do ia ginidae, henaoa tauna ia ginidae bamona.” (2 Pet. 3:9, 10) Unai dainai, namo lasi Dirava ena haheauka karana ita laloa kerere bona ita gwau inai nega ena dokona be do ia mailaia haraga lasi.—Hab. 2:3.
2 Taunimanima Oi Hebogahisi Henia: Iehova ena haheauka karana ita lalo-pararalaia diba lasi. To namona be ena badina ita laloaboio lasi. (Iona 4:1-4, 11) Iehova ese taunimanima edia noho dikana ia itaia bona idia ia hebogahisi henia. Iesu danu be unai bamona ia mamia. Ia haroro henia taudia hutuma ia hebogahisi henia dainai, ia ura unai evanelia gaukara idia habadaia, unai amo dala do ia kehoa momo ese mauri hanaihanai do idia abia diba.—Mat. 9:35-38.
3 Lalohisihisi gaudia bona dika idia vara neganai, hereva momokani idia diba lasi taudia edia hemami ita laloa diba, ani? Hari inai nega lalonai, taunimanima be ‘naria tauna be lasi mamoe hegeregerena,’ badina idia hekwarahi tanobada dekenai ia vara dika idia haheaukalaia bona idia lalo-pararalaia totona. (Mar. 6:34) Sivarai namona ita harorolaia goadagoada karana amo, kudou-maoro taudia ita hagoadaia diba bona Iehova ena haheauka karana ita laloa bada karana ita hahedinaraia.—Kara 13:48.
4 Iseda Gaukara be mai Anina Bada: Vanegai lagani lalonai, taunimanima 323,439 be bapatiso idia abia bona 14,000,000 mai kahana be Memorial dekenai idia lao. Inai tanobada dikana ena hadikaia ore negana amo do idia roho mauri diba taudia edia namba ia bada ia lao diba! “Hutuma bada herea” ena bada be edena bamona, ita diba lasi. (Apok. 7:9, NW ) Iseda hahegani haroro gaukara ita karaia totona ena daudau be edena bamona, ita diba lasi. To Iehova ia diba. Sivarai namona do ita harorolaia Iehova ena ura hegeregerena, bena “dokona be do ia ginidae.”—Mat. 24:14.
5 Nega be ia kwadogi, bona Dirava ena dina ia kahirakahira momokani. (1 Kor. 7:29a; Heb. 10:37) Ita daradara lasi, “ita abidadama henia hamatamaia nega dekenai iseda hamauria be do daudau, to harihari iseda hamauria be ia kahirakahira vadaeni.” (Roma 13:11) Dirava ena haheauka karana ena badina ita lalo-pararalaia be namo. Mai karaharaga lalohadaina ida ita haroro be namo, unai amo kara maoromaoro idia ura henia taudia momo be Iehova ena hebogahisi bada do idia mamia diba.