“Abidadama Ena Heau Helulu Do Oi Heaulaia”
1 Aposetolo Paulo ese Timoteo ia hagoadaia ‘mai ena goada ibounai danu abidadama ena heau helulu ia heaulaia’ totona. (1 Tim. 6:12) Paulo ese unai hereva ia badinaia. Ena mauri ena dokona lalonai, mai ena momokani ida ia gwau ia ese tuari namona ia tuarilaia vadaeni. (2 Tim. 4:6-8) Dala ibounai dekenai, ena hesiai gaukara ia karaia mai ena gari lasi, bona haheauka ida. Iena haheitalai ita badinaia karana amo, iseda lalona ai do ita diba momokani ita danu be mai iseda goada ibounai ida iseda Keristani abidadama ena tuari ita tuarilaia.
2 Iseda Goada Ita Gaukaralaia: Haroro gaukara lalonai Paulo ia gaukara goada. (1 Kor. 15:10) Iseda teritori lalonai lalo-namo taudia ita tahua neganai, ita danu ita gaukara goada. (Mat. 10:11) Idia haida ita davaria totona, reana ena anina be dabai momokani ita toreisi bona dala dekenai ita davaria taudia ita haroro henidia. Eiava, reana ena anina be adorahi ai do ita gaukara, taunimanima be edia ruma dekenai idia giroa lou murinai idia ita davaria totona.
3 Sibona ita biagua namonamo bona sediual namona ita badinaia neganai, haroro hebou dekenai nega korikori ai do ita ginidae diba. Hegeregere, pablisa bona famili haida be PMV momo idia abia bona gabu daudau sisina amo idia mai to nega korikori ai idia ginidae. Unai bamona gaukara goadagoada karana bona gau ibounai hegaegaelaia namonamo karana ita tohotohoa be namo.
4 Namona be ita davaria kamonai taudia ibounai ita lou henia. Ena be dala dekenai eiava nega bona gabu idauidau ai buka bona magasin ita henia, namona be ita goada karaia unai tauna ena adres eiava ena telefon namba ita abia. Bena ena ura habadaia totona ita hekwarahi Baibel stadi ita hamatamaia totona.
5 Haroro Gaukara Karaia Hanaihanai: Paulo be haroro gaukara ia karaia hanaihanai bona ia karaia namonamo. (Roma 15:19) Oi be edena bamona? Hanaihanai haroro gaukara oi karaia, a? Inai hua lalonai haroro gaukara oi karaia, a? Kongregesen ena Buka Stadi idia naria taudia idia ura idia itaia edia grup taudia ibounai be August lalonai haroro gaukara do idia durua. Unai bamona oi karaia totona oi do idia durua.
6 Paulo ena haheitalai ita tohotohoa bona sivarai namona ita durua badabada karana amo, ‘abidadama ena heau helulu do ita heaulaia’ noho.