Oi Haheauka Noho, A?
1 “Bema lau kamonai, egu natuna Keristani taudia ese Dirava ena hereva momokani ena dala dekenai idia raka noho, vadaeni lau moale bada herea. Moale ta ese unai moale ia hereaia diba lasi.” (3 Ioa. 4) Ioane ena lauma natudia edia haheauka karana dainai ia moale bada herea. Iseda guba Tamana ia moale bada herea badina ena natudia ai do idia lao diba taudia milioni momo ia itaia be “hereva momokani ena dala dekenai idia raka noho”!—Aon. 23:15, 16; 27:11.
2 Ena be Dirava ena taunimanima edia orea be Keristani gaukara idia karaia goadagoada noho, to haida be idia gaukara goadagoada lasi. Ena be hereva momokani idia dibaia matamaia neganai reana idia goada, to idia hanaia laganidia lalonai, hahediba taudia halaoa gaukarana be sisina sibona idia karaia eiava nega haida sibona idia karaia.
3 Ita lalo-parara diba, reana haida be idia gaukara goadagoada lasi badina idia gorere bona idia buruka dainai. To, edia haheauka karana dainai ita hanamodia be namo. Idia karaia diba gaudia idia karaia noho. To namona be edia mauri be Dirava dekenai idia gwauhamatalaia taudia ta ta ese sibona idia nanadaia: ‘Sibona egu ura gaudia lau tahua goadagoada dainai egu mauri lalonai Basileia lau tahua goadagoada lasi, a? Lau be “siahu sisina sibona,” eiava lau do “goada” noho, a?’ (Apok. 3:15, 16; Luka 13:24) Namona be ita ibounai be mai guriguri ida ita karaia gaudia ita laloa bona iseda kara ita hanamoa, bona namona be ita laloatao Iehova ia gwauhamata “iena hairai, iena hanamoa, bona iena maino do ia henia kara namo taudia ibounai dekenai.”—Roma 2:10.
4 Ita Haheauka Diba Dalana: Dahaka ese Iesu ia durua ia haheauka totona? Paulo ia hahedinaraia, ia gwau: “Iesu be satauro dainai ia hesiku lasi. Lasi momokani. Ia diba guba ena moale be iena vairanai ia noho dainai, ia ese satauro ena hemarai bona ena mase ia laloa lasi. Bona hari ia be Dirava ena helai gabuna badana ena idiba kahanai ia helai noho.” (Heb. 12:1-3) Iesu vairanai ia noho moalena be nega sisina ai do ia abia hahetoho idauidau ia hanaia momokani. Ita vairanai ia noho moalena ita laloa karana ese ita danu do ia durua ita haheauka totona. (Apok. 21:4, 7; 22:12) Bema Iehova ita noia sibona eda stadi, hebou lao henia hanaihanai karana, bona guriguri hanaihanai karana amo goada ia henia, do ita hegeregere ia henia gaukara lalonai ita haheauka totona.
5 Ia idia badinaia taudia edia haheauka karana dainai, Iehova ia moale. Unai dainai, namona be ena moale ita habadaia totona ‘hereva momokani ena dala dekenai do ita raka noho.’