Oi ese Namo Oi Davaria Noho, A?
1 Hari inai nega ai, taunimanima milioni momo idia ura hekwakwanai idia hanaia bona mauri namona idia moalelaia daladia idia diba. Sibona edia namo idia habadaia daladia idia gwauraia bukadia idia duahia eiava edia mauri idia hanamoa totona grup bona orea idauidau dekenai sisiba idia tahua. Reana haida idia gwau diba namo sisina idia abia. To, hari mauri ena toana ita itaia neganai, ita gwau diba taunimanima ese idia haginia program idauidau amo, taunimanima be mauri mai mainona bona mai moalena idia dibaia, a? Lasi vaitani!—1 Kor. 3:18-20.
2 To, iseda Havaraia Tauna ese idia ura kamonai taudia ibounai dekenai, davana lasi heduru herevadia ia henia. Iehova ia ura taunimanima ibounai be ena hadibaia herevadia amo namo idia abia. Mai ena hariharibada ida ena lauma amo ia havaraia Herevana ia henia, taunimanima be kara maoromaoro dalanai ia hakaua totona, bona ena ura dainai Basileia ena sivarai namona be tanobada ibounai dekenai idia harorolaia. (Sal. 19:7, 8; Mat. 24:14; 2 Tim. 3:16) Dirava ena taravatu kamonai henia karana amo moale momokani maurina ita abia.—Isa. 48:17, 18.
3 Iehova ena hakaua herevadia ese sibona edia namo idia habadaia daladia idia gwauraia bukadia eiava tanobada ese ia hahedinaraia sibona hanamoa daladia, ia hereaia momokani. Heduru korikorina bona namo bada do ita davaria bema Iehova ena Hereva lalonai idia noho daladia bona ena orea ese ia hadibaia gaudia ita badinaia.—1 Pet. 3:10-12.
4 Kongregesen Heboudia amo Namo Oi Abia: Hari, Iehova ia ura bada ena dala ia hadibaia ita dekenai, bona ena hadibaia herevadia kamonai namonamo karana amo namo ita abia. Pura ta ta ai, ita abia hebou ima ese Iehova ena lalokau idia hamomokania. Kongregesen ena heboudia dekenai ita lao neganai, iseda diba Dirava dekenai ita habadaia. Iehova kahirakahira ita lao noho lalonai, dika amo sibona ita gimaia karana ita dibaia. Unai dala amo goada ita abia.
5 Unai sibona lasi. Kongregesen heboudia dekenai iseda lalokau karana ita “habadaia” diba. (2 Kor. 6:13) Anina be kongregesen lalonai ma haida ita dibaia. Ita hagoadaia heheni karana amo namo ita abia, aposetolo Paulo ese Roma taudia dekenai ia siaia revareva lalonai ia gwauraia bamona. (Roma 1:11, 12) Heberu taudia ia tore henidia neganai, Keristani ena hebamo karana idia rakatania matamaia taudia dekenai sisiba goadana ia henia.—Heb. 10:24, 25.
6 Iseda mauri lalonai, haida edia namo laloa karana amo moale ita abia. Ita idia hagoadaia haida edia moale habadaia daladia do ita tahua. Unai dainai, iseda Keristani heboudia ese sibona iseda namo idia habadaia bona idia ida hebamo karana namona ita moalelaia taudia edia namo idia habadaia danu. Namona be mai eda kudouna ibounai ida hebou karadia ibounai lalonai ita vareai.
7 Aposetolo Paulo ena sisiba Timoteo dekenai be unai bamona, ia gwau: “Dirava ena ura kara do oi tahua, bona do oi badinaia noho.” (1 Tim. 4:7) Sibona ita nanadaia diba: ‘Lau be sibona lau hadibaia noho, a? Kongregesen heboudia dekenai lau kamonai gaudia amo namo lau davaria dalana lau dibaia noho, a?’ Iseda haere be oibe, bema hebou dekenai idia gwauraia gaudia ita kamonai namonamo bona ita hekwarahi ita dibaia gaudia ita badinaia totona. Namona be hereva idia henia tadikaka sibona ita itaia lasi, to namona be iseda lalona ena matana amo ita itaia Iehova be iena taunimanima edia Hadibaia Tauna Badana.—Isa. 30:20.
8 Haroro Sikuli Bona Hesiai Hebou: Inai hebou rua idia karaia ena badina be ita idia durua Keristani haroro gaukara ita karaia namonamo totona. Momokani Haroro Sikuli idia karaia ena badina be unai—ia be sikuli ta bona ena stiuden taudia ese hadibaia hereva bona sisiba idia abia hanaihanai. Oi be mai emu dala, taunimanima vairanai hereva henia bona Dirava ena Hereva hadibaia karadia dekenai oiemu diba ia bada ia lao oi hahedinaraia totona. To sikuli amo namo bada oi abia totona, sikuli dekenai emu ladana oi henia, hebou dekenai oi lao, hanaihanai hereva oi henia, bona mai emu kudouna ibounai ida oi karaia. Sisiba oi abia dae bona badinaia karana ese oi do ia durua gaukara namona oi karaia totona.
9 Hesiai Hebou ese Keristani haroro gaukara ena anina bada ia hadibaia ita dekenai, bona ita ia hadibaia edena bamona hahediba taudia halaoa gaukarana ita karaia diba. Oi bona emu ruma bese be unai hebou rua dekenai idia hahedinaraia gaudia amo namo umui davaria, a? Keristani headava tauna ta bona ena hahine idia gwau: “Hesiai Hebou ta dekenai ai kamonai, ruma bese ese dina ena siri idia karaia hebou be namo. Guna unai ai karaia lasi, to hari ai karaia noho.” Edena bamona namo idia davaria? Idia gwau: “Ai davaria emai herevahereva aniani negana dekenai ai moalelaia bada. Hari, aniani negana dekenai ai hepapahuahu lasi.” Natudia danu be unai hebou amo namo idia abia, a? Oibe. Sinana ia gwau: “Ia hedinarai goevagoeva, hebou ese emai natudia idia durua bada. Pura ta dekenai ai kamonai emai lagani 6 merona be hereva koikoi ia gwauraia. To unai pura ai, hebou dekenai hereva ginigunana be koikoi karana ia herevalaia. Emai mero ena vairana dekenai kerere ena toana ia hedinarai, ena tamana ia itaia, bona helai gauna dekenai ia komu. Unai hereva ia lalo-pararalaia, bona unai murinai hekwakwanai ta ai davaria lasi.”
10 Painia taihu ta ia gwau ia moale, badina Hesiai Hebou dekenai iseda haroro gaukara ita hanamoa totona heduru herevadia idia gwauraia. Dahaka dainai? Ia gwau: “Nega momo lau manadalaia dalana lau badinaia kava sibona. Nega haida lau laloa, Iseda Basileia Gaukara pepana dekenai idia atoa heduru herevadia be do idia gaukara lasi. To Hesiai Hebou dekenai, idia hahedinaraia namona be unai do ita gaukaralaia toho neganai, egu ura ia habadaia momokani unai heduru herevadia do lau badinaia. Unai gaudia dainai haroro gaukara lau moalelaia!” Nega ginigunana dekenai Baibel stadi hamatamaia totona idia henia heduru herevadia be pura haida lalonai ia badinaia murinai, ena vadivadi ginigunana dekenai heduru totona ia guriguri kekenina ta ida Baibel stadi ia hamatamaia.
11 Hereva ta oi kamonai bona Baibel ese oi abia hidi gaudia haida dekenai sisiba ia henia neganai, oi mamia Iehova ese maoromaoro oi ia hereva henia, a? Tadikaka ta be unai bamona ia mamia. Ia gwau: “Vanegai sibona hebou ta dekenai, tadikaka ta be ena hereva lalonai ia hahedinaraia edena moale karadia be maoro bona edena moale karadia be maoro lasi Keristani taudia totona. Guna lau ura televisen dekenai boksini gadara lau itaia. To unai hebou murinai, egu lalona lau hadaia unai spot gadara be maoro lasi Keristani taudia totona. Unai dainai hari boksini lau raraia lasi.” Oibe, ena be unai tadikaka ese dagedage gadara ta ia ura henia, to mai ena manau ida Iehova ena hakaua dalana ia abia dae.—Sal. 11:5.
12 Pablik Tok, Gima Kohorona Stadi, Bona Kongregesen Ena Buka Stadi: Pura ta ta iboudiai ita kamonai pablik tok ese Baibel ena hereva idauidau idia herevalaia. Unai hereva amo dahaka oi abia noho? Keristani headava tauna ta ese ia abia vadaeni namo ia herevalaia, ia gwau: “Pablik tok ta ese lauma ena huahua ibounai ia herevalaia. Hereva ia henia tadikaka ese ia hahedinaraia unai huahua ta ta ia habadaia totona, kara ta ia abia hidi bona pura ta dekenai unai kara ia habadaia toho. Pura ena dokona ai, unai huahua be ena dina ta ta maurina dekenai ia hahedinaraia dalana ia laloa. Bena vaira purana dekenai, huahua ta ia habadaia toho. Unai kara lau ura henia bona lau sibona ese unai kara lau karaia matamaia.” Ia dibaia gaudia ia badinaia namo herea!
13 Gima Kohorona Stadi ese ita ia hadibaia Baibel ena hakaua herevadia be iseda mauri ena noho daladia idauidau dekenai ita badinaia totona. Unai ese ita ia durua iseda lalona bona kudouna dekenai maino ita abia ena be mauri ena hekwakwanai be momo. Gima Kohorona Stadi ese ita ia durua danu ia hedinarai noho hereva momokani ita dibaia totona. Hegeregere, May 1, 1999 ena Gima Kohorona ena hereva ita stadilaia karana amo namo ita abia, ani, edia sinado be: “Inai Gaudia be Do Idia Vara,” “Duahia Taudia E, Do Umui Laloa Namonamo,” “Umui Gima Noho Bona Umui Gaukara Goadagoada!” Edena bamona unai stadi be mai anina bada oi dekenai? Oiemu kara amo oi hahedinaraia Iesu ena hadibaia hereva vaira nega totona oi laloa bada, a? Vaira nega ai, “gau dika rohorohona, gabu ia hadikaia gauna, [be] Dubu Helaga lalonai ia gini” ita itaia neganai, do idia vara hahetoho dainai oi hegaegae, a? (Mat. 24:15-22) Emu tahua gaudia bona mauri dalana ese idia hahedinaraia, kohu tahua karana lasi, to Iehova ena ladana hahelagaia karana be mai anina bada oi dekenai, a? Gima Kohorona Stadi ai, ita sibona ese namo ita davaria dalana ita dibaia noho, ani?
14 Pura ta ta ai, Kongregesen ena Buka Stadi dekenai ita dibaia gaudia mani oi laloa. Ruma Bese Ena Moale bukana be hari ita stadilaia noho. Hua toi lalonai inai buka ita stadilaia neganai, Baibel ena sisiba bona hakaua hereva namodia amo namo ita abia, ani?
15 Iehova ese Ita Ia Hadibaia mai Moale ida Ita Noho Totona: Dirava ena taravatu ita kamonai henia neganai, lalohisihisi bada ita koua. Danu, moale ai ita noho ena badina ita dibaia. Iehova ena hakaua dala badinaia karana amo ena gaukara taudia ai ita lao, itaia taudia sibona lasi. Bona Dirava ena gaukara idia karaia taudia be moale taudia.—1 Kor. 3:9; Iam. 1:25.
16 Kongregesen ena heboudia dekenai oi kamonai gaudia oi badinaia diba dalana oi laloa goadagoada. (Ioa. 13:17) Mai emu kudouna ibounai ida Dirava oi hesiai henia. Emu moale be do ia bada. Emu mauri be do ia namo, bona mai anina. Oibe, oi ese namo do oi davaria noho.