April—‘Ita Hekwarahi Bona Iseda Goada Ita Gaukaralaia Negana’
1 Memorial negana ena pura idauidau be laloa namonamo negana Iehova ena taunimanima dekenai. Ia be nega namona Keriso ena mase ese ia havaraia gaudia bona Iesu ese ena rara ia bubua dainai do ia guguru bona Dirava ese ia henia helarona ita laloa namonamo totona. Lagani gunana ena dina April 19 oi laloa neganai, dahaka oi laloatao? Unai adorahi ai oi itaia taunimanima, Memorial lalonai lauma dalanai oi idia hagoadaia gaudia, idia henia hereva namona Baibel amo, bona mai kudouna ibounai ida idia henia guriguridia oi laloatao, a? Reana emu lalona oi hadaia, Iehova bona Iesu ese oi dekenai idia hahedinaraia lalokau dainai emu tanikiu karana do oi habadaia. Hari unai gaudia oi laloa namonamo dainai oiemu hemami be edena bamona?
2 Ia hedinarai goevagoeva Iehova ena taunimanima edia tanikiu karana be hereva sibona amo idia hahedinaraia lasi. (Kol. 3:15, 17) April gunana ai, Keristani hesiai gaukara lalonai ita hekwarahi karana amo ita hahedinaraia Iehova ia kehoa hahemauri dalana ita laloa bada. Papua New Guinea dekenai heduru painia taudia edia namba be 41 pesen amo namba gunana ia hanaia. Bona iseda moale ia bada ia lao, badina ita itaia Baibel stadi momo ita hamatamaia bona Memorial dekenai idia mai taudia edia namba be namba gunadia ia hanaia!
3 Ita diba momokani iseda helaro be do ia guguru bona unai ese gaukara totona ita ia hagoadaia. Unai be aposetolo Paulo ia torea bamona, ia gwau: “Inai hereva be momokani dainai, ita hekwarahi bona ita hisihisi noho. Badina be Mauri Diravana ita abidadama henia noho. Ia be taunimanima ibounai edia Hamauria Tauna, to ia be abidadama taudia edia Hamauria Tauna momokani.”—1 Tim. 4:10.
4 Inai Memorial negana lalonai, oiemu abidadama Iehova ia kehoa mauri dalana dekenai be edena bamona do oi hahedinaraia? April gunana ai ita itaia, ripoti idia henia Basileia harorolaia taudia be 3,288. Hari April dekenai unai namba ita hanaia diba, a? Do ita karaia diba. To unai totona bapatiso bona bapatiso lasi pablisa iboudiai be do idia haroro be namo. Reana kamonai matamata taudia momo idia hegeregere do idia haroro totona. Unai dainai, hari April dekenai oi hekwarahi bona oiemu goada oi gaukaralaia totona palani oi karaia lalonai, namona be oi ida do idia haroro totona ma haida, pablisa matamata bona edia diba be bada lasi taudia danu, do oi hagoadaia daladia oi laloa.
5 Ma Haida Oi Durua Do Idia Haroro Lou: Bema hua ta o rua lalonai haroro gaukara idia karaia lasi taudia haida oi diba, reana idia oi hagoadaia bona haroro gaukara lalonai oi idia bamoa totona idia oi boiria diba. Bema kongregesen taudia haida ese haroro gaukara idia rakatania, elda taudia do idia hekwarahi, unai taudia do idia vadivadi henia totona bona idia hagoadaia April lalonai haroro gaukara do idia hamatamaia lou.
6 Iehova ena lauma ese iena hesiai gaukara lalonai ita ia hagoadaia totona ita noinoi noho be namo. (Luka 11:13) Lauma helaga ita abia totona dahaka ita karaia be namo? Namona be Dirava ena lauma amo ia vara Baibel ita duahia. (2 Tim. 3:16, 17) Namona be pura ta ta edia hebou ima dekenai ita lao bona unai amo “Lauma Helaga ena hereva ekalesia oreadia dekenai do [ita] kamonai!” (Apok. 3:6) Hari be nega namona hua haida sibona lalonai idia haroro taudia eiava haroro gaukara idia rakatania taudia ita durua, edia stadi karana do idia hanamoa bona hebou dekenai do idia mai hanaihanai totona. (Sal. 50:23) Unai ita karaia bona nega tamona, sibona eda namo lauma dalanai ita naria. To, gau ma ta ita karaia danu be gau badana.
7 Aposetolo Petero ia gwau Dirava ese ia idia “kamonai henia taudia dekenai” ena lauma helaga ia henia. (Kara 5:32) Unai bamona kamonai henia karana dainai iena oda herevana ita badinaia bena ‘taunimanima ibounai dekenai ita haroro bona hereva ita gwauraia hedinarai.’ (Kara 1:8; 10:42) Unai dainai, ena be Dirava ena lauma ese ita ia hagoadaia neganai sibona ita haroro diba, to Iehova hamoalea urana ita hahedinaraia matamaia neganai, ia ese ita dekenai heduru bada do ia henia. Mai eda ura ida kamonai karana ita hahedinaraia guna be mai anina bada, bona unai do ita laloa maragi lasi be namo!
8 Matamata Taudia Durua Karana: Tama sina e, umui itaia emui natudia idia ura ma haida dekenai hereva momokani idia harorolaia, a? Haroro gaukara lalonai umui idia bamoa, a? Edia kara be namo, a? Bema unai bamona, umui naria kava lasi be namo, ani? Kongregesen Hesiai Komiti tauna ta umui hereva henia, bona umui itaia bema emui natuna ia hegeregere inai April lalonai pablisa ai ia lao totona. (Hesiai Gaukara bukana, rau 99-100, itaia.) Namona be umui lalo-parara hari Memorial negana lalonai, emui natudia ese Iehova hanamoa karana lalonai gaukara badana idia karaia diba.—Mat. 21:15, 16.
9 Georgia, U.S.A. dekenai, Keristani sinana ta ese hanaihanai ena kekeni matamata ia hagoadaia ma haida dekenai Iehova do ia herevalaia. Lagani gunana ai, unai kekeni be ena sinana ida haroro gaukara ia karaia lalonai, ia ese tau ta dekenai Dahaka Ita Karaia? buklet ia hariharilaia bona ena anina rauna ia herevalaia. Tau ia henanadai: “Oiemu mauri lagani be hida?” Kekeni ia gwau: “Egu mauri lagani be 7.” Tau ia hoa badina kekeni ese mai anina bada haroro herevana ia gwauraia diba dainai. Unai tau ia matamata neganai hereva momokani ia diba to iena mauri lalonai ia badinaia lasi. Daudau lasi murinai, unai tau, iena adavana, bona iena natuna kekeni ida Baibel stadi idia karaia.
10 Matamata taudia momo idia pablisa vadaeni, bona ita ida haroro gaukara idia karaia dainai ita moale. Unai matamata taudia ese mauri lagani tamona taudia idia veria bona hagoadaia diba. To danu, April be nega namona, ruma bese ta ta ese hesiai gaukara helagana idia karaia hebou karana amo edia lalo-tamona do idia hagoadaia bona edia goada lauma dalanai do idia habadaia. Ruma bese kwaradia ese unai gaukara do idia gunalaia be namo.—Aon. 24:3.
11 Kamonai Matamata Taudia Oi Durua: Idia ida Baibel stadi oi karaia kamonai matamata taudia be edena bamona? April lalonai gaukara badana do idia durua diba, a? Diba bukana ena karoa 2, paragraf 22, eiava karoa 11, paragraf 14 umui stadilaia neganai, reana ia hahedinaraia ia ura ma haida dekenai ia dibaia gaudia ia herevalaia. Bema buka ena dokona be kahirakahira, namona be oi hegaegae karoa 18, paragraf 8 do umui karaia neganai unai gauna do oi herevalaia namonamo, paragraf ia gwau: “Reana oi ura bada oi dibaia noho gaudia be emu varavara, emu turana, bona ma haida do oi hamaorolaidia. Reana oi be unai bamona oi karaia vadaeni, Iesu ese sivarai namona be nega idauidau ai ia davaria taudia ia hamaorolaidia hegeregerena. (Luka 10:38, 39; Ioa. 4:6-15) Reana hari oi ura unai kara do oi habadaia.” Oi stadi henia taudia be unai bamona, a?
12 Oiemu stiuden tauna ese Dirava ena Hereva ia abia dae, a? Baibel ena hakaua herevadia ia badinaia, a? Ia ese ena mauri ia haidaua Dirava ena taravatu hegeregerena ia noho totona, a? Kongregesen heboudia dekenai ia mai, a? Ia ura Iehova Dirava ia hesiai henia, a? Bema oibe, reana ia namo oi ese ia oi hagoadaia elda taudia do ia hereva henia bena do idia itaia bema ia hegeregere bapatiso lasi pablisa ai do ia lao bona April lalonai oi ida do ia gaukara, ani? (Hesiai Gaukara bukana, rau 97-9 itaia.) Unai dala ai ia itaia diba, Iehova ia hesiai henia toho lalonai Iehova ena orea ese ia do ia durua.
13 Momokani, stiuden taudia haida idia goada haraga bona ma haida idia haraga lasi. Unai dainai, June 2000 Iseda Basileia Gaukara pepana, rau 4, paragraf 5-6 edia hakaua herevana hegeregerena, haida ese buka iharuana idia stadilaia, bema stiuden tauna ia hahedinaraia ia ura diba ia abia, to kara ta ia karaia totona heduru do ia abia noho be namo. Iseda helaro be unai kudou-maoro taudia be “nega kwadogi o daudau” lalonai Keriso ena hahediba taudia korikoridia ai do idia lao. (Kara 26:29) To, bema unai bamona tauna oi stadi henia negana ia “daudau” vadaeni, oi laloa inai Memorial negana be nega namona, Keriso ena boubou gauna ia laloa bada karana ia hahedinaraia matamaia totona, a?
14 Edena Dala ai Ita Durudia Idia Haroro Totona: Idia hegeregere taudia idia haroro totona ita durua dalana ita diba, bema Iesu ese ma haida ia hadibaia dalana ita stadilaia. Ia ese taunimanima hutuma ia itaia neganai, ena aposetolo taudia ia siaia kava lasi idia haroro totona. Ia ese guna haroro gaukara ena badina ia hahedinaraia, guriguri ena anina ia herevalaia, bona heduru gaudia toi ia henidia: turana, teritori, bona haroro herevana. (Mat. 9:35-38; 10:5-7; Mar. 6:7; Luka 9:2, 6) Oi ese unai oi karaia diba danu. Herevana oi ese oiemu natuna, stiuden matamata, eiava nega sisina lalonai haroro ripoti ia henia lasi tauna oi durua, namona be oi hekwarahi inai gaudia do oi herevalaia totona.
15 Badina Oi Hahedinaraia: Haroro gaukara ena anina badana oi hahedinaraia. Mai moale ida oi herevalaia. Ekspiriens haida amo kongregesen ese haroro gaukara ai ia karaia gaudia oi hahedinaraia. Iesu ese Mat. 9:36-38 lalonai ia hahedinaraia hemami oi hahedinaraia. Pablisa ai do ia lao tauna eiava guna haroro gaukara ia rakatania tauna oi hagoadaia, sibona ena haroro gaukara ia gurigurilaia bona tanobada ibounai haroro gaukarana ese anina ia havaraia totona ia noinoi.
16 Oi Durua Haroro Dala Idauidau Do Ia Laloa: Oi gwau Buka stadi grup ida ruma-ta-ruma-ta gaukara totona ia hebou diba. Varavara bona ia diba taudia eiava aniani negana lalonai gaukara turadia eiava sikuli turadia hereva henia karana oi herevalaia. Ta be basi, bouti, eiava peleini amo ia guia neganai, ma haida edia namo ia laloa karana amo, nega momo herevahereva dalana ia kehoa. Hereva ita hamatamaia guna neganai, nega momo dala ia kehoa haroro hereva namona ita henia totona. Momokani, “dina ibounai” dala idauidau momo ai ma haida dekenai iseda helaro ita herevalaia diba.—Sal. 96:2, 3.
17 Reana ia namo bema karaharaga oi bona pablisa matamata be ruma-ta-ruma-ta gaukara do umui karaia hebou. Bema emu tahua gauna be April lalonai emu hesiai gaukara do oi habadaia, namona be oi abia teritori dekenai ruma iboudiai oi vadivadi henia, herevana teritori ia maragi o bada. Haroro gaukara oi haorea eiava hebou o gabu ma ta dekenai oi lao neganai, reana oi itaia guna ta oi davaria lasi eiava kamonai tauna ta oi davaria rumana dekenai ta be hari ia noho. Bema ia hegeregere bona bema anina do ia havaraia, nega kwadogi lalonai idia oi hereva henia. Unai ese oiemu haroro gaukara oi karaia guguru mamina bona moale ia havaraia.
18 Lalona Veria Haroro Herevana Oi Hegaegaelaia: Ta ia ura Basileia ena sivarai ia harorolaia be idau, to mamina ia abia unai sivarai harorolaia dalana ia diba namonamo be ma ia idau, bona bema ia be pablisa matamata eiava nega sisina daudau lalonai ia haroro lasi, reana diba lasi mamina ia abia. Pablisa matamatadia bona haroro gaukara idia rakatania taudia ida oi hegaegae karana be nega gaukaralaia namonamo karana. Hesiai Hebou bona haroro hebou lalodiai lalohadai namodia idia hahedinaraia diba, to hegaegae karana be mai anina bada.
19 Edena dala ai pablisa matamata taudia oi durua diba, haroro totona do idia hegaegae? Magasin hahedinaraia herevana umui hegaegaelaia guna bona unai hereva ia kwadogi be namo! Idia oi noia niusi lalonai idia kamonai bona teritori dekenai taunimanima ese idia laloa gaudia ta do idia abia hidi, bona magasin matamatana ta amo unai gauna ia herevalaia kahana umui tahua. Unai hereva umui gwauraia loulou, bona karaharaga haroro gaukara lalonai do umui gaukaralaia.
20 Pablisa Taudia Edia Namba Ia Bada Ia Lao Karana Oi Durua: Lagani gunana ai, Papua New Guinea dekenai Memorial dekenai idia mai taudia edia namba be 16,000 ia hanaia. Ripoti idia henia pablisa taudia edia averes be 3,000 ia hanaia sisina. Anina be, taunimanima 13,000 idia ura unai hebou badana dekenai idia mai bona Baibel ena hadibaia hereva badana ta ia hahedinaraia herevana idia kamonai. Ita haida idia dibaia sisina, bona reana unai dainai idia moale. Idia momo ese edia hereva amo ita idia hanamoa, iseda tanobada ibounai gaukarana totona kontribusen idia henia, bona ma haida edia vairanai eda namo idia gwauraia. Unai taunimanima hutuma dainai iseda pablisa taudia edia namba ia bada ia lao diba. Idia ita durua totona dahaka ita karaia diba bena lauma dalanai do idia goada?
21 Memorial dekenai idia mai kamonai matamata taudia momo idia mai badina ita ta ese idia ia boiria. Nega momo, unai ena anina be idia mai taudia huanai ta idia diba vadaeni. Bema ta be ita boiria dainai ia mai, iseda maduna be do ia mamia ia mai dainai ita moale bona do ita durua program amo namo ia abia totona. Momo do idia mai dainai, helai gabuna ia davaria totona ia oi durua. Ia dekenai Baibel oi henia, bona oi boiria oi ida emu ane buka do ia gaukaralaia. Ia henia henanadai iboudiai oi haerelaia. Iena namo oi laloa bada karana amo ena ura oi habadaia diba. To momokani, ita ibounai ese inai maduna ita huaia hebou, bema ita diba lasi tauna ita itaia, ita hahedinaraia ia mai dainai ita moale, bona ita hereva henia sisina ia do ita diba totona.
22 Ta be Memorial dekenai ia mai karana ese ena lalohadai ia haidaua diba. Hebou dekenai ia mai karana ese ia hahedinaraia diba ia tahua gauna be gabu ma ta dekenai ia davaria lasi bona ita dekenai ia noho gauna ia ura ia stadilaia namonamo. Mauri davalaia boubouna ena anina hereadaena ia hahedinaraia herevana ese guna Iehova ena lalokau badana ia lalo-pararalaia lasi tauna dekenai gau namo hereana ia halasia diba. Reana ia itaia iseda kara be idau—ita be lalo-momokani, kara namo, lalokau, bona hemataurai hahedinaraia taudia. Iseda hebou gabuna be ia itaia dubu idauidau amo ia idau, badina kaivakuku idia noho lasi bona anina lasi kastom karadia ita karaia lasi. Kamonai matamata taudia be do idia itaia idia mai taudia edia noho daladia be idauidau bona moni ita gogoa lasi. Unai idia itaia dainai reana idia ura bada do idia mai lou.
23 Memorial murinai, idia mai kamonai matamata taudia ibounai do ita durua be gau badana. Bema kamonai matamata taudia oi boiria mai, maduna oi abia. Kingdom Hall idia do rakatania lasi neganai, oi hamomokania idia diba hebou ma haida do umui karaia. Bema pablik tok gabena ena sinado oi diba, oi gwauraia be namo. Namona be edia noho gabuna kahirakahira ia noho Kongregesen Buka Stadi gabuna bona nega be idia dekenai oi hadibaia. Gabeai, idia dekenai Tau Hereadaena bukana oi henia, bona April 30 purana ai do umui herevalaia kahana oi hadibaia.
24 Dala oi hegaegaelaia, edia ruma dekenai idia oi vadivadi henia totona. Oi hamomokania idia ese Dahaka Ita Karaia? buklet bona Diba bukana idia abia, idia amo Baibel ena hadibaia hereva badadia do idia dibaia. Bema stadi idia do abia lasi, Baibel stadi oi herevalaia. Oi gwau namona be Dirava Ena Ura Idia Karaia buklet idia duahia, badina ia ese iseda orea ia heau dalana ia hahedinaraia namonamo. Bema inai oi hegaegaelaia diba, idia oi hagoadaia iseda vidio idauidau, hegeregere Our Whole Association of Brothers, do idia itaia. Dala oi hegaegaelaia kongregesen taudia ma haida idia hedavari henia totona. Vaira huadia lalonai, nega haida oi lao kamonai matamata taudia oi itaia totona; sekit naria tauna ena vadivadi neganai eiava sekit hebouhebou eiava dina tamona hebouhebou umui karaia neganai idia oi boiria. Dala oi kehoa bena idia hahedinaraia diba idia danu be hegeregere “mauri hanaihanai abia totona”!—Kara 13:48.
25 Elda Taudia ese Idia Karaia Diba Gaudia: Hari April lalonai iseda haroro gaukara ita habadaia lalonai elda taudia edia maduna be bada. Pablisa haida idia lalo-manoka badina haroro gaukara dekenai idia mai totona idia hekwarahi bada, to hora tamona bamona murinai teritori ia ore. Kara ta umui karaia diba, pablisa taudia ese daba ibounai ruma-ta-ruma-ta gaukara idia karaia diba totona, a? Bema oi be buka stadi naria tauna ta, namona be emu buka stadi taudia ibounai ese gaukara badana do idia karaia diba totona heduru oi henia daladia edia lista oi torea. Emu buka stadi dekenai idia mai taudia haida be matamata, kamonai matamata, hua haida sibona lalonai idia haroro, eiava haroro gaukara idia rakatania taudia, a? Mani oi itaia bema tama sina, painia taudia, eiava pablisa ma haida ese gau ta idia karaia vadaeni unai taudia idia durua totona? Oi henia diba heduru ibounai oi henia be namo. Tano ta ai, lagani rua lalonai ia haroro lasi taihu ta be April gunana lalonai ia haroro horadia be 50 idia hanaia. Ena kara ia haidaua ena badina be dahaka? Ia gwau badina be elda taudia idia karaia mamoe naria gaukarana ese ia hagoadaia dainai.
26 Namona be elda taudia bona hesiai taudia idia gaukara hebou bona idia hamomokania April totona teritori, magasin, bona buka idia hegeregere. Haroro hebou ma haida umui karaia diba, a? Bema oibe, namona be umui ese hari unai umui hegaegaelaia. Bona gau badana be, ma haida vairanai bona umui sibona umui gwauraia guriguridia lalonai, Iehova umui noia Basileia ena gaukara ita habadaia huana lalonai iseda hekwarahi do ia hanamoa.—Roma 15:30, 31; 2 Tes. 3:1.
27 Pura ta ta iboudiai edia hebou lalonai, namona be elda taudia ese pablisa taudia idia hagoadaia, mai guriguri ida do idia laloa bema heduru painia gaukara idia karaia diba. Nega iboudiai, elda taudia bona hesiai taudia ibounai be mai edia ura bada ida idia hahedinaraia diba, April be gaukara hua namona ai do ita halaoa be namo. Reana elda taudia bona hesiai taudia haida ese April lalonai heduru painia gaukara do idia karaia diba danu. Lagani gunana ai Papua New Guinea dekenai, April lalonai, kongregesen 4 ta ta dekenai heduru painia gaukara idia karaia taudia edia namba be 30 ia hanaia. Ita diba elda taudia ese idia hagoadadia dainai momo be unai bamona idia gaukara goada.
28 Gaukara Goada amo Ia Mai Moale: Haroro gaukara lalonai “ita hekwarahi” amo idia mai hahenamo be dahaka? (1 Tim. 4:10) Gau ta be tadikaka bona taihu be haroro gaukara idia karaia goadagoada matamaia neganai, lalokau bona lalo-tamona ena mamina idia davaria.
29 Tano ta ai, matamata tadikaka ta, ia loaloa be auka, ia ura April gunana lalonai gaukara badana ia karaia. Ia hegaegae namonamo dainai bona iena sinana bona kongregesen ena tadikaka bona taihu edia heduru dainai, unai hua lalonai heduru painia gaukara ia karaia diba bona anina namona ia havaraia. Unai dainai ena hemami be edena bamona? Ia gwau: “Egu mauri lalonai nega ginigunana mamina lau abia lau danu be tau goadana ta.”
30 Ita diba momokani Iehova ese iena king siahuna harorolaia gaukarana idia laloa bada taudia ia hanamoa. (Sal. 145:11, 12) Lohiabada ena mase ita laloa neganai, ita lalo-parara Dirava badinaia karana amo idia mai hahenamo be vaira negana lalonai do idia habadaia. Aposetolo Paulo ese mauri hanaihanai ia naria noho mai ena ura bada ida. To, ia diba unai be helai kava bona naria kava karana amo ia abia gauna lasi. Ia gwau: “Unai totona lau hekwarahi, bona egu goada ibounai lau gaukaralaia noho. [Iehova] ese inai goada bona siahu, be egu lalona dekenai ia havaraia noho.” (Kol. 1:29) Iehova ese Iesu amo Paulo dekenai goada ia henia hahemauri gaukarana ia karaia diba totona, bona hari inai negai ita Ia hagoadaia diba danu. Hari April dekenai unai do oi mamia, a?
[Box on page 3]
Daika Oi Hagoadaia Diba April Lalonai Ia Haroro Totona?
Oiemu natuna, a?
Baibel stiuden ta, a?
Haroro gaukara ia rakatania tauna ta, a?