Henanadai Mauana
◼ Mobael fon ita gaukaralaia neganai, dahaka ita laloatao be namo?
Herevana edeseniai ita noho, to mobael fon amo haida ita hereva henia diba. Mobael fon be mai ena namo, to namona be ita naria namonamo, badina ita ura lasi unai ese iseda haroro gaukara o hebou ia hadikaia. Edena dala ai unai ia vara?
Haroro ai ruma tauna ida ita herevahereva bona eda mobael fon ia rini neganai, do ia vara gauna mani ita laloa. Ruma tauna be dahaka do ia laloa? Bema fon ita haerelaia, iena hemami be edena bamona? Ita ura lasi eda kara ta amo ma haida ita koua Basileia sivaraina idia kamonai lasi totona. (2 Kor. 6:3) Unai dainai, bema mobael fon ita abia loaloa, namona be ena volium ita koua, unai amo haroro gaukara ai eda herevahereva karana bona ma haida edia kamonai karana ia hadikaia lasi.
Idia haroro noho taudia ita naria lalonai dahaka do ita karaia? Bema nega ita atoa haroro gaukara totona, namona be unai gaukara sibona ita laloa. Iseda hesiai gaukara helagana ita matauraia dainai, fon amo anina lasi gaudia o sibona eda ura gaudia be nega idaudia ai ita herevalaia. (Roma 12:7) To bema fon amo ta ita haroro henia o lou henia ena apoinmen ita karaia, unai be kerere lasi.
Motuka ita taria neganai, mobael fon ita gaukaralaia lasi be namo, badina ripoti haida ese idia hahedinaraia haida be unai kara amo aksiden idia davaria. Motuka ita taria neganai, mobael fon gaukaralaia karana ena taravatu ita badinaia be namo.
Hebou badadia bona maragidia ita lao, badina ita ura Iehova ita tomadiho henia bona ia ese ita ia hadibaia. Unai be hebou helagadia dainai, namona be iseda mobael fon ena volium ita koua, unai amo ita bona ma haida edia kamonai karana ia hadikaia lasi. Bema gau badana ta ia vara dainai, ita ura fon ita gaukaralaia, namona be hebou gabuna ena murimuri ai unai ita karaia. Tomadiho negadiai, fon amo sibona eda ura gaudia be nega idaudia ai ita herevalaia.—1 Kor. 10:24.
Mobael fon ita gaukaralaia namonamo neganai, unai ese ia hahedinaraia ita be ma haida edia namo ita tahua bona iseda tomadiho karadia ita laloa bada.