Lauma Gaudia Oi Moalelaia
1 Do ita abia “Basileia Harorolaia Goadagoada Taudia” Distrik Hebouhebouna ese dala namona ia kehoa, lauma gaudia ita moalelaia totona. Tauanina ia hagoadaia aniani namona bamona, hebouhebou ena program ese ‘abidadama ena hadibaia hereva’ amo lauma dalanai ita do ia hagoadaia. (1 Tim. 4:6) Ita ia durua, Iehova kahirakahira dekenai do ita lao. Bona ita diba, iseda mauri lalonai ita davaria hahetoho ita haheaukalaia totona, sisiba bona hagoadaia herevadia do ita kamonai. Iehova ese ita ia hamaoroa: “Lau ese oiemu raka dalana oi dekenai do lau hadibaia. Lau ese oi do lau hakaua, bona sisiba oi dekenai do lau henia.” (Sal. 32:8) Ita moale bada, badina eda mauri lalonai Iehova ese mai lalokau ida ita ia hakaua! Hebouhebou program amo heduru bada ita abia daladia namodia haida mani oi laloa.
2 Iseda Kudouna Ita Hegaegaelaia be Namo: Ita ta ta eda maduna be iseda kudouna ita naria. (Aon. 4:23) Unai dainai, sibona eda ura ita biagua bona sibona ita koia lasi be namo. Hebouhebou be nega namona iseda hetura karana Iehova ida ita laloa totona, ia be ‘ita ia ruhaia taravatu namona’ ita laloa negana namona. Iseda kudouna ese Dirava ia ‘hadoa hereva ia abia dae’ totona, Iehova ita noia iseda kudouna do ia tahua namonamo be namo, unai amo ia davaria “dika” ita hamaoromaoroa, bena “noho hanaihanai dalana dekenai” ita do ia hakaua.—Iam. 1:21, 25; Sal. 139:23, 24.
3 Oi Kamonai Namonamo Bona Laloa Dobu: Iesu ese Maria ia gwauraia namo badina iena hereva ia kamonai namonamo, ia gwau: “Maria ese inai gau namona ia abia hidi, bona ia dekena amo do ita kokia lasi.” (Luka 10:39, 42) Bema iseda lalohadai be Maria ena bamona, gau maragidia ese eda lalona idia veria daladia ita koua. Do ita hegaegae, program ibounai lalonai do ita helai bona kamonai namonamo. Bema gau ta dainai helai gabuna ita rakatania, do ita giroa haraga, program ita kamonai namonamo lou totona. Madi, haida be murimuri ai idia helai bona program ena kahana badadia idia reaia. Do ita herevahereva eiava raka loaloa kava lasi bona ita naria namonamo, mobael telefon, pager gaudia, kamera, eiava vidio kamera amo ma haida edia kamonai namonamo karana ita hadikaia garina.
4 Hereva ita kamonai neganai, namona be hereva haida ita torea, gau ta idia herevalaia dalana ita itaia totona. Namona be ita kamonai gaudia be ita diba vadaeni gaudia ida ita hakapua. Unai ese ita ia durua, idia herevalaia gaudia ita lalo-pararalaia bona laloatao totona. Ita torea herevadia ita itaia lou neganai, namona be ita badinaia daladia ita laloa. Ita ta ta be sibona ita nanadaia diba: ‘Edena dala ai, inai hereva ese egu hetura karana Iehova ida ia durua? Egu mauri lalonai dahaka gaudia lau haidaua be namo? Ma haida lau kara henia lalonai, edena bamona inai hereva lau badinaia diba? Edena dala ai, haroro gaukara lalonai inai hereva lau gaukaralaia diba?’ Oi moalelaia herevadia be ma haida ida oi herevalaia. Unai gaudia ese ita idia durua, Iehova ena hereva be ‘iseda kudouna lalonai’ ita dogoatao noho totona.—Aon. 4:20, 21.
5 Ita Dibaia Herevadia Ita Badinaia be Namo: Distrik hebouhebou dekenai ia lao tauna ta be gabeai ia gwau: “Program ese ta ta ia durua bada, ta ia hagoadaia ena kudouna bona ena ruma bese taudia edia kudouna edia ura ia tahua totona, bona mai lalokau ida Baibel amo heduru ia henia totona. Hari lau itaia namonamo, kongregesen taudia lau durua bada be lauegu maduna.” Reana ita momo be unai bamona ita laloa. To goada ita abia ena mamina sibona be hegeregere lasi. Iesu ia gwau: “Inai bema umui diba, bona bema umui karaia, be do umui namo.” (Ioa. 13:17) Ita dekenai mai anina bada herevadia be mai goada ida ita badinaia be namo. (Fili. 4:9) Unai be lauma gaudia moalelaia dalana badana.
[Box on page 13]
Oi Kamonai Gaudia Oi Laloa Dobu:
■ Edena dala ai, egu hetura karana Iehova ida ia durua?
■ Edena dala ai, ma haida lau kara henia dalana ia hanamoa?
■ Edena dala ai, egu mauri bona haroro gaukara lalonai lau badinaia diba?