Dokona Ia Mai Kahirakahira Dainai mai Laloa Maoromaoro ida Ita Noho
1 Dirava ena Hereva ese Iehova ena dina be “henaoa tauna bamona” do ia mai ia herevalaia loulou—haraga herea, harihari, mai regerege lasi ida do ia mai. (1 Tes. 5:2; Mat. 24:43; 2 Pet. 3:10; Apok. 3:3; 16:15) Iesu ia gwau: “Unai dainai, do umui hegaegae, badina be Taunimanima ena Natuna do ia mai ena hora be umui diba lasi.” (Mat. 24:44) Inai nega ena dokona ia mai kahirakahira dainai, edena dala ai lauma dalanai ita naria namonamo diba? Ita kwalimu dalana ta be Dirava ena lauma amo ia vara hagoadaia herevana lalonai ita davaria: “Umui laloa maoromaoro noho.”—1 Pet. 4:7, NW.
2 Laloa maoromaoro ena anina be Iehova ena lalohadai hegeregerena do ita laloa. (Efe. 5:17) Inai nega ena dokona lalonai, ita ia durua sibona ita laloa ita be “idau taudia bona hanua lasi taudia” bamona ita noho. (1 Pet. 2:11) Unai ese ita ia durua mai anina bada gaudia ita lalo-pararalaia totona, mai anina bada gaudia ita tahua, bona abia hidi namodia ita karaia totona.—Fili. 1:10.
3 Lauma Dalanai Tahua Gaudia Ita Atoa: Lauma dalanai tahua gaudia ita atoa bona ita karaia ese ita ia durua ita laloa maoromaoro totona. Lauma dalanai oi be mai emu tahua gaudia haida, a? Oi gaukara goada dina ibounai Baibel oi duahia totona, Keristani heboudia ibounai oi lao henia totona, Gima Kohorona bona Awake! magasin ta ta oi duahia, eiava haroro gaukara lalonai emu gaukara oi habadaia totona, a? Bema tahua gaudia namodia oi atoa, oi gaukara goada noho unai oi abia totona, bona Iehova oi noia emu hekwarahi ia hanamoa totona, reana anina oi itaia neganai, do oi moale.
4 Elda tauna ta ese headava tau bona hahine matamatana edia lauma tahua gaudia totona ia henanadai. Unai henanadai amo idia lalo-parara bema edia noho dalana idia haidaua bona abitorehai metaudia edia davana idia henia, painia gaukara idia karaia diba. Edia lalona idia hadaia unai be edia tahua gauna ai idia halaoa. Idia gaukara goada unai abitorehai idia haorea bona dala idia karaia anina lasi karadia, edia nega bona goada idia halusia karadia, idia hamaragia totona. Lagani ta murinai, edia tahua gauna idia davaria. Dahaka anina ia havaraia? Tau ia gwau: “Bema tahua gaudia ai atoa lasi, hari ai be inai bamona lasi. Hari ai moale bada. Aiemai mauri be namo herea bona ai moalelaia. Ia be mai ena anina bona mai ena badina korikorina.”
5 Iehova ena dina ita naria noho lalonai, lauma dalanai ita naria namonamo, unai ita karaia dalana be mai laloa maoromaoro ida ita noho, bona Dirava ena ura karaia karana ita laloa bada.—Tito 2:11-13.