Emu Ruma Idia Gaukaralaia Diba, A?
1 Aposetolo edia negai, Keristani taudia momo ese edia ruma idia henia kongregesen heboudia karaia totona. (1 Kor. 16:19; Kol. 4:15; File. 1, 2) Hari inai negai kongregesen haida dekenai, Kongregesen Buka Stadi grup bona haroro gaukara heboudia idia abia gabudia be momo lasi. Unai dainai buka stadi grup haida dekenai taunimanima 30 eiava ma momo idia lao, unai be idia gwauraia taunimanima 15 ena namba ia hanaia momokani.
2 Hahenamo Badana Ta: Oi laloa emu ruma be Kongregesen Buka Stadi totona idia gaukaralaia diba, a? Hebou gabuna namona be ena daiutu ia goeva, mai ena diari namona, bona hodahoda ia vareai gabuna namona. Buka stadi be kongregesen ena hebou ta bona Iehova ese ena taunimanima ia hadibaia dalana ta dainai, emu ruma dekenai buka stadi umui karaia be hahenamo badana ta. Momo idia gwau edia ruma idia gaukaralaia dainai idia ese lauma dalanai namo idia davaria.
3 Bema oi laloa emu ruma be ia namo, mani emu kara elda taudia oi hadibaia. Reana idia ese gabu ma haida idia tahua noho. Bema ia hegeregere lasi emu ruma dekenai buka stadi umui karaia totona, haroro gaukara heboudia be unuseniai idia abia diba, a? Ena be hari idia gaukaralaia lasi, to bema elda idia diba emu ruma be ia noho hegaegae, do idia moale. Reana vaira negana ai unai hahenamo do oi moalelaia.
4 Kara Namodia Hahedinaraia: Ruma ta dekenai ita hebou neganai, idia lao taudia ibounai ese unai ruma biaguna ena kohu idia matauraia be namo. Namona be tama sina idia itaia edia natudia be stadi gabuna dekenai idia noho, ruma ena kahana ta dekenai idia loaloa kava lasi. Danu, dekena taudia ita laloa be gau badana, ita naria namonamo edia noho dalana ita hadikaia lasi.—2 Kor. 6:3, 4; 1 Pet. 2:12.
5 Heberu 13:16 ese ita ia hagoadaia ‘kara namodia bona kohu lasi taudia danu, iseda kohu do ita abia hebou. Inai bamona karadia be boubou gaudia bamona, Dirava ese ia moalelaia gaudia’ ita laloaboio lasi be namo. Kongregesen heboudia totona emu ruma idia gaukaralaia be dala namona ta, ma haida dekenai gau namodia oi henia bona emu dava bada gaudia be Iehova dekenai do oi henia totona.—Aon. 3:9.