Tiokratik Haroro Sikuli Ena Riviu

Inai henanadai be Tiokratik Haroro Sikuli dekenai do ita herevalaia, April 28, 2003 ia matamaia purana ai. Sikuli naria tauna ese miniti 30 lalonai riviu do ia karaia, unai gaudia be March 3 ia lao April 28, 2003 wiki herevadia dekenai. [Itaia: Bema henanadai edia dokona ai buka ta idia torea lasi, sibona emu tahua karana oi karaia be namo haere oi davaria totona.​—Haroro Sikuli bukana, rau 36-7 itaia.]

HEREVA NAMONAMO KARANA

1. Edena gaudia ese hereva namonamo karana idia koua diba? [1, be rau 93] (1) Hereva haida oi diba lasi; (2) nega momo oi laga-ani sisina; (3) oi hegaegae namonamo lasi; (4) oi herevalaia gaudia oi atoa namonamo lasi; (5) gado ena hereva momo oi diba lasi; (6) hereva momo herea edia anina oi hahedinaraia toho; (7) grama ena taravatu oi diba namonamo lasi.

2. Momokani eiava Koikoi: Laga-ani karana ita dadaraia be namo, badina unai laga-ani negana lalonai taunimanima ese gau ma haida idia laloa diba bona dala ia kehoa emu hereva idia utua totona. Gwauraia hedinarai. Koikoi. Laga-ani dalana maorona dainai oi herevalaia mai anina bada gaudia idia hedinarai goevagoeva. Unai bamona laga-ani karana ese ia hahedinaraia oi ura oi herevalaia gauna idia kamonai bona idia laloatao be namo, unai amo do idia laloaboio lasi. [4, be rau 97-8]

3. Taunimanima vairanai ia duahiduahi tauna eiava hereva henia tauna ta dekenai, mai anina herevadia hahedinaraia maoromaoro karana be edena dala ai mai anina bada? (Neh. 8:8) [6, be rau 101] Mai anina herevadia hahedinaraia maoromaoro karana amo oi gwauraia herevana do ia hedinarai goevagoeva, bona helai taudia ia durua do idia kamonai, kara ta idia karaia, bona edia lalona do ia veria. (Unai bamona hereva ia hegeregere.)

4. Edena dala ai, ta ese mai anina herevadia hahedinaraia maoromaoro karana ia hanamoa diba? [7, be rau 102-3] Ta ese mai anina herevadia hahedinaraia maoromaoro karana ia karaia diba bema do ia duahia gauna ia stadilaia namonamo, sentens lalodiai hereva bona lalohadai ta idia havaraia hebou herevadia itaia karana ia karaia loulou, lalohadai ma ta ia matamaia gabudia ia itaia, bona kamonai taudia ese do idia laloatao be namo hereva badadia ia laloa noho. (Unai bamona hereva ia hegeregere.)

5. Baibel stadi eiava kongregesen hebou dekenai, ta ese buka eiava magasin ta ia duahia badabada neganai, dahaka lalohadai badadia ia hahedinaraia be namo? [8, be rau 105] Idia printaia henanadai edia haere bona hereva kwarana maragina ena hereva idia gwauraia lalohadai ia hahedinaraia. (Unai bamona hereva ia hegeregere.)

HEREVA NAMBA 1

6. Tama sina ese dahaka do idia karaia diba edia natudia idia hadibaia unai amo Keristani heboudia dekenai ‘do idia kamonai bona edia lalona be do idia kehoa’? (Deu. 31:12) [1, be rau 16] (1) Tama sina be kongregesen heboudia, sekit bona distrik hebouhebou dekenai edia natudia idia abidia lao diba. (2) Ruma dekenai, nega idia atoa diba natudia be do idia helai namonamo bona laulau idia itaia eiava idia duahiduahi totona. (3) Tama sina be natudia dekenai hebou dekenai idia gaukaralaia bukadia edia kopi idia henia bona idia durua idia hegaegae hebou dekenai haere idia henia totona. (Unai bamona hereva ia hegeregere.)

7. Lauma paradaisona be dahaka? [2, w01 3/1 rau 8-10] Lauma paradaisona be “Iehova dibaia karana amo ia honu” noho dalana ia herevalaia bona ‘lauma helaga ese ia havaraia’ karadia idia hahedinaraia badabada, ia dainai ta ese Dirava bona taunimanima ida maino do ia moalelaia. (Unai bamona hereva ia hegeregere.)​—Isa. 11:​9, NW; Gal. 5:​22, 23.

8. Edena dala ai, Aonega Herevadia 8:​1-3 ese ia hahedinaraia Dirava ena aonega be taunimanima ibounai ese idia abia diba, bona Kolose 2:3 ena hereva hegeregerena, edeseniai ita davaria diba? [3, w01 3/15 rau 25, 28] Dirava ena aonega be taunimanima idia davaria gabudia dekenai ia “boiboi,” “ia gini” bamona, bona taunimanima idia noho gabudia, hegeregere geiti bona siti ena vareai gabudia dekenai ia noho. Ta ese Dirava ena aonega ia hahedinaraia totona namona be Iesu ena haheitalai ia itaia. (Unai bamona hereva ia hegeregere.)​—Kara 4:12.

9. Edena dala ai, Dirava ena ladana ita gwauraia hedinarai diba? (Ioa. 17:6) [5, be rau 273-5] Iseda herevahereva lalonai, Dirava momokanina ena ladana ita hahedinaraia, to inai bamona ladana hegeregere “Dirava” eiava “Lohiabada” ita gwauraia lasi. Baibel lalonai taunimanima dekenai Dirava ena ladana ita hahedinaraia diba. Danu gau badana be, unai ladana ese ia hahedinaraia Tauna ena lohia siahuna, ena ura, ena kara, bona ena taravatu ita hahedinaraia. (Unai bamona hereva ia hegeregere.)

10. “Basileia ena Sivarai Namona” dekenai, taunimanima ese edena mai anina bada gaudia idia dibaia be gau badana? (Mat. 24:14) [7, be rau 279-80] Namona be taunimanima idia diba lagani 1914 ai, Iesu be Dirava ena Basileia ena King ai ia lao. Unai murinai, Diabolo bona ena demoni be tanobada dekenai idia negea diho. Ita be inai tanobada dikana ena dina dokodia ai ita noho, bona kahirakahira Dirava ena Basileia ese kara ta do ia karaia inai tanobada amo Dirava ena lohia siahuna idia inai henia taudia ibounai do ia kokia bona kara maoromaoro tanobada matamatana do ia haginia. (Unai bamona hereva ia hegeregere.)​—Dan. 2:44; 7:​13, 14; Apok. 12:​7-10; 21:​2-4.

WIKI TA TA ENA BAIBEL DUAHIDUAHI

11. (a) Aposetolo edia negai, Mareko 13:14 lalonai idia herevalaia “dika rohoroho gauna” be dahaka? Roma tuari oreana mai ena pepe. Unai bamona pepe be kaivakuku hegeregerena bona Iuda taudia dekenai idia be gau dika rohorohodia. (Unai bamona hereva ia hegeregere.) (b) “Iena gabu lasi dekenai ia gini” ena anina be dahaka? Lagani 66 C.E. ai, Ierusalema bona ena dubu ia hadikaia. [2, w99 5/1 rau 15 par. 6]

12. Edena dala ai, Luka ena Evanelia bukana ese ia hahedinaraia Iesu be Davida ena garana amo ia mai tauna? (Luka 3:​23-28) [3, w92 10/1 rau 9 par. 3] Luka ese Iesu ena sene taudia, be ena sinana korikorina amo edia kahanai, edia ladadia ia torea ela bona Davida dekenai. To, Mataio ia torea sivaraina ese, Iesu ena sene taudia be ena heubu tamana Iosepa ena kahanai, edia ladadia ia torea, taravatu hegeregerena Iesu be Davida ena terona ia abia. (Unai bamona hereva ia hegeregere.)

13. Iesu ena hereva Luka 12:2 dekenai, ena anina be dahaka? Ena be Farisea taudia be edia helaga karadia amo edia kara dika idia hunia, to gabeai idia hedinarai. Gabeai, Iesu ena hahediba taudia be mai gari lasi ida Farisea taudia edia kara koikoi dikadia idia gwauraia hedinarai, kahirakahira edia mauri idia haboioa. (Unai bamona hereva ia hegeregere.)​—Luka 12:​3-5. [6, gt 77]

14. Iesu ese ia gwauraia ia boio siliva moni ena haheitalai lalonai, dahaka dainai aneru edia kara be mai anina bada? (Luka 15:10) Edia haheitalai dainai edena bamona ita kara be namo? Idia boio kara dika taudia edia helaro be Dirava ena guba Basileiana lalonai do idia noho. Unai dainai, guba dekenai idia ese dagi badadia idia abia, aneru edia dagi idia hanaia! To, aneru idia mama eiava idia badu lasi, to mai edia manau ida idia abia dae unai kara dika taunimanima ese hekwakwanai idia davaria bona idia hanaia, unai ese idia ia durua guba ena king bona hahelaga gaukara idia karaia neganai, idia be mai edia hebogahisi ida do idia lohia. (Unai bamona hereva ia hegeregere.) [7, gt 85]

15. Luka 22:29 ese edena gwauhamata rua ia gwauraia? Iesu ena hereva “Basileia ta lau henia” ese ia be ena murinai idia raka taudia ida ia karaia Basileia gwauhamatana ia herevalaia. Iena hereva “egu Tamana ese Basileia ta ia henia lau dekenai hegeregerena,” ese Iehova be ia ida ia karaia gwauhamatana, ia be Melekisedeka bamona pris ai do ia lao gwauhamatana unai ia herevalaia, Salamo 110:4 dekenai idia gwauraia hegeregerena. (Unai bamona hereva ia hegeregere.) [9, w98 2/1 rau 17 par. 18; it-1-E rau 524]